EZEQUIEL 3

1Eh je' wili i xuq'or weh i Dios: Re' hat rak'uun winaq chak'ux i huuj wili tz'ihb'amaj wach. Eh hiy cha q'or i nuq'oral keh i tinamit Israel, inki. 2Re' hin xnuteh b'ila' chik i nuchii', eh xuyeew weh chi k'uxarik i huuj tz'ihb'amaj wach. 3Eh je' wili xuq'or weh: Chab'iq' i huuj tz'ihb'amaj wach xnuyeew aweh, chanujisaj aapaam ruuk', inki. Re' hin xnub'iq wo' hoq, xa je' chik ki'iil riis kaab' noq xwik'raaj. 4Eh je' wo' chik wili i xuq'or weh i Dios: Hat rak'uun winaq, yu'naak hiy cha q'or keh i tinamit Israel i nuk'uhb'aal. 5Re' hin ma' chi kixilak taj i tinamit k'axik wach i kiq'oral ma' tankan chi riij inkiq'or k'ahchi' kaat nutaq'aam reje, chi kixilak la' i awuch aj Israel tinutaq'aaj reje. 6Eh ma' re' ta wo' chi kixilak i k'ih ch'uq chi tinamit k'ayeew wach kiq'orik, ma' ta neenkan chi riij inkiq'or k'ahchi' kaat nutaq'aam reje, eh kuuk' ta wo' taqe re' neetinutaq'aaj, re' keh nee naq inkinimaj i nuk'uhb'aal neenaq'or keh. 7Eh re' taqe i aj Israel xama' naa ta wo' kaat kib'iram ruum xama' kinkaaj ta wo' kinkib'iram i hin. Ruum chu'nchel i tinamit Israel q'e' kow i kinaah, eh q'e' kow i kánima. 8Xa re' la' re' hin naa wo' nuye'em rukowiil ak'ux i hat naa aq'atam wach i rukowiil kik'ux i keh. 9Re' hin xiik' naah aakowiil naa nuye'em, ma' xata je' kowlaj ab'aj ma' xata je' holohik ab'aj diamante. Eh ma' naa tayo'jikkuum atoob' ta neenkiyoj awee kiwach ruum re' keh ma' kinimanik taj. 10Eh je' wili i xuq'or weh i Dios: Re' hat rak'uun winaq chab'iraj chu'nchel i nuk'uhb'aal naa nuq'orom aweh, eh chamol panawánima. 11Eh hiy chi kixilak aatinamiit Israel re' i xi k'amarik reje pan tokoom tinamit, ar cha q'or keh i nuk'uhb'aal atoob' ta neenkinimaj, atoob' ta ma' neenkinimaj, inki. 12Eh re' i ruxlab'al i Dios x-uksanik weh, eh chi wiij jinaj i kowlaj q'orik xb'aan chaloq, xa je' chik kowlaj yihk je' wili xuq'or: Xwuktik chaloq paruye'aab' i ruloq'il i QaJaaw, inki. 13Eh re' i choqik re' re', re' b'ila' chik i kixiik' i kijib' chi k'achaach imb'anik re' noq k'ul i ruq'oj riib' i kixiik'. Eh re' i kijib' chi kotokaq b'ehik wo' rub'an haa' kuuk', eh yohb'aal wach i choqik xkian. 14Xiruk'am b'ila' reje i Ruxlab'al i Dios, re' hin ti' ti' i nuk'ux noq xinooj, eh k'ahchi' i nuk'aah. Eh re' i QaJaaw xakow b'ila' chik xiruchop ruuk' q'ab'. 15Eh re' hin ximponik wo' kuuk' i aj Israel k'amooj taqe reje pan tokoom tinamit patim taqe ar Tel-Abib chi chii' i nim ha' Kebar, wuquub' q'iij xintzuhnik chi kixilak chi sachlik nuk'ux. 16Eh paruwuuq q'iij xiruq'o'reej i QaJaaw je' wili i xuq'or weh: 17Re' hat rak'uun winaq re' hat xnusik' chawach chi naa acha'jeem i nutinamiit Israel. Noq naa ab'iram i nuk'uhb'aal, ruuk' i re' naa akojom kina'ojb'al. 18Noq naa nuq'orom chi naa rukimiik i yiib' wach runa'ojb'al. Re' hat naa aq'orom reh chi nee rukanaa' rub'aan i yiib' wach na'ojb'al, chi je' re' neeruko'leej riij i ruk'achariik. Eh wila' re' hat ma' xaq'il chub'aan, korehtaal-oq xkimik chub'aan, re' hat naa kaat nuye'em chutojariik riij i ru mahk. 19Eh raaj wila' re' hat xaq'or reh i yiib' wach runa'ojb'al chi chukanaa' rub'aan, eh wila' ma' xukanaa' rub'aan, xa chi rib'il riib' naa rukimiik ruum i ru mahk, eh re' hat naa ako'leem riij aak'achariik 20Eh wila' re' i korik wach ruk'ux nee wo' chik i rub'an i yiib' wach na'ojb'al, eh xnuyeew-oq q'ab' i hin chi neeruq'eb' riib' re' re' naa rukanteesjiik. Eh mo'-oq xaq'il chub'aan, korehtaal-oq xkimik parumahk, re' hin ma' naa ta nukojom paruman i holohik rub'anam chaloq. Eh re' hat naa kaat nuye'em chutojariik riij i rukimiik. 21Eh wila' re' hat xaq'or reh i korik wach ruk'ux chi maa rub'an chik i mahk, wila' xunimaj i ruq'ilariik neena a'n ma' naa ta rukimiik. Eh re' hat nee inako'leej riij ak'achariik, inki weh i Dios. 22Eh chupaam i ye'aab' re' re' xuyeew i q'ab' chi nunaah i QaJaaw Dios, je' wili i xuq'or weh: Wukteen reje hiy wach k'ixkaab' ar neenuq'or aweh chib'ih i naa a'nam, inki. 23Re' hin xinooj wo' wach k'ixkaab', ar xwilow wach i runimaal i ruloq'il i Dios, je' rukab' i ruloq'il xwilow cho chi chii' i nim ha' Kebar. Re' hin xnupach'aa' wiib' korehtaal rutz'aj wach aak'al i yejal nuwach. 24Eh re' i rajaawriik i Dios xokik wuuk' xirupab'aa' johtoq. Chi riij i re' je' wili i xuq'or weh i Dios: Yu'naak hiy panapaat neenatz'ap awiib' ar. 25Re' hat rak'uun winaq je' naa kaat kib'ak'am ruuk' k'ahaam, ma' naa ta chik kiye'em q'ab' aweh chi naa awihiik chi kixilak i tinamit. 26Eh re' hin naa nuye'em q'ab' chi naa ruchopom riib' aawaaq' pan ajahaay naa akahniik chi hat meem reh chi ma' naa ta chik a'nam kiq'ilariik i tinamit. Ruum re' keh xama' kinimanik ta wo' hoq. 27Xa re' la' noq naa kaat nuq'oreem i hin naa wo' chik nuye'em aq'oral. Eh naa aq'orom i nuk'uhb'aal keh i tinamit, awach i naa rajwaam rib'irjiik naa wo' rib'iram, awach i ma' naa ta rajwaam rib'irjiik xama' naa ta wo' rib'iram. Ruum re' i tinamit re' re' xama' kinimanik ta wo' hoq.

will be added

X\