EXODO 9

1Eh re' i QaJaaw Dios je' wili i xuq'or reh i Moisés: Hiy wo' chik ruuk' i reey, je' wili i cha q'or reh: Re' QaJaaw Dios ki Dios i aj hebreo je' wili i xuq'or chawiij: Chuyeew q'ab' keh i nutinamiit Israel chi nee kinooj kiloq'ej. 2Eh wila' ma' xuyeew wo' chik q'ab' chi nee kiooj i nutinamiit. 3Re' hin naa nuk'uhtaam i wajaawriik chikinaah i ruchikoop wilkeeb' panab'iix. Jinaj i yiib' wach yab'ilaal naa nuye'em, naa kikimiik i kikawayu, i kib'uruux, kicameyo, i kitentzuun, i kiwakax. 4Eh xa re' wo' kichikoop i aj Egipto naa nukansam ruuk' i yab'ilaal re' re'. Eh re' i kichikoop i nutinamiit Israel ma' jino'q i naa nukansam, inki QaJaaw Dios, tiko'q reh. 5Re' QaJaaw Dios xama' najt ta chik i xuq'at: je' wili i xuq'or: Re' wili xa i iqal i nub'an, inki. 6Eh re' QaJaaw Dios xub'an wo' chi junwaar, chu'nchel i kichikoop i aj Egipto xkuxik wo' kikimiik. Eh re' i kichikoop i aj Israel ma' jino'q wo' hoq i xikimik. 7Re' reey xutaq'aaj rilariik i kichikoop i aj Israel mix kimik, eh xk'ulik q'oraroq reh chi ma' jino'q i xkimik. Atoob' ta chi xrib'iraj chi je' re' i reey xukowb'isaj wo' chik i ránima xama' xutaq'aaj ta wo' taqe i aj Israel. 8Re' QaJaaw Dios je' wili i xuq'or reh i Moisés, ruch'ihil i Aarón: Chamohq'eej taq cho jumohq'-oq i chaaj wilik chupaam jino'q i horna, neerukut taxaaj i Moisés chuwach i reey. 9Eh re' chaaj naa rupuk'iniik chikinaah chu'nchel i tinamit Egipto eh ruum i re' naa rupoq'iik chaloq i jinaj ye'b'eewach q'aah chikiij chu'nchel i tinamit, je' wo' chikiij i chikop wilkeeb' paruyuq'ul i Egipto, inki. 10Re' i Moisés, i Aarón xponik wo' kimohq'eej i chaaj chupaam i jinaj i horna xiooj wo' chik ruuk' i reey, ar xupukej johtoq i chaaj pan taxaaj i Moisés. Eh ruum i re' xa chi jumehq'iil xpoq' chaloq i yiib' wach q'aah chikiij i tinamit, chikiij i chikop. 11Eh re' taqe i aj q'iijineel wilkeeb' ar Egipto ma' xkian ta chik rub'aan i keh i xub'an i Moisés. Ruum xnujik chi q'aah i kiij i keh, je' rukab' i xpoq' chikiij chi kunchelaal i aj Egipto. 12Re' QaJaaw Dios xukowb'isaj wo' chik ránima i reey, reh chi ma' xunimaj taj i xuq'or i Moisés, i Aarón je' rukab' i xuq'or i Dios reh i Moisés. 13Chi riij i re' je' wili i xuq'or i QaJaaw Dios reh i Moisés: Iqal kowahq'eq naa awuktiik, naa wo' chik awojiik ruuk' i reey neenaq'or reh chi re' hin i kiDios i aj hebreo kinq'orik reh chi chuyeew q'ab' keh i nutinamiit Israel chi nee kinooj kiloq'ej. 14Ruum wi ma' xutaq'aaj taqe, re' hin naa nuye'em i ti' k'axik chinaah i reh, chikinaah i kikamanik ruuk', chikinaah i rutinamiit. Chi je' re' naa runab'eem chi re' hin i Dios, eh chi ma' awach ta chik jino'q chi je' nukab' i hin chinaah i wach ak'al. 15Re' hin xa xub'an wo' naq chi xnuyeew i ti' k'axik chinaah i reh, chikinaah i rutinamiit, eh kuxik naq chik kikimiik yu'naak ma' nilarik ta naq chik kiwach chinaah i wach ak'al. 16Eh re' hin ma' xat nukansaj taj reh naq chi naa akojom rehtaal i wajaawriik. Re' naq inwaaj i hin chi naa ruq'orariik wib'iral chi junsuut i wach ak'al. 17Atoob' ta inuketelaaj wach, re' reh xama' ruyeew ta wo' q'ab' chi kiooj i nutinamiit chi nulooq'jiik. 18Re' hin i iqal je' yu' ora naa nuye'em i runimaal saqb'och xiik' naah kininqaal ma' jank'al ta inqajik i kitoq'aam cho k'acharik i aj Egipto. 19Yu'naak hiy chamol taqe i aachikoop, chu'nchel i chib'ih aweh wilkeeb' panab'iix. Ruum re' saqb'och noq naa ruqajiik chaloq naa rukansam taqe nik' nimaal i ma' naa ta rumolariik pampaat, chi tinamit, chi chikop, inki i Dios, inki Moisés. 20Eh wilik wo' taqe i kikamanik ruuk' i reey xchalik kiyo'jiik ruum i xuq'or i QaJaaw Dios. Ruum i re' xkimol pampaat taqe i kimoso, taqe i kichikoop. 21Wilik wo' taqe i ma' xkinimaj taj i xuq'or i QaJaaw, ma' xkimol taj pampaat i kimoso, je' wo' taqe i kichikoop. 22Re' i QaJaaw Dios je' wili i xuq'or reh i Moisés: Chajosaj aq'ab' pan taxaaj reh chi neenqajik chee ma' k'isa saqb'och chinaah i tinamit Egipto, je' chikinaah i tinamit, chikinaah i kichikoop, chikinaah i kitik wilik paruyuq'ul i Egipto. 23Eh re' i Moisés xujosaj wo' johtoq i q'ab' pan taxaaj, eh re' QaJaaw Dios xuyeew chaloq i ruch'aab' kahoq, xan teleninik chik, xuyeew wo' chaloq i ma' k'isa saqb'och chinaah i wach ak'al, eh xa saqrajik chik chupaam chu'nchel i tinamit Egipto. 24Re' i ma' k'isa saqb'och xantilik chik chaloq, eh xan teleninik chik i kahoq, eh yohb'aal wach i ruch'aab'. Eh ma' jank'al tanqajik i runimaal saqb'och je' rukab' i re' i kitoq'aam cho k'acharik i aj Egipto. 25Re' i runimaal saqb'och, xusachib'eej kiwach chu'nchel i xa chib'ih jariik wilkeeb' paruyuq'ul i Egipto. Wilik taqe i tinamit, wilik taqe i chikop xusach kiwach, xusach wo' kiwach i tik, xutoqib'eej taqe i q'ab' i chee' wilkeeb' paruyuq'ul i Egipto. 26Eh chupaam i ye'aab' Gosén, re' patim taqe wii' i aj Israel, chupaam i q'iij re' re' ma' jino'q chi naq'wach i saqb'och xqajik ar. 27Eh re' i reey xutaq'aaj ruk'amariik i Moisés, i Aarón, je' wili xuq'or keh: Re' hin wilik numahk ruch'ihil i nutinamiit, ma' re' tee Dios wilik ru mahk chi k'ahchi' qak'ulum i wili. 28Xti ma' k'isiin wo' chik i kahoq, i saqb'och k'ahchi' ruqajiik. Chapahqaaj taq reh i Dios chi nee rumay. Re' hin naa nuye'em q'ab' chi nee taq tiooj i hat, hat taq aj Israel, inki 29Eh re' i Moisés je' wili i xuq'or reh i reey: Xa re' wach noq nee kinelik reje chupaam aatinamiit wili nee nujosaj johtoq i nuq'ab' chub'anariik i nutiij chuwach i QaJaaw Dios, neerumay i saqb'och, i kahoq, reh chi nee nawil chi re' chu'nchel i wilik wach ak'al re' QaJaaw Dios inehchanik reh. 30Re' hin weht'al atoob' ta k'ahchi' taq ak'ulum taqe re', xama' nayohleej ta wo' i Dios i hat, je' wo' taqe i kikamanik awuuk'. 31Re' taqe i lino atikim taq k'ahchi' naq chik rixmak'iniik, eh re' i sebada k'ahchi' naq. 32Eh re' trigo, i centeno ma' xsahchik ta kiwach nee wo' chik kitoxliniik chaloq ruum kokok' taq taqe, inki. 33Eh re' i Moisés xelik chaloq ruuk' i reey, noq xelik cho chupaam i tinamit re' re' xujosaj johtoq i q'ab' chuwach i QaJaaw Dios chub'aan i rutiij. Xa chi jumehq'iil xumay i saqb'och, xumay i jab', je' wo' hoq i ma' k'isa kahoq. 34Noq xrilow i reey chi xumay i saqb'och i jab', je' wo' ma' k'isa kahoq, xub'an wo' chik i mahk. Xukowb'isaj wo' chik i ránima i reh, eh je' wo' taqe i kikamanik ruuk'. 35Eh re' i reey xukowb'isaj wo' chik i ránima, xama' xutaq'aaj ta wo' chaloq taqe i aj Israel, je' rukab' i xuq'or i QaJaaw Dios pampeet reh i Moisés.

will be added

X\