EXODO 40

1Eh re' QaJaaw Dios je' wili i xuq'or reh i Moisés: 2Chupaam i peet q'iij ree poh, naa aye'em paruye'aab' i santo laj itz'ihy naah paat, je' wo' hoq i santo laj itz'ihy naah paat molb'al iib'. 3Eh ar nee nayeew i loq'laj kaxa molik wii' i ki'ib' chi tz'ilom ab'aj tz'ihb'amaj wii' i nulajeeb' k'uhb'aal, eh nee nab'ur wach ruuk' i itz'ihy. 4Nee wo' nayeew ar i k'isa mexa, ruch'ihil i ye'aab' kantela, neenayejaa' chi korik paruye'aab'. Neenayeew ar i ye'aab' kantela, eh nee naqop taqe i saqumb'al. 5Eh nee wo' nayeew ar i artaal oro, k'atb'al reh i insensia, chuwach reje i loq'laj kaxa molik wii' taqe i nuk'uhb'aal nee nayeew. Eh nee wo' nahe' reje wach i nimlaj itz'ihy panookb'al reh i santo laj itz'ihy naah paat naa nulooq'jiik wii' i hin. 6Eh re' i artaal i naakik'atariik wii' i chikop naakiye'ariik chi mayiij ar nee nayeew reje chuwach i ookb'al reh i santo laj itz'ihy naah paat molb'al iib'. 7Eh re' i tuq'aab' ha' naa aye'em ha' chupaam, ar naa aye'em panookb'al chi xilak i artaal ruuk' i santo laj itz'ihy naah paat molb'al iib'. 8Chi riij i re' nee wo' inasutej riij chi itz'ihy i tehlik chi junsuut i paat i naa nulooq'jiik wii'. Eh nee wo' nahe' reje i nimlaj itz'ihy panookb'al reh i tehlik. 9Eh neenachop chaloq i aseite reh kuxesb'al, neenajalk'iij chinaah i santo laj itz'ihy naah paat, chikinaah chu'nchel i aye'em chupaam. Je' re' rukuxeesjiik naa a'nam ruch'ihil taqe i xa chib'ih jariik naa rukamaniik chupaam, reh chi neenkahnik chi wilik kisantohiil. 10Eh nee wo' naajalk'iij i aseite chinaah i artaal i naakik'atariik wii' i chikop chi mayiij. Je' wo' chikinaah chu'nchel i xa chib'ih jariik inkamanik ar, je' re' i kikuxesjiik naa a'nam, chi je' re' neenkahnik chi wilik ruSantohiil i artaal. 11Eh nee wo' naajalk'iij aseite chinaah i tuq'aab' ha', je' wo' i ch'ikaab' reh, je' re' i rukuxeesjiik naa a'nam. 12Chi riij i re' nee nak'am reje i Aarón, ruch'ihil taqe i rak'uun chi chii' i ookb'al reh i santo laj itz'ihy naah paat molb'al iib', neenaq'or keh chi neenkian kitiin. 13Eh nee nakoj chi riij i ruloq'laj so' i Aarón. Eh neenajalk'iij aseite wach naah reh rukuxeesjiik, chi je' re' neenkahnik chi k'amal b'eeh aj tiij panukamaj. 14Eh nee wo' nayuq'eej taqe awuuk' i rak'uun, reh chi nee nakoj keh i kinimaq rooq so'. 15Eh nee wo' najalk'iij i aseite chikinaah i keh kuxesb'al keh, je' wo' rukab' i naa a'nam reh i kajaaw, reh chi nee wo' kikahnik chi k'amal kib'eeh aj tiij i keh, rehtalil chi naa kikahniik chi k'amal kib'eeh aj tiij kiih kimaam, inki Dios. 16Eh re' i Moisés xub'an wo' chu'nchel i xti je' rukab' i xq'orarik reh ruum i QaJaaw Dios. 17Eh noq xuk'am rub'eeh i peet poh reh i rukab' haab' keliik cho Egipto, xkich'ikaa' wo' paruye'aab' i santo laj itz'ihy naah paat. 18Re' i Moisés xuch'ikaa' paruye'aab' i santo laj itz'ihy naah paat, xuyejaa' taqe i ch'ikaab' reh, xutus kiwach i tz'ilom paruye'aab', xukoj i chee' reh ruq'e'liik, eh xupab'aa' wo' taqe i pilalix, xkihe' wii' wach i itz'ihy. 19Xuhe' wach i nimlaj itz'ihy chinaah i santo laj itz'ihy naah paat, eh xub'ur wo' naah, chi holohik laj tz'uhuum, je' rukab' i xq'orarik reh i Moisés ruum i QaJaaw Dios. 20Eh xuyeew chupaam i loq'laj kaxa i ki'ib' chi tz'ilom ab'aj i tz'ihb'amaj wii' i lajeeb' k'uhb'aal. Eh xukoj i tz'apb'al naah i loq'laj kaxa, eh kikoj i ki'ib' chib'olob'aq chee' k'amb'al reje reh. 21Eh xuk'am reje i loq'laj kaxa chupaam i santo laj itz'ihy naah paat. Eh xukoj wo' i nimlaj itz'ihy chib'urb'al wach i loq'laj kaxa, je' rukab' i xq'orarik reh i Moisés ruum i QaJaaw Dios. 22Eh xukoj i koq i k'isa mexa chupaam i santo laj itz'ihy naah paat molb'al iib', pantz'eet reje reh i rookb'aal i q'iij chuwach reje i nimlaj itz'ihy tasb'al. 23Eh kochuwach i koq inkiloq'ej wii' Dios ar kitus wach i kaxlanwi'k chinaah i k'isa mexa. Xub'an wo' hoq i Moisés je' rukab' i xq'orarik reh ruum i QaJaaw Dios. 24Chucheel i k'isa mexa xuyeew i koq i ye'aab' kantela, pansak'aaj reh i rookb'aal i q'iij, pansak'aaj reh itz'ihy tasb'al paam i santo laj itz'ihy naah paat molb'al iib'. 25Chi riij i re' xuqop taqe i saqumb'al kochuwach i koq inlooq'jik wii' i QaJaaw Dios. 26Eh re' i artaal oro, xuyeew wo' i koq chupaam i santo laj itz'ihy naah paat molb'al iib', chuwach reje itz'ihy tasb'al. 27Xuk'at insensia q'e' ink'ohnik chinaah i artaal, xub'an wo' hoq i Moisés je' rukab' i xq'orarik reh ruum i QaJaaw Dios. 28Eh re' i Moisés xuhe' reje wach i nimlaj itz'ihy panookb'al reh i santo laj itz'ihy naah paat. 29Eh panookb'al reh i rusanto laj itz'ihy naah paat i Dios je' wo' hoq i santo laj itz'ihy naah paat molb'al iib' xuyeew i artaal i kik'atarik wii' i chikop chi mayiij. Ar xuk'at taqe i chikop chi mayiij, je' wo' taqe i mayiij xa chi naq'wach, je' rukab' i xq'orarik reh i Moisés ruum QaJaaw Dios. 30Eh re' tuq'aab' ha' ar xuyeew panyejaal i artaal ruuk' i santo laj itz'ihy naah paat molb'al iib', eh xunujisaj chi ha' reh tz'ajb'al iib'. 31Chupaam i tuq'aab' ha', xuk'am ruhaa' i Moisés, je' wo' hoq i Aarón ruch'ihil taqe i rak'uun reh tz'ajb'al kiq'ab', eh tz'ajb'al kooq. 32Re' keh inkitz'aj kiib' noq kiokik i koq chupaam i santo laj itz'ihy naah paat molb'al iib'. Je' wo' hoq noq kiokik i koq chuwach i artaal, xkian wo' hoq je' rukab' i xq'orarik reh i Moisés ruum i QaJaaw Dios. 33Eh pantz'apaab' wach, re' i Moisés xukoj reje i itz'ihy chinaah i tehlik wilik chi junsuut i santo laj itz'ihy naah paat, eh chi junsuut i artaal xukoj reje itz'ihy panookb'al reh i tehlik re' re'. Je' re' noq xukohlaaj taqe i kamanik re' re' i Moisés 34Chi riij i re' xqajik chaloq i suutz' chinaah i santo laj itz'ihy naah paat molb'al iib', eh xnujik i ruloq'il i QaJaaw Dios chupaam. 35Eh re' i Moisés ma' rub'an ta i koq ookik chupaam i santo laj itz'ihy naah paat re' re', ruum xmuhqik naah chi suutz', eh xnujik wo' hoq chi ruloq'il i Dios. 36Noq i nelik i suutz' chinaah i santo laj itz'ihy naah paat, re' taqe i aj Israel inkuksaj chaloq i ki-itz'ihy naah paat inkichop wo' chik cho kib'eeh. 37Eh noq ma' nelik taj i suutz' chinaah i itz'ihy naah paat, re' keh ma' nkuksaj ta chaloq i ki-itz'ihy naah paat, Konkuy-eej chi nelik i suutz'. 38Eh pan q'iij re' QaJaaw Dios suutz' i rutaq'aaj cho chikinaah i aj Israel, eh chaq'ab' q'aaq' i rutaq'aaj cho chikinaah. Re' taqe i re' xk'amwik cho kib'eeh nik' najtiil xib'ehik chaloq chupaam i ye'aab' chiq yuuq' korehtaal xi k'ulik.

will be added

X\