EXODO 31

1Re' QaJaaw Dios je' wili i xuq'or reh i Moisés: 2Chab'iraj i naa nuq'orom aweh, re' hin chi kixilak i junch'uq chi riih rumaam i Judá, xnusik' cho wach i Bezaleel rak'uun i Uri, riih i Hur. 3Eh xnuyeew reh i Santolaj Wuxlab'al, xnuyeew runa'ojb'al, xnuyeew reh i holohik laj kapeew, xnuk'uhtaaj reh chib'ih taqe i naa rub'anam, eh chi wilik taqe i kamanik naa rucholiik rub'aan. 4Re' Bezaleel, naa rub'anam ruyejeb'jiik i xa chib'ih jariik ruuk' oro, ruuk' plata, ruuk' q'an ch'ihch'. 5Eh neerub'an ruyejeb'jiik i xa chib'ih jariik ruuk' ab'aj, ruuk' chee' neerusehkaaj wach. Nee wo' nchol rub'aan chu'nchel i kamanik. 6Re' hin xnukoj chi to'ool reh i Aholiab, rak'uun i Ahisamac inchalik paruyuq'ul i Dan. Chu'nchel i wilik kina'ojb'al xnuyeew ruman i kina'ojb'al, reh chi neenkian rub'aan taqe i kamanik xnuq'or aweh. 7Re' taqe i wili naa kiyejaam: Re' i nuSantolaj itz'ihy naah paat molb'al iib', re' loq'laj kaxa naa rumoliik wii' i k'uhb'aal, re' tz'apb'al naah. Re' chu'nchel i xa chib'ih jariik i naakikamaniik ar. 8Re' i k'isa mexa ye'aab' kaxlanwi'k, re' taqe i xa chib'ih jariik i naakikamaniik chinaah, re' i ye'aab' kantela re' ruuk' i manlik oro, re' taqe i xa chib'ih jariik i naa rukamaniik reh i re', re' i artaal naa ruk'atariik wii' insensia. 9Re' i artaal naa ruk'atariik wii' taqe i mayiij, re' taqe i xa chib'ih jariik naa rukamaniik ar, re' tuq'aab' ha' re' ruuk' q'an ch'ihch', eh re' ch'ikaab' reh. 10Re' taqe i kemooj itz'ihy, re' i rusik'ooj wach so' i k'amal b'eeh aj tiij Aarón, re' kiso' i rak'uun, re' naa kikojom noq naa kianam i kikamaj chi k'amal b'eeh aj tiij taqe. 11Re' i aseite naa rukamaniik chi kuxesb'al, re' insensia xiik' naah k'ohnkiil noq naa ruk'ahtiik chupaam i nupaat. Eh re' taqe i wilik kina'ojb'al re' re', naakiye'janiik reh chu'nchel i re', eh nik' wach i xnuq'or aweh je' wo' re' rub'aan naa kianam, inki. 12Re' QaJaaw Dios je' wili i xuq'or reh i Moisés: 13Re' hat je' wili i naa aq'orom keh i aj Israel: Re' QaJaaw Dios je' wili i xuq'or: Re' keh koruman chi naa kimolom i hi'limb'al q'iij. Ruum re' i re' naa rukahniik chi rehtalil chikiwach i keh, chi nuwach i hin, chikiwach i kiih kimaam chi re' hin i Dios kinye'wik kisantohiil. 14Re' i hi'limb'al q'iij q'e' looq' chi kekeh, inchol kimolom. Eh awach i ma' xumol i q'iij re' re', naa ruq'atariik i q'orik chinaah, reh i rukanteesjiik. Awach i xkamanik chupaam i q'iij re' re', naa rehtesjiik chi kixilak i rutinamiit. 15Manlik waqiib' q'iij naakikamaniik, eh re' i ruwuuq q'iij naakihi'lisam, re' i kanamaj chi hi'limb'al q'iij. Eh wii awach i xkamanik pan hi'limb'al q'iij naa ruq'atariik i q'orik chinaah reh i rukanteesjiik. 16Je' re' noq re' taqe i aj Israel inchol kimolom i hi'limb'al q'iij reh chi naa rukahniik chikinaah chi jinaj k'uhb'aal ma' naa ta chik rumahyiik rub'aan chi jumpech. 17Re' re' jinaj rehtalil chi juneliik chikiwach i aj Israel wuuk' i hin, ruum re' hin Ajaab'ees Dios waqiib' q'iij xnuyejaa' i taxaaj ruch'ihil i wach ak'al. Eh paruwuuq q'iij ma' xinkamanik ta chik, hi'lik chik i xnub'an, inki. 18Eh noq re' QaJaaw Dios xukohlaaj i q'orik ruuk' i Moisés chinaah i yuuq' Sinaí, xuq'asaj i ki'ib' chi tz'ilom ab'aj reh i Moisés, re' i xutz'ihb'aaj wii' taqe i k'uhb'aal i Dios ruuk' i ju' q'ab'.

will be added

X\