EXODO 29

1Re' hat je' wili i naa a'nam, naa akuxisam taqe reh chi nee kikahnik chi k'amal kib'eeh aj tiij chub'aan i nukamaj. Nee nak'am cho jino'q i k'isa k'ijol wakax, ki'ib'-oq imas tentzun, i manlik wach ruti'jolal. 2Eh nee nak'am taqe chaloq i kaxlanwi'k ma' kojooj ta ch'amb'esb'al reh, taqe i kaxlanwi'k q'e' suq ma' kojooj ta ch'amb'esb'al reh. Neenak'am chaloq i kotokaq kaxlanwi'k i chihooj laj trigo korjinaq wii', eh naakik'teesjiik pan aseite. 3Re' taqe re' nee nayeew pan jino'q k'isa chakach junq'ahteesjiik naa a'nam chi amayiij ruuk' i k'isa imas wakax, i ki'ib' chi imas tentzun. 4Eh nee nak'am chaloq i Aarón ruch'ihil taqe rak'uun chi chii' i ru puertahiil i nuSantolaj itz'ihy naah paat molb'al iib', cha q'or keh chi ki a'n kitiin. 5Eh nee nakoj i ruso' re' ruuk' inkikoj i k'amal b'eeh aj tiij, chakoj chi riij i Aarón i runim rooq so', i ru k'isiin rooq so', i ruso' xa naa rutak'aam chi riij i ru k'isiin rooq so', ruch'ihil i reh chi' rik'ux kow chab'ak' ruuk' i b'ak'b'al reh i ru k'isiin rooq so'. 6Nee nakoj i rutak'aa' wach naah, eh chuwach i re', nee nakoj i k'isa perepik ch'ihch' re' ruuk' i manlik oro, re' i neenk'uhtanik reh chi wilik rusantohiil. 7Eh nee nak'am chaloq i aseite kuxesb'al, neenachihkaaj wach naah i Aarón reh chi neenakuxisaj, reh chi neenkahnik chi k'amal b'eeh aj tiij. 8Nee wo' naq'or keh i rak'uun chi kijil i koq kiib', eh nee nakoj i kinimaq rooq so' i keh. 9Re' Aarón, re' taqe i rak'uun, neenab'ak' i kipaam chi kow, eh naa akojom chi korik i naa rutahkiik wach kinaah. Chi je' re' nee nayeew kajaawriik chi k'amal b'eeh aj tiij taqe chi juneliik, re' wili jinaj k'uhb'aal, ma' naa ta chik rusahchiik wach. 10Eh nee nak'am i koq i k'isa imas wakax ko chupaam i koq i nuSantolaj itz'ihy naah paat molb'al iib'. Reh chi re' Aarón, re' taqe i rak'uun, ar neen kiyeew i kiq'ab' chinaah i chikop re' re'. 11Re' hat ar naa akansam i k'isa imas wakax chi nuwach i hin, hin Dios chi chii' i ru puertahiil i nuSantolaj itz'ihy naah paat molb'al iib'. 12Re' hat nee nak'am cho ruuk' i ju' aq'ab' i rukik'eel i k'isa imas wakax, nee nach'ulej chuwach taqe ruk'aa' i artaal. Eh re' i kik' neenqohxanik neenachihkaaj i koq waraa' artaal. 13Eh naa awesam i q'ina' chuwach i req'saa' i chikop re' re', je' wo' hoq i q'ina' wilik chuwach i rutamaat, i q'ina' wilik chikiwach i kab'chel i rukinaq'iil i paam. Re' taqe i re' neenak'at chuwach i artaal. 14Eh re' rutib'kal, eh re' rusaa', eh re' i riij i k'isa imas wakax, chi riij i itz'ihy naah paat naa ak'atam reje. Ruum re' taqe re' chi riij i mahk ink'atarik chi mayiij. 15Neenak'am chaloq jinaj keh i ki'ib' chi imas tentzun, reh chi re' Aarón, re' taqe i rak'uun neen kiyeew i kiq'ab' wach naah i chikop re' re'. 16Chi riij i re' nee nakansaj, eh re' rukik'eel neenachihkaaj chinaah i artaal, eh nee wo' i naa chihkaaj chi junsuut i artaal. 17Chi riij i re' neenawetz' i ruti'jolal, je' wo' taqe i rooq, nee wo' natz'aj kiwach taqe i req'saa' eh jinaj nee nayeew wii' ruuk' i naah. 18Eh nee wo' nak'at i imas tentzun re' re' chi mayiij chuwach i artaal, ye'b'al nuloq'il i hin, hin Dios, re' mayiij q'e' ink'ohnik. 19Chi riij i re', nee wo' chik i nak'am chaloq i imas tentzun jinaj, re' Aarón re' taqe i rak'uun neen kiyeew i kiq'ab' wach naah. 20Neenakansaj i imas tentzun re' re', eh nee nakoj k'isinoq i rukik'eel chi raa' i rusak'aaj xikin i Aarón, je' wo' taqe i raa' i rusak'aaj i kixikin i rak'uun. Eh nee wo' nakoj chusak'aaj i rumaam kiq'ab', je' wo' chusak'aaj i rumaam kooq, re' i ruqox i kik' neenachihkaaj chinaah i artaal, eh chi junsuut i artaal. 21Re' kik' nee nayeew chuwach i artaal ruch'ihil aseite, kuxesb'al, neenakihraaj wach naah i Aarón, je' wo' chinaah i ruso'. Eh nee wo' nakihraaj chikinaah taqe i rak'uun, je' wo' chinaah i kiso' i keh. Chi je' re', neenakuxisaj i Aarón, je' wo' taqe i rak'uun, nee wo' inakuxisaj i kiso' reh chi nee kikahnik chi kuxisamaj taqe. 22Eh neenawesaj i ruq'ina'iil wilik raa' rujeeh imas tentzun, i q'ina' wilik chuwach taqe i req'saa', i q'ina' wilik chuwach i rutamaat, i wilik chikiwach i kab'chel i rukinaq'iil paam. Eh nee wo' nawesaj i q'ina' wilik chuwach i rusak'aaj rutuuq, ruum re' imas tentzun re' re', naa rukamaniik chi kuxesb'al keh i k'amal kib'eeh aj tiij. 23Eh re' taqe i kaxlanwi'k ma' kojooj ta ch'amb'esb'al reh naa aye'em pank'isa chakach chi nuwach i hin, hin Dios, nee nak'am chaloq jino'q i kaxlanwi'k re' ruuk' i kotokik, je' wo' hoq i kaxlanwi'k xilakimaj aseite ruuk', eh jinaj i kaxlanwi'k ma' piim taj. 24Chu'nchel i re' nee naq'asaj pan q'ab' aawas Aarón, nee wo' naaq'asaj pan kiq'ab' i rak'uun, re' keh neenkiq'asaj chi mayiij chi nuwach i hin, hin Dios. 25Eh nee wo' chik i nak'am keh i mayiij nee taqe nak'at chuwach i artaal ruch'ihil taqe i mayiij junch'uq, eh re' taqe re' q'e' ink'ohnik laj mayiij inwik'raaj i hin, hin Dios. Re' taqe i mayiij re' re' naa ak'atam chi ye'b'al nuloq'il i hin. 26Re' neenakuxisaj wii' i Aarón, nee nak'am chaloq i chi' rik'ux i rak'uun imas tentzun, eh nee naq'asaj chi mayiij chi nuwach i hin, hin Dios, re' tiwik re' re' hat naa ak'uxwiik reh. 27Eh pareh naa aye'em i chi' ruk'ux imas tentzun, pareh naa aye'em i rutuuq, je' wo' hoq i ruti'jolal re' i naa ruye'ariik chi q'e' chihooj laj mayiij. Re' taqe tiwik re' re', re' Aarón, re' taqe rak'uun naakik'uxwiik reh. 28Re' taqe i wili naa rub'aan ruuk' i Aarón, kuuk' taqe i rak'uun, eh naa rukahniik chi jinaj k'uhb'aal chikinaah i aj Israel. Re' taqe i mayiij re' re' xa pankik'ux i aj Israel naa ruchaliik chi naakiye'em chi kitoob'aal. Re' i mayiij re' re', re' naa ruk'amwiik taq aweh panotob'il wuuk' i hin. 29Re' taqe i ruso' i Aarón wilik ruloq'il, naa rukahniik keh taqe i riih rumaam. Re' noq naa rukuxeesjiik i kiso', naa wo' kik'ulum i kajaawriik chi naa kikahniik chi k'amal b'eeh aj tiij taqe chub'anariik i nukamaj. 30Re' taqe i riih rumaam i Aarón naa kikahniik chi k'amal b'eeh aj tiij, koq'uun chi jilow. Eh noq naakokiik chupaam i nuSantolaj itz'ihy naah paat molb'al iib', chuq'ahteesjiik i mayiij wuquub' q'iij, naa kikojom i kiso' re' re'. 31Chi riij i re', nee nak'am chaloq imas tentzun re' i naa akojom chi mayiij neenachaq'saj i rutib'kal chupaam jino'q i ye'aab' q'e' looq'. 32Re' Aarón ruch'ihil taqe rak'uun, naakik'uxwiik reh i rutib'kal i imas tentzun re' re', je' wo' hoq i kaxlanwi'k naa ruwihiik pank'isa chakach naa ruwihiik panelb'aal reh i nuSantolaj itz'ihy naah paat molb'al iib'. 33Re' keh naakik'uxwiik reh taqe re', ruum naa ruq'ahteesjiik chi mayiij chi riij i kimahk. Eh noq kikuxeesjik ruuk' taqe re' naakik'ulum i kajaawriik, chi k'amal b'eeh aj tiij taqe. Eh ma' jino'q i tokoom naa ruk'uxwiik reh taqe re' ruum wilik kisantohiil. 34Eh wila' ko wilik i kaxlanwi'k, oon tiwik naa ruqohxaniik reh chi junwaar, i naakikuuxesjiik wii', inchol chi naa ak'atam chu'nchel. Ma' awach ta chik naa ruk'uxwiik reh, ruum re' taqe re' wilik kisantohiil. 35Eh re' hat, je' re' naa a'nam ruuk' i Aarón, je' wo' kuuk' taqe i rak'uun, re' q'oreel nik' wach taqe i xnuq'or aweh. Eh chuwach i wuquub' q'iij, naa akuxisam taqe noq naakik'ulum i kajaawriik. 36Eh chuwach i wuquub' q'iij re' re', ju'jun i kok' imas wakax naa akansam chi mayiij, reh chi neenkuyarik taqe i kimahk. Naa asaqb'isam wach i artaal, ruuk' i ruye'ariik i mayiij chi riij i mahk, naa ajalk'iim i aseite chinaah i artaal reh i rukuxeesjiik. 37Chuwach i wuquub' q'iij naa akansam i chikop naa aq'asam chuwach i artaal, chi riij i mahk. Eh naa akuxisam taqe reh i nukamaj, eh neenkahnik chi jinaj artaal wilik rusantohiil, chib'ih jariik i nenooj k'oloq chuwach i artaal, xanoq wo' naa rukahniik chi wilik rusantohiil. 38Re' hat rajlaal q'iij naa aq'asam wach artaal ki'ib' chi rak'uun tentzun, re' ruuk' i jinaj haab' wilik keh. 39Jinaj i naa aq'asam chi mayiij parujohtiik i q'iij, eh jinaj i naa aq'asam paruqajiik i q'iij. 40Eh noq nee naq'asaj chi mayiij i peet rak'uun tentzun nee nak'am chaloq jino'q k'isa chakach xti chihooj laj arina, eh nee naxilakeej ruuk' jino'q i nimlaj lemeta i aseite olivo, nee wo' inajalk'iij jino'q nimlaj lemeta i riis uuva. 41Je' wo' chik re' i neena a'n ruuk' i rak'uun tentzun nee naq'asaj chi mayiij paruqajiik i q'iij, nee wo' chik i naxilakeej aseite ruuk' i arina nee wo' naxilakeej i riis uuva ruuk' neenak'at chi mayiij chi nuwach i hin, hin Dios ruum re' re' imponik chi nuwach i hin. 42Re' k'atoj mayiij wili, naa aye'em chi ye'b'al nuloq'il panookb'al reh i nuSantolaj itz'ihy naah paat molb'al iib', re' naa kaat nuq'o'reem wii'. Ma' naa ta chik rumahyiik ruye'ariik naakiye'em ajaab'ees je' wo' taqe i kiih kimaam. 43Ar wo' naa nuwihiik kuuk' taqe i aj Israel, re' ye'aab' re' re' naa nukuxisam ruuk' i nuloq'il. 44Eh re' i nuSantolaj itz'ihy naah paat molb'al iib', naa nukuxisam, je' wo' hoq i artaal naa wo' nukuxisam. Eh naa wo' nukuxisam i Aarón ruch'ihil taqe i rak'uun reh chi nee kikahnik chi k'amal b'eeh aj tiij taqe chub'aan i nukamaj. 45Re' hin naa nuwihiik kuuk' i aj Israel, re' hin naa nukahniik chi ki Dios. 46Chi je' re', naa kinab'eem chi re' hin i kaJaaw i ki Dios, xineesanik cho keh ar Egipto, reh wo' chi naa nuwihiik kuuk' i hin, hin ki Dios.

will be added

X\