EXODO 26

1Eh naa ayejaam i nuSantolaj itz'ihy naah paat, naa ayejaam lajeeb'-oq itz'ihy, re' ruuk' i lino, raxmuqik, q'eqlumik ru kaqiil, kaq laj itz'ihy naa akojom reh. Eh naa ayejaam i je' kiwii' ánjel chuwach taqe itz'ihy re' re'. 2Eh re' taqe itz'ihy re' re', eliik kiwach naa a'nam kajlaj b'ara runimaal kooq, eh kiib' b'ara i runimaal kiwach naa a'nam. 3Eh re' ho'oob' chi itz'ihy re' re' naa atiqim kiwach, eh je' wo' chik re' i naa a'nam reh i ho'oob', eh nee nakoj chinaah i paat. 4Nee wo' nakoj i kok' hoop chi chii' itz'ihy, reh chi neenawik'saj chupaam i b'ak'b'al raxmuqik inka'yik. Chi chii' i peet tah reh i ho'tah chi itz'ihy nee nakoj, eh je' wo' chi chii' i tz'apaab' wach tah reh i ho'oob' chi itz'ihy. 5Nik' wach rub'aan naa a'nam i nimlaj itz'ihy chi juntar, je' wo' chik re' rub'aan naa a'nam i juntar. Eh nee nakoj lajeeb'-oq roxk'ahl chi kok' hoop chi kichii' k'ultar chel. 6Eh nee wo' nayejaa' lajeeb'-oq roxk'ahl chi loklok laj ch'ihch' re' ruuk' i oro reh chi nee nach'ilaa' taqe i chi chii' i nimlaj itz'ihy, je' wo' chi chii' i nimlaj itz'ihy chi juntar, reh chi k'ul nee ruk'ul riib' i chii', reh chi xa jinaj chik chuwii' noq neenk'utinik i nuSantolaj itz'ihy naah paat. 7Eh naa wo' ayejaam i junlaj chi itz'ihy, rismaal riij ixoq kaprax naa ayejaam wii', xa je' jinaj ruwii' neena a'n, reh chi manlik neerub'ur naah chu'nchel i nuSantolaj itz'ihy naah paat naa nulooq'jiik wii'. 8Re' taqe i junlaj chi itz'ihy re' re' eliik kiwach naa a'nam ho'lajuuj b'ara runimaal i kooq naa a'nam, eh ki'ib' b'ara runimaal kiwach naa a'nam. 9Ho'oob' i neenatiq wach chi juntar, eh chi juntar waqiib' i neenatiq wach chi juntar eh re' i chii' i ruwaaq inqohxanik neenab'us johtoq chi chii' i ookb'al reh i nuSantolaj itz'ihy naah paat. 10Nee wo' nayejaa' lajeeb'-oq roxk'ahl kok' hoop chi chii' i peet ho'tah chi kiwii' re' i nee ruk'ul wii' riib'. Eh nee wo' chik inakoj lajeeb'-oq roxk'ahl chi kok' hoop chi chii' i waqtah wach noq wilik, re' wo' nee ruk'ul wii' riib'. 11Eh nee wo' inayejaa' lajeeb'-oq roxk'ahl i loklok laj ch'ihch' re' ruuk' q'an ch'ihch', nee taqe inakoj chupaam i kok' hoop reh chi neeruk'ul riib' taqe i chii' itz'ihy, eh neenkahnik chi xa jinaj chik chuwii' i paat naa nulooq'jiik wii'. 12Ruum chi re' taqe itz'ihy naa akojom chi xam q'e' nimaq kooq i nee ruk'ul wii' riib' panyejaal k'ul naa rukahniik b'uslik qohoq i chii' itz'ihy k'isiin i chi riij, eh k'isiin i chuwach i santo laj itz'ihy naah paat. 13Eh re' i nuSantolaj itz'ihy naah paat naa aab'urum naah chi nimaq itz'ihy. Eh ko wilik itz'ihy naa ruqohxaniik kiib' k'itub' ruuk' kajq'ab' naa rukahniik b'uus chi juntar, eh je' wo' chik re' nimaal i naa rukahniik b'uus chi juntar. 14Eh kochinaah taqe itz'ihy re' re', naa akojom i rutz'uhmal i riij i imas tentzun, eh naa aawiq'omaam wach chi kaq laj iq'oom eh naa wo' akojom chinaah i q'e' holohik laj tz'uhuum. 15Naa wo' ayejaam taqe i tz'ilom re' ruuk' i chee' acacia, reh chi naa kikamanik chupaam i nuSantolaj itz'ihy naah paat, eh jiik wach rub'aan naa a'nam taqe. 16Re' taqe i tz'ilom re' re' kajkaj b'ara ruuk' ka'k'itub' i kooq naa a'nam, eh kijib' k'itub' ruuk' kajq'ab' i runinqaal kiwach naa a'nam. 17Eh naa akojom i kok' hoop pantaq kicheel i tz'ilom, kojb'al reh taqe i kok' chee' naakik'ulum wii' kiib'. Je' re' rub'aan naa a'nam chu'nchel i tz'ilom naa rukamaniik chupaam i nuSantolaj itz'ihy naah paat. 18Noq naa ayejaam taqe i tz'ilom re' re', juninaq i naa ayejaam reh pansak'aaj reje reh i rookb'aal q'iij. 19Eh ka'winaq i ch'ikaab' reh naa akojom taqe i tz'ilom re' re', eh re' ruuk' i plata naa akojom re' ju'jun chi tz'ilom ka'kab' i ch'ikaab' reh naa akojom reh chi ar neenkojarik i ki'ib' chi chopb'al reh i ju'jun. 20Je' wo' hoq i chi juntar i paam i santo laj itz'ihy naah paat, re' i pantz'eet reh ireelb'aalq'iij juninaq wo' tz'ilom naa ayejaam reh ar. 21Eh ka'winaq wo' ch'ikaab' reh re' ruuk' i plata naa akojom taqe i tz'ilom re' re', chi je' re', re' ka'kab' i chi ch'ikaab' reh i ju'jun chi tz'ilom naa akojom. 22Waqiib' i tz'ilom naa ayejaam re' naa akojom parookb'aal q'iij reh paam i santo laj itz'ihy naah paat. 23Eh ki'ib' chik i tz'ilom naa ayejaam reh pantaq tz'u'k parookb'aal reje i q'iij. 24Re' taqe i tz'ilom wili naa kichopom kiib' naa ak'ulaam kiwach panyuuq', je' wo' chi' taq chii' ruuk' taqe i chopaab' reh. Eh je' wo' chik re' rub'aan naa a'nam i ki'ib' chi tz'ilom naa akojom pantaq tz'u'k. 25Je' re' noq naa rumanlojiik waxiqiib' i tz'ilom, eh waqlaj i ch'ikaab' reh naa akojom re' ruuk' i plata, iraaj ruq'orom chi ka'kab' i ch'ikaab' reh i ju'jun chi tz'ilom. 26Ho'oob' wo' hoq i b'olob'aq chee re' ruuk' i acacia naa ayejaam. Re' taqe re' naa akojom chi ruq'e'liik taqe i tz'ilom naa akojom reje chi juntar i paam i paat naa nulooq'jiik wii'. 27Eh ho'oob' wo' i b'olob'aq chee' naa ayejaam, re' naa akojom chi ruq'e'liik taqe i tz'ilom naa akojom chi juntar, ho'oob' wo' hoq i ruq'e'liik taqe tz'ilom naa akojom reje parookb'aal q'iij chupaam i santo laj itz'ihy naah paat. 28Eh re' ruq'e'liik naa akojom panyejaal, konee nik'ik chi juntar panyejaal taqe i tz'ilom naa rik'iik. 29Eh nee nakoj i oro chikiwach taqe i tz'ilom re' re', neenayejaa' taqe kok' kotokaq ch'ihch' re' ruuk' i oro. Reh chi re' taqe i b'olob'aq chee' re' re', noq kojooj chik i oro chikiij, neenajut chupaam taqe i kotokaq ch'ihch' re' re'. 30Re' hin inwaaj chi nee nayejaa' i santo laj itz'ihy naah paat, xa re' la' xti je' rukab' rub'aan xnuk'uhtaaj cha weh chinaah i yuuq' Sinaí. 31Nee wo' nayejaa' jinaj itz'ihy re' ruuk' raxmuqik inka'yik, kaq muqik, kaq laj itz'ihy lino, neenayejaa' i je' kiwii' ánjel chuwach. 32Re' itz'ihy re' re', nee nakoj ju'jun-oq i kok' loklok laj ch'ihch' pantaq rutz'u'kaal, neenalokaa' chuwach taqe i kijib' chi ch'iit i acacia naa akojom oro chikiij, eh plata i ch'ikaab' keh naa akojom. 33Eh nee nach'ilaa' itz'ihy re' re', ruuk' taqe i ch'ihch'. Eh chi riij itz'ihy re' re', nee nayeew i loq'laj kaxa molb'al reh i tz'ihb'amaj wii' taqe i k'uhb'aal. Re' itz'ihy re' re', nee nkamanik chi tasb'al paam i loq'laj ye'aab' ruuk' i xti santo laj ye'aab'. 34Eh noq aye'em chik ar i tz'ihb'amaj wii' taqe i k'uhb'aal kora'j neenatz'ap naah re' i loq'laj kaxa, ar nee nayeew chupaam i ye'aab' xti wilik ruSantohiil. 35Re' i mexa i ye'aab' kaxlanwi'k chi juntar itz'ihy tasb'al paam i paat nee nayeew chaloq pantz'eet reje, eh re' i ye'aab' kantela reh pansak'aaj reh i paam i santo laj itz'ihy naah paat naa aye'em reje chuwach i mexa. 36Eh nee wo' nayejaa' jino'q itz'ihy reh chii' puerta reh i santo laj itz'ihy naah paat, raxmuqik, eh kaq muqik re' ruuk' itz'ihy lino naa ayejaam wii'. Eh wilik taqe i xa chib'ih jariik naa akojom rehtalil chuwach. 37Naa akojom ho'oob'-oq i chee' re' ruuk' i acacia b'ak'b'al reh itz'ihy naa akojom chi chii' i puerta. Re' chee' re' re' naa akojom oro chikiij naa akojom i loklok laj ch'ihch' chuwach, re' taqe i chee' re' re', ju'jun i ch'ikaab' reh naa akojom re' ruuk' i q'an ch'ihch'.

will be added

X\