EXODO 13

1Eh re' QaJaaw Dios je' wili i xuq'or reh i Moisés: 2Re' hat naa aq'asam panuq'ab' chu'nchel i peet kak'uun i aj Israel, je' wo' chu'nchel i peet kak'uun chikop. Ruum re' taqe re' weh hin taqe, inki. 3Re' i Moisés je' wili i xuq'or keh i tinamit: Re' q'iij wili rajlaal haab' taq naa aninq'ijeem, ruum chupaam i q'iij wili xat resaj taq reje i QaJaaw Dios ruuk' i rajaawriik ar i Egipto, i hat naq taq minooj wii' pankowlaj kamanik. Eh chupaam i q'iij re' re' ma' naa ta taq ak'uxum i kaxlanwi'k kojooj ch'amb'esb'al reh. 4Re' taq i hat ixib' poh ruk'amam rub'eeh i haab', noq xat elik taq reje Egipto. 5Eh chupaam i poh wili naa taq a'nam aninq'iij rajlaal haab' chi loq'oomb'al reh i QaJaaw Dios noq hat-oq chik ruk'amam reje chupaam i ye'aab' wilkeeb' wii' i suq atoob'. Ar chupaam i kiye'aab' i aj cananeo, i aj heteo, i aj amorreo, i aj heveo, i aj jebuseo, re' i ye'aab' q'orooj cho rib'iral keh taq aamaam awati't chi naa taq ruye'em aweh i hat. 6Eh wuquub' q'iij taq naa ak'uxum i kaxlanwi'k ma' kojooj ta ch'amb'esb'al reh, eh paruwuuq q'iij naa taq a'nam i nimlaj ninq'iij chi loq'oomb'al reh i QaJaaw Dios. 7Eh i wuquub' q'iij naa ruk'uxariik i kaxlanwi'k ma' kojooj ta ch'amb'esb'al reh ma' awach ta naa rutz'a'iniik reh taq panatinamiit i ch'amb'esb'al kaxlanwi'k. Eh ma' awach ta naa ruk'uxwiik reh i kaxlanwi'k kojooj ch'amb'esb'al reh. 8Eh chupaam i q'iij re' re', je' taq wili i naa aq'orom keh aawak'uun awixq'uun: Re' i ninq'iij wili inqa'an ruum je' yu' q'iij xoj resaj chaloq i QaJaaw Dios ar Egipto. 9Eh ruuk' i ninq'iij taq naa a'nam naa rukahniik chi je' taq rehtalil yejal awach, oon chi aq'ab'. Ruuk' i re' naa taq ruk'uliik panak'ux chi naa taq aq'orom i ruk'uhb'aal i QaJaaw Dios, ruum re' reh x-esanik taq chaaweh ruuk' i rajaawriik ar i Egipto. 10Ruum aj re' koruman chi naa taq a'nam i loq'inik wili rajlaal haab' chupaam i q'iij ruq'orom chaloq i QaJaaw Dios. 11Eh noq hat taq chik ruk'amam reje chupaam i tinamit re' re' i QaJaaw Dios re' i kitinamitaal i aj cananeo. Re' na' chuq'asaj taq aweh i tinamit i QaJaaw Dios je' wo' rukab' i ruq'orom chaaweh taq i hat. 12Re' taq i hat naa taq aq'asam pan q'ab' i QaJaaw Dios chu'nchel taq i peet aawak'uun, chu'nchel i peet kak'uun taq aachikoop, re' imas taq naa aye'em reh. Ruum chu'nchel i re' reh i QaJaaw Dios. 13Eh re' i peet rak'uun i ati't b'uurux, rak'uun tentzun i naa aye'em taq chi jilow. Raaj wila' ma' xayeew i rak'uun tentzun chi jilow, nee taq inak'er i paralaq noq nee nakansaj i rak'uun b'uurux re' re', eh re' taq i hat xanaa wo' aye'em amayiij chikiij taq i peet aawak'uun. 14Wixkipahqaaj taq aweh awiih aamaam koq'uun chi je' wili: ¿Chib'ih reet noq i nayeew taq i chikop chi amayiij? inko'q taqe, je' wili taq i neenaq'or keh: Re' hoj je' wili inqa'an ruum je' yu' q'iij xoj resaj chaloq ar Egipto i QaJaaw Dios ruuk' i rajaawriik, re' naq hoj minooj wii' pankowlaj kamanik. 15Re' noq re' i reey xukowb'isaj i ránima ma' raaj taj chi xoj elik chaloq Egipto, eh re' i QaJaaw Dios xukansaj i peet kak'uun taqe i aj Egipto, i peet rak'uun i kichikoop. Eh ruum chi ma' xukansaj taj i peet qak'uun i QaJaaw Dios i hoj aj Israel, re' peet kak'uun taqe i qachikoop, re' imas inqayeew reh chi qamayiij. Eh inqayeew jinaj i mayiij chi jilow i peet qak'uun. 16Re' loq'inik wili je' na naa rukahniik taq rehtalil yejal awach oon chi aq'ab', reh chi naa taq ruk'uliik panak'ux chi re' i QaJaaw Dios ruuk' i rajaawriik xat resaj taq chaloq Egipto, inki i Moisés. 17Eh noq xuyeew q'ab' i reey chi xi elik chaloq i aj Israel ar Egipto, re' b'eeh i nik'ik pan kitinamiit i aj filisteo ma' najta naq paam. Re' i QaJaaw Dios ma' xuk'am ta taqe reje ar ruum je' wili i xukapaaj, nee oq inkitoq'aa' peleto i aj filisteo kuuk' i aj Israel, nee-oq inyoj kik'ux maa kisutinik wo' chik reje Egipto, inki. 18Ruum aj re', re' QaJaaw Dios xukotej riij i b'eeh re' re', kopan chiq yuuq' chik xuk'am taqe reje, re' b'eeh inooj k'oloq chi chii' i kaq palaw. Eh re' taqe i aj Israel noq xi elik chaloq Egipto xakilok'ik chik xiik' nah kik'ihaal. 19Eh noq xi elik chaloq, re' i Moisés xuk'am cho chi riij i rub'aqil i José. Ruum re' i José je' wili i ruq'orom cho keh taqe i rak'uun rixq'uun: Xti korik noq re' Dios naa taq kaat ruk'uliik resam ayu', eh na' chureq i q'iij re' re' naa taq ak'amam reje chawiij i nub'aqil, inki. 20Re' taqe i aj Israel noq xi elik chaloq Sucot, ar chik xiooj Etam, re' wilik panookb'al reh i ye'aab' chiq yuuq'. 21Re' taqe i aj Israel xib'ehik chaloq chi q'iij chi aq'ab', noq xib'ehik cho pan q'iij re' QaJaaw Dios jun mama' rahp chi suutz' pan taxaaj i ruk'am wii' kib'eeh. Eh noq xib'ehik chaloq chaq'ab' q'aaq' insihq'inik cho reh i kib'eeh. 22Eh re' i jun mama' rahp chi suutz' wilik pan taxaaj, eliik peet chikiwach noq xib'ehik cho pan q'iij, eh re' i jun mama' rahp chi q'aaq' eliik peet chikiwach noq xib'ehik chaloq chaq'ab'.

will be added

X\