EXODO 11

1Re' QaJaaw Dios je' wili i xuq'or reh i Moisés: Re' hin ko jinaj chik i ti' k'axik naa nuk'amam cho chinaah i reey, chinaah i tinamit Egipto. Eh noq ruk'ulum chik i re' i reey xa paruk'ux chik i reh naa ruchaliik chi naa taq kaat rukaham reje ayu' chi jumpech. 2Yu'naak taq i hat cha q'or taq keh i aj Israel chi ki-ohoq kuuk' i aj Egipto patim chi kika'jaah, eh chi winaq chi ixoq nenooj kipahqaaj i xa chib'ih jariik re' ruuk' i oro i plata, inki. 3Eh re' QaJaaw Dios xuch'ub'isaj cho wach i kik'ux i aj Egipto, reh chi xkik'am kiib' pansuqkiil kuuk' i aj Israel. Re' i kikamanik ruuk' i reey xkiyeew runimaal wach i Moisés, eh xye'arik wo' runimaal wach kuum taqe i aj Egipto. 4Re' i Moisés je' wili i xuq'or reh i reey: Re' QaJaaw Dios je' wili i xuq'or chaloq: Re' hin yejal aq'ab' naawik'iik chinaah chu'nchel i tinamit Egipto. 5Eh naa kikimiik i peet kak'uun pankipaat i aj Egipto, ruuk' i peet rak'uun i reey naa rutohq'iik reje re' i wilik rajaawriik chi taaq'anik, naa wo' kikimiik i peet kak'uun chu'nchel taqe i ixoq aj poh kikamanik pan keeb'al. Naa wo' kikimiik i peet kak'uun taqe chikop. 6Chu'nchel i aj Egipto naa koq'iim, ma' jank'al q'iij imb'aan, chi je' re', eh ma' naa ta wo' chik rub'aan chi jumpech. 7Reh chi nee taq i nanaab'eej i hat chi re' hin i Dios q'e' nuk'ax i tinamit Israel chikiwach i aj Egipto, re' taqe i aj Israel ma' xta naakik'ulum, ni xata naq tz'i' i naa rutiwiik kekeh, eh je' wo' chu'nchel i kichikoop, inki Dios, inki. 8Eh je' wili i xuq'or: Re' taqe i kikamanik awuuk' naa ruchaliik kixuk'aam kiib' chi nuwach, je' wili i naa kiq'orom weh: Yu'naak hiy i hat chak'am taqe reje chu'nchel i aj Israel i nak'am kib'eeh inko'q taqe. Chi riij i re' kora'j naa wojiik re'. Eh ma' k'isiin i ruk'aah i Moisés noq xelik cho chuwach i reey. 9Eh re' QaJaaw Dios je' wili i xuq'or reh i Moisés: Re' i reey xama' naa ta wo' runimam taq aweh i naa aq'orom. Chi je' re' ko ma' k'isiin taqe i ma' ilooj taj naa nub'anam chikiwach chu'nchel i aj Egipto, inki. 10Eh re' i Moisés, i Aarón xkian chu'nchel i nimaq wach nawaal re' re' chuwach i reey. Re' i QaJaaw Dios xukowb'isaj wo' chik i ránima i reey xama' xutaq'aaj ta wo' taqe chaloq i aj Israel, wilkeeb' ar Egipto.

will be added

X\