DEUTERONOMIO 8

1Chayeew taq ak'ux chub'anariik taqe i k'uhb'aal k'ahchi' taq nuq'orom aweh hin yu'naak reh chi nee taq ti k'acharik, eh nee taq ti k'ihaaxb'ik reh wo' chi nee taq inachop naah i ye'aab' xuq'or chee i QaJaaw Dios keh taq aamaam awati't chi naa ruye'em taq aweh. 2Eh maa nsahchik taq panak'ux aaDios i xk'amwik taq cha b'eeh pan chiq yuuq' chuwach i ka'winaq haab'. Eh xuyeew wo' taq i ti' k'axik cha naah loch'b'al taq anaah, pajb'al taq aweh, nab'al reh taq akapeb'aal, naab'al reh mi korik chi naa taq animam i ruk'uhb'aal, oon ma' chih taj. 3Atoob' ta xat rik'saj taq chi ti' xat ruyeew taq chi kuyuj wi'k, eh xat ruket taq cho ruuk' i maná jinaj i k'uxumb'al ma' aweht'al ta taq wach ni xata re' taq aamaam awati't xi eht'alinik wach. Ruuk' i re' xuyeew taq aweh chi naab'jik chi re' winaq ma' xata ruuk' i kaxlanwi'k naa ruk'achariik naa la' wo' ruwihiik ruk'achariik ruuk' i ruq'oral i Dios i nelik cho panchii'. 4Eh chuwach i ka'winaq haab' xat b'ehik taq chaloq ma' nik' ta xat kahnik taq chi ma' xta aso', eh ma' xsipjik ta wo' taq aawooq. 5Chakoj taq rehtaal chi re' QaJaaw i qaDios xat ruq'il taq je' rukab' noq i ruq'il i rak'uun rixq'uun jino'q ajaab'ees. 6Je' re' noq i ruk'ul chi naa taq a'nam taqe i ruq'or i ruk'uhb'aal i QaJaaw i qaDios. Chayeew taq ruloq'il, chak'am taq naah xat rutijej taq wii'. 7Ruum re' i QaJaaw naa taq kaat ruk'amam reje chupaam jinaj i aak'al q'e' rax paam jinaj ye'aab' wilik wii' taqe i rooq ha', taqe i raasb'al ha', taqe i nim ha' i ki elik chaloq chupaam taqe i yuuq' k'ixkaab' wilkeeb' wii' i tik mu'uun. 8Jinaj ye'aab' wilik wii' i trigo, i sebada, i uuva, higo, i granado, i olivo, eh wilik wii' i riis kaab'. 9Chupaam i ye'aab' re' re' ma' naa ta taq aqajiik kapeew chi riij awa' ahaa', ma' xta taq naa aqajiik wii' kapeew. Re' taqe ab'aj wilkeeb' ar naa taq ayejaam chi ch'ihch', eh wataq yuuq' naa taq areqem i q'an ch'ihch'. 10Xa re' la' noq suq taq chik awa' ahaa' korehtaal taq naa anujiik chi korik, koruman chi naa taq at'iosem ree Dios i xye'wik taq aweh i ye'aab' q'e' rax paam. 11Chawik'raaj taq awiib' mansahchik taq panak'ux aaWaJaaw aaDios, cha a'n taq chu'nchel i ruq'or taqe i ruk'uhb'aal je' wo' taq i tirutaqaaj wii' i tirutijej taq wii', re' taqe i nuq'or taq aweh i hin yu'naak. 12Eh noq suq taq chik awa' ahaa' korehtaal taq naa anujiik chi korik, k'acharik-oq taq chik i naa a'n chupaam taq aaholohik paat. 13Eh xk'ihaaxb'ik-oq taq awaakaax, aatentzuun, eh xk'ihaaxb'ik-oq wo' taq aa plata, aa oro, xk'ihaaxb'ik-oq chu'nchel i chib'ih taq aweh. 14Ma' naa ta taq animb'isam awiib' ruum taqe re', eh mansahchik taq panak'ux aaDios x-esanik taq cha weh Egipto re' naq i hat taq minooj wii' pankowlaj kamanik. 15Re' i Dios imb'esanik taq cha weh chupaam i chiq yuuq' xiik' naah yohb'aalil, re' i wilkeeb' wii' i ma' k'isa aaq', xa re' yu' kikansanik, re' i wilkeeb' wii' tzina'j. Eh noq ma' nareq ta naq taq chik ahaa' re' reh xresaj chaloq i ha' chupaam i saqrehp ab'aj ruuk' i re' xuyeew taq ahaa' chawunchelaal. 16Eh pan chiq yuuq' xat ruket wo' taq chaloq ruuk' i maná re' i k'uxumb'al ma' xkinab'eej ta cho wach taq aamaam awati't, xuyeew wo' taq i ti' k'axik cha naah loch'b'al taq anaah, pajb'al taq aweh mi korik taq wach ak'ux, eh reh chi suq taq naa awihiik koq'uun. 17Eh ma' naa ta wo' taq aq'orom panak'ux chi je' wili: Ruuk' i qakowiil, ruuk' i qansil xqareq taqe i qab'ehomal wili, mat ko'q taq. 18Wilik-oq la' taq panak'ux chi re' taq aaWaJaaw aaDios naa ruye'wiik taq awansil chureqariik taqe i b'ehomal re' re'. Re' reh je' re' i naa rub'anam taq cha wuuk' reh chi narojiik eloq wach i ruq'orom cho rib'iral keh taqe aamaam awati't, je' rukab' i k'ahchi' rub'anam taq awuuk' yu'naak. 19Eh wila' re' taq i hat xsahchik taq panak'ux aaWaJaaw aaDios, eh wila' chikiwach chik taqe i tiyoox xooj taq aaxuk'aa' awiib' reh i kilooq'jiik. Re' hin xti korik taq i nuq'or aweh yu'naak chi naa taq rusacham awach. 20Nik' wach noq naa rusacham kiwach i nimaq tinamit i QaJaaw Dios i naa taq awik'iik poo wii', je' wo' re' noq naa rusacham awach taq i hat wila' ma' xanimaj taq i QaJaaw Dios, inki i Moisés.

will be added

X\