DEUTERONOMIO 30

1Eh noq naa ruchaliik taq cha naah chu'nchel i xnuq'or rib'iral taq aweh, re' i rotob'il i Dios, oon re' ti' k'axik, cha kapaaj taq riij chi korik chupaam taqe i tinamit naa taq rutukem reje wii' awach i QaJaaw i qaDios. 2Eh wila' re' taq i hat awuch'ihil taq awiih aamaam xayot' taq ak'ux chi riij taq amahk xanimaj wo' taq chik i QaJaaw Dios chu'nchel taq ak'ux, chu'nchel taq awansil, je' rukab' i k'ahchi' nuq'orom taq aweh i hin yu'naak. 3Re' i QaJaaw i qaDios naa ruketelaam taq awach naa taq kaat resam cho panti' k'axik chupaam taqe i tokoom tinamit re' i naa rutukem taq reje wii' awach. 4Atoob' ta ma' wili chi yuuq' k'ixkaab' rutukem taq reje awach i QaJaaw i qaDios ko ar wo' chik taq naa kaat resam chaloq. 5Eh re' i QaJaaw Dios naa wo' chik rumolom taq awach chupaam taq aatinamiit, re' i xi wihik cho wii' taq aamaam awati't. Ar taq naa aweliik korik, eh xiik' naah k'ihaal taq awak'uun awixq'uun naa ruye'em ma' xata je' kik'ihaal taq aamaam awati't. 6Eh naa rukojom rehtalil taq panawánima i ruyejaam wach taq awuuk', je' wo' pankanima taq awiih aamaam, reh chi naa taq ak'axam chu'nchel taq ak'ux chu'nchel taq awánima, i QaJaaw Dios reh chi nee taq inwihik aak'achariik chi juneliik. 7Re' i QaJaaw i qaDios re' ti' k'axik re' re' chikinaah chik taqe i ki-ixowanik taq awach, re' taqe i xisik'wik taq aweh i ma' inkaaj ta k'isinoq taq awach. 8Eh re' taq i hat naa wo' chik taq animam i QaJaaw Dios, eh naa taq a'nam chu'nchel i ruk'uhb'aal k'ahchi' nuq'orom taq aweh i hin yu'naak. 9Eh re' i QaJaaw Dios naa rutoob'iniik taq aweh chi naa taq aweliik korik ruuk' chu'nchel taq i naa a'nam. Naa kik'ihaaxb'iik taq awak'uun awixq'uun, je' wo' taqe chikop, naa wo' kiwachiniik taq atik amu'uun. Naa taq kaat rukuxisam chee i QaJaaw Dios, naa rusuqb'iik ruk'ux taq awuuk' je' rukab' i xub'an cho kuuk' taq aamaam awati't. 10Je' re' naa rub'anam taq awuuk' wila' xanimaj taq, i QaJaaw i qaDios, eh wi xa a'n taq chu'nchel i ruq'or i ruk'uhb'aal, eh tirutaq'aaj taq wii' tz'ihb'amaj chupaam i huuj wili. Eh wila' xti korik chi xanimaj taq chu'nchel ak'ux, chu'nchel awánima. 11Re' i k'uhb'aal k'ahchi' nuq'orom taq aweh i hin yu'naak ma' q'e' ta k'axik rub'aan taq cha weh i hat, eh ma' najt ta wilik taq awuuk'. 12Eh ma' pan taxaaj ta wilik chaloq reh chi ma' awach ta nee nq'orik reh chi je' wili: ¿Awach i neenooj q'oroq chiqij pan taxaaj, reh chi nee ruyeew qeh chi naab'jik chi neeruk'am cho qeh reh chi neenqa'an rub'aan,? ma' inko'q taj. 13Eh ma' chi juntar ta wo' palaw wilik reh chi ma' awach ta nee nq'orik reh chi je' wili: ¿Awach i neen q'ahxik reje juntar palaw reh chi nee ruk'am cho qeh, reh chi nee ruyeew qeh chi naab'jik, reh chi neenqa'an rub'aan? ma' inko'q taj. 14Ruum re' taqe i k'uhb'aal awuuk' taq wilik, wilik taq xaq aachii', wilik taq panawánima reh chi ma' k'axik taj noq nee taq i na a'n rub'aan. 15Chab'iraj taq, re' hin yu'naak xnuyeew taq chik chawach i holohik reh chi nee inwihik taq ak'achariik. Eh xnuyeew taq chik chawach i ma' holohik taj reh chi nee taq tikimik. 16Re' hin i k'ahchi' nuq'orom taq aweh i hin yu'naak, wi xak'ax taq i QaJaaw i qaDios, wi xak'am taq i rub'eeh, wi xa a'n taq chu'nchel i ruq'or i ruk'uhb'aal, wixa nimaj taq, ataq'ab'jiik rub'aan, naa taq ruwihiik ak'achariik. Eh naa taq kik'ihaaxb'iik awak'uun awixq'uun, eh naa taq kaat rukuxisam i QaJaaw i qaDios chupaam i ye'aab' naa taq rojiik achopom naah. 17Eh wila' ma' xanimaj taq chu'nchel i re', wi xat'ooj taq chi kilooq'jiik taqe tiyoox, wi xaxuk'aa' taq awiib' chikiwach. 18Yu'naak i nuq'or taq aweh chi naa taq akimiik ma' naa ta rik'iik wach. Xti korik chi ma' najt ta taq naa awihiik chupaam i ye'aab' naa taq rojiik achopom naah, re' noq hat taq chik ik'inaq reje chi juntar i nim ha' Jordán. 19Re' hin yu'naak, re' taxaaj, re' wach ak'al k'ahchi' kilom chi xnuyeew q'ab' taq aweh chi naa taq asik'im wach aha' wilik taq inawaaj, mi re' k'acharik, oon re' i kimik, re' rotob'il i Dios, oon re' i ti' k'axik. Re' hin i nuq'or taq aweh chi re' i k'achariik taq cha sik' reh chi neen wihik aak'achariik taq i hat, je' wo' taq awiih aamaam. 20Je' re' noq cha k'ax taq i QaJaaw i qaDios, cha nimaj taq, korik-oq taq wach ak'ux chuwach, chi je' re', re' reh neenye'wik taq ak'achariik. Eh najt taq nee ti k'achariik chupaam i ye'aab' naa rojiik taq achopom naah, re' i xuq'or chee i xti korik i QaJaaw Dios chi naa ruye'em keh taq aamaam awati't, Abraham, i Isaac, i Jacob.

will be added

X\