DEUTERONOMIO 27

1Re' i Moisés, ruch'ihil taqe i winaq k'amal b'eeh ar Israel, je' wili xkiq'or reh i tinamit: Re' taq i hat koruman chi naa taq a'nam i k'uhb'aal naa taq nuq'orom aweh yu'naak. 2Eh noq naa taq aq'ahxiik reje chi juntar i nim ha' Jordán, noq naa taq awokiik chupaam i ye'aab' naa ruye'em taq aweh i QaJaaw i qaDios. Ar taq naa atikim i nimaq ab'aj, eh naa taq achunem wach. 3Eh chikiwach ab'aj re' re' naa atz'ihb'aam chu'nchel i ruq'or i k'uhb'aal. Re' taqe i re' naa taq a'nam noq naa taq awokiik chupaam i ye'aab' i nelik wii' chu'nchel i suq atoob'. Re' i ye'aab' naa ruye'em taq aweh aaDios, re' wo' ki Dios aamaam awati't, je' rukab' i ruq'orom taq cha weh. 4Je' re' noq hat taq chik q'ahxinaq reje chi juntar i nim ha' Jordán naa taq atikim ab'aj xnuq'or taq aweh chinaah i yuuq' Ebal, eh naa taq achunem wach. 5Eh ar naa taq ayejaam jino'q i artaal tusuj ab'aj loq'oomb'al ree QaJaaw Dios. Re' artaal re' re' ma' naa ta taq apaxem ruuk' ch'ihch' taqe ab'aj naa taq ayejaam wii'. 6Eh manlik kiwach ab'aj taq naa ayejaam wii' i artaal loq'oomb'al reh i QaJaaw i qaDios. Eh chinaah i artaal re' re' naa taq ak'atam amayiij ye'b'al ruloq'il i QaJaaw i qaDios. 7Ar taq naa aye'em amayiij k'amb'al taq awiib' panotob'il ruuk' i Dios. Ar taq naa a'nam awa', naa taq rusuuqb'iik ak'ux chuwach taq aaWaJaaw aaDios. 8Re' taq i hat holohik rutz'ihb'jiik taq naa a'nam chu'nchel i k'uhb'aal xnuq'or taq aweh, inki. 9Eh re' i Moisés, re' taqe i aj Levíta k'amal kib'eeh aj tiij je' wili i xuq'or keh i aj Israel: Chab'iraj taq i naa nuq'orom chakoj taq rehtaal chi korik, yu'naak xat kahnik taq chik chi manlik rutinamiit i QaJaaw i qaDios. 10Eh inchol taq animam, eh cha a'n taq i ruq'or i ruk'uhb'aal i taaq'anik i rub'an i nuq'or taq aweh i hin yu'naak, inki. 11Chupaam i q'iij re' re' je' wili i xuq'or i Moisés keh i tinamit. 12Eh noq hat taq chik ik'inaq chi juntar i nim ha' Jordán, re' taqe i kiih kimaam i je' wili kib'ihnaal: Simeón, Leví, Judá, Isacar, José, Benjamín, naa rojiik kipab'aam kiib' chinaah i yuuq' Gerizim, chuq'orariik rib'iral i rotob'il i Dios. 13Eh re' i kiih kimaam i Rubén, Gad, Aser, Zabulón, Dan, Neftalí, naa rojiik kipab'aam kiib' chinaah i yuuq' Ebal chuq'orariik rib'iral chi naakiye'ariik panti' k'axik i ma' holohik ta kib'anik. 14Re' taqe i aj Levíta naa kiq'oriik kuuk' chu'nchel i aj Israel kow naa kiq'orom chi je' wili: 15Naa ruq'eb'em riib' panti' awach i neeruyejaa' jino'q i rutiyoox, oon neeruyejaa' jino'q i jalwaach ruuk' chee', ruuk' i haab'imaj ch'ihch' xa ruye'janiik i winaq, eh neenooj rukeb'aa' chupaam jino'q i ye'aab'. Re' re' ma' imponik ta chuwach i QaJaaw Dios, je' ta naq re' i nee ruk'ul inko'q taqe chu'nchel i tinamit. 16Naa ruq'eb'em riib' panti' awach i ma' imponik ta panaq'wach i rutuut rajaaw. Je' ta naq re' i nee ruk'ul, inko'q taqe chu'nchel i tinamit. 17Naa ruq'eb'em riib' panti' awach i rujil paam i ruk'ula't ruka'jaah. Je' ta naq re' i nee ruk'ul, inko'q taqe chu'nchel i tinamit. 18Naa ruq'eb'em riib' panti' awach i neerusach ruuk' i rub'eeh i moywach. Je' ta naq re' i neeruk'ul inko'q taqe chu'nchel i tinamit. 19Naa ruq'eb'em riib' panti' awach i neerub'an i ma' holohik taj reh i tokoom tinamit, reh ixoq kamnaq rub'ahiil, reh i ma' xta rutuut rajaaw. Je' ta naq re' i nee ruk'ul, inko'q taqe chu'nchel i tinamit. 20Naa ruq'eb'em riib' panti' awach i neenyohkik i koq ruuk' i rixoqil i rajaaw ruuk' i re' neeruk'uhtaaj ruk'ixb'ilaal i rajaaw. Je' ta naq re' nee ruk'ul inko'q taqe chu'nchel i tinamit. 21Naa ruq'eb'em riib' panti' awach i neerixoqb'eej jino'q i chikop. Je' ta naq re' i nee ruk'ul inko'q taqe chu'nchel i tinamit. 22Naa ruq'eb'em riib' panti' awach inyohkik i koq ruuk' i ranaab', atoob' ta ranaab' ruuk' i rajaaw, oon ranaab' ruuk' i rutuut. Je' ta naq re' i nee ruk'ul, inko'q taqe chu'nchel i tinamit. 23Naa ruq'eb'em riib' panti' awach i neenyohkik i koq ruuk' i rutuut i rehk'een, Je' ta naq re' i neeruk'ul inko'q taqe chu'nchel i tinamit. 24Naa ruq'eb'em riib' panti' awach i nee rukansaj i ras ruchaaq', atoob' ta chi ma' eht'alimaj neerub'an reh. Je' ta naq re' i nee ruk'ul inko'q taqe chu'nchel i tinamit. 25Naa ruq'eb'em riib' panti' awach i nee ruk'ul i tumiin reh chi nee rukansaj i ma' xta ru mahk. Je' ta naq re' i nee ruk'ul inko'q taqe chu'nchel i tinamit. 26Naa ruq'eb'em riib' panti' awach i ma' ruyeew ta rajaawriik, eh ma' nee ta rub'an chu'nchel i ruq'or taqe i k'uhb'aal wili. Je' ta naq re' i nee ruk'ul inko'q taqe chu'nchel i tinamit.

will be added

X\