DEUTERONOMIO 22

1Wila' sahchik jino'q i rub'ooyax, oon rutentzuun aawas achaaq', eh wila' re' hat xawil wach maakanaa' chi je' re', neenachop, eh nee naq'asaj reh aawas achaaq'. 2Eh wila' re' ehchan reh ma' re' ta ka'jaah, oon ma' aweht'al ta wach, nee nak'am reje panapaat i chikop re' re'. Eh konee chik inooj rupahqaaj aweh aawas achaaq' kora'j nee naq'asaj cho reh re'. 3Eh je' wo' re' taq i naa a'nam ruuk' i b'uurux ruuk' jino'q itz'ihy, oon xa chib'ih jariik neeruq'eb' aawas achaaq' eh xa req-oq taq i hat maakanaa' taq chi je' re'. 4Eh wila' xawilow chi kutlik pamb'eeh i rub'uuruux, oon rub'ooyax i aawas achaaq' ma' naa ta akanaam chi je' re' inchol la' atoob'eem, eh nee nawuksaj johtoq i ruchikoop. 5Re' ixoq ma' ruk'ul taj chi neerukoj i ruso' i winaq, eh re' winaq ma' ruk'ul taj chi nee rukoj i ruso' ixoq. Ruum re' i QaJaaw Dios ma' imponik ta chuwach i kib'anik reh taqe i je' re'. 6Eh wila' awach taq aweh i xureq parub'eeh jino'q i rusuuq' tz'ikin naah chee', oon wach ak'al, eh wilik-oq kok' rak'uun, oon rumiloj chupaam i rusuuq', eh pachlik-oq chinaah i kok' rak'uun, oon chinaah i rumiloj, ma' nee ta rupinik i rutuut ruch'ihil i kok' rak'uun. 7Xa re' la' kok' rak'uun naa rukahniik ruuk', naa rukanaam chi naa rojiiki kituut, chi je' re' suq naa ruwihiik, eh naa runajtb'ik rooq i ruk'achariik. 8Eh wila' awach taq aweh i xuyejaa' rupaat koruman chi naa rukojom koraal tz'aq chi junsuut i naah i rupaat ko'lemb'al iib' reh chi ma' nee ta nokik pankinaah awach reh i rukimiik i awach i neenq'ehb'ik cho ar. 9Eh ma' tik taq i tokoom i ja' chi xilak aa-uuva ruum wixa tik taq neensahchik wach i awijaa', je' wo' hoq i wach taq aa-uuva. 10Eh ma' naa ta wo' taq akojom chi k'otooj paam ak'al i b'ooyax chi b'uurux i nee taq inakoj chi ruk'uliil. 11Eh ma' naa ta taq akojom chi aso' xilakimaj i runoq'il, re' ruuk' rismaal riij chikop, eh re' ruuk' i lino. 12Eh koruman chi naa taq akojom rusinchii' aso' chi chii' kajchel i rutz'u'kaal. 13Eh wila' re' jino'q i winaq xuk'am chi rehk'een jino'q ixoq, eh noq k'acharik chik i rub'an ruuk' neentohq'ik rixowaam wach. 14Eh noq wirinaq chik ruuk' neerutoq'aa' i ma' holohik ta laj q'orik chi riij je' wili neeruq'or: Re' ixoq wili noq xnub'an kaxáro ruuk', eh noq xinwirik ruuk' xnukoj rehtaal chi ruq'oreem chik winaq, inko'q. 15Eh re' taqe i rutuut rajaaw ixq'un naa kik'amam reje i rehtalil chi korik chi ma' ruq'oreem ta winaq naa kik'amam reje pan q'atb'al q'orik chikiwach i ajaab'ees chupaam i tinamit re' re'. 16Re' i rajaaw i k'isa q'ahxoq je' wili i naa ruq'orom keh i ajaab'ees re' re': Re' wixq'uun xnuyeew chi rehk'een i winaq wili, eh yu'naak i rixowaaj chik wach. 17Eh noq wirinaq chik ruuk' ma' holohik ta chik inq'orik chi riij k'ahchi' ruq'orom chi re' wixq'uun ruq'oreem chik winaq, re' hin weht'al chi ma' reht'al ta q'orinik winaq i wixq'uun noq xooj ruuk', eh wili i rehtaliil, inko'q. Eh kikab'cheel ruuk' i rehk'een naa kihe'em i koq wach i itz'ihy chikiwach ajaab'ees. 18Eh noq naakilom chi je' re' naa kichopom i winaq naakiye'em chutojariik i ru mahk. 19Re' winaq re' re' jinaj siento chi tumiin re' ruuk' i plata i rumulta naa kesam, eh naa ruq'ahtesjiik reh i rajaaw ixq'un ruum xuchuk i q'orik chi riij jinaj ixq'un aj Israel ma' reht'al ta wach q'orinik winaq. Eh re' winaq re' re' naa wo' rukahniik chi rehk'een chi jumpech ixq'un re' re' ma' nee ta rub'an chi nee ruch'aq riib' ruuk'. 20Eh wila' korik i xuq'or i winaq chi re' xq'un reht'al chik wach q'orinik winaq, noq xureq. 21Naakesam cho chi chii' i rupaat i rajaaw, eh naa rukutariik chi ab'aj kuum i tinamit wilkeeb' ar korehtaal inkikansaj, ruum xub'an Israel i na'ojb'al xiik' naah yib'kiil wach. Eh ruum wo' chi xuch'uwa'risaj wach i rupaat i rajaaw, xa re' wo' chi naa rukanteesjiik naa rusachariik wach i yiib' wach na'ojb'al taq chaxilak. 22Eh wila' xkan jino'q i winaq chi yoklik ruuk' jino'q ixoq wilik rub'ahiil kikab'cheel i ruk'ul chi naa kikanteesjiik, xa re' wo' chi je' re' naa rusachariik wach i yiib' wach na'ojb'al taq chaxilak i hat taq aj Israel. 23Eh re' jino'q ixq'un ma' reht'al ta wach q'orinik winaq ruye'em chik wach i q'orik reh jino'q i winaq chi naa rub'anam kaxáro ruuk' eh neenwirik ruuk' jino'q i winaq chupaam i tinamit. 24Eh kikab'cheel naa kik'amariik reje chikiwach i q'atal q'orik, naakikutariik chi ab'aj reh i kikanteesjiik. Re' xq'un naa rukanteesjiik ruum ma' xupahqaaj taj chi xko'ljik, eh pan tinamit wo' naq wilik, re' winaq ruum chi xrixoqb'eej i naa naq rub'anam wii' kaxáro i ras ruchaaq'. Xa re' wo' chi je' re' naa rusahchiik wach i na'ojb'al re' re' taq chaxilak. 25Eh wila' re' jino'q i winaq neerureq panab'iix ixq'un ruye'em chik wach i q'orik chi naa rub'anam kaxáro ruuk' i tokoom winaq, eh neerumin chupaam ixq'un chi neen wirik ruuk', xa re' winaq re' re' neenkanteesjik. 26Re' xq'un ma' xta naruuchjiik ruum ma' re' tee reh wilik ru mahk ma' ruk'ul ta chi naa rukanteesjiik. Eliik wach ruuk' i neerub'an jino'q i winaq nee ruk'ul jino'q i winaq, eh chi ma' reht'al nee rukansaj. 27Ruum re' winaq re' re' xa panab'iix xureq ixq'un, eh ar xwirik ruuk' atoob' ta wo' naq xuk'er chii' xama' awach ta wo' naq xko'linik reh. 28Eh wila' re' jino'q i winaq xureq jino'q ixq'un ma' reht'al ta wach q'orinik winaq, eh ma' aha' ta ruye'em wach i q'orik chi naa rub'anam kaxáro, eh neerumin chupaam chi neen wirik ruuk', eh wixkan chi riij, 29re' winaq re' re' naa ruye'em i lajeeb' roxk'ahl chi tumiin re' ruuk' i plata reh i rajaaw ixq'un ruum i xub'an. Eh ruum chi xuch'uwa'risaj wach i ruk'achariik ixq'un, koruman chi naa rub'anam kaxáro ruuk', ma' jaruuj chik naa ruch'aqam riib' ruuk' chi jumpech. 30Eh ma' awach taj i naa rixoqb'eem i rixoqil i rajaaw ruum ma' ruk'ul ta chi nee ruk'utaaj ruk'ixb'ilaal i rajaaw.

will be added

X\