DEUTERONOMIO 21

1Wila' chupaam i ye'aab' naa ruye'em taq aweh i QaJaaw i qaDios xkan jino'q i kamnaq panab'iix ma' eht'alimaj taj awach i xkansanik reh. 2Re' taqe i k'amal b'eeh ar kuch'ihil taqe i q'atal q'orik naa rojiik kipajam nik' najtiil wilkeeb' i tinamit chi junsuut i xkan wii' i kamnaq. 3Eh re' taqe i winaq wilkeeb' chi k'amaj b'eeh chupaam i tinamit ma' najt ta wilik ruuk' i ye'aab' xkan wii' i kamnaq naa kik'amam chaloq jinaj i k'isa wakax ma' jaa' ta nokik perper laj chee' chinaah reh kamanik. 4Eh re' taqe k'amal b'eeh chupaam i tinamit re' re' naa kik'amam qohoq chupaam i rooq yuuq' i k'isa wakax, re' i ye'aab' ma' jank'al ta nab'ixjik wach, eh ma' jank'al ta wo' intik paam. Ar naakitoqom i ralaq i k'isa wakax. 5Eh naa kichaliik taqe i k'amal kib'eeh aj tiij re' taqe i riih rumaam LevĂ­, ruum re' keh sik'ooj cho kiwach ruum i QaJaaw i qaDios chi re' keh naa kib'aniik i kamanik nik' wilik rulooq'jiik i reh naa kianam i kuxisanik. Eh re' keh naa kiq'oriik reh chib'ih i naa rub'aan ruuk' i mahk, eh ruuk' i wech'inik iib'. 6Eh chi riij i re' chu'nchel winaq wilkeeb' chi k'amaj b'eeh ar naakitz'ajam i kiq'ab' chinaah i k'isa wakax kamnaq. 7Eh je' wili i naa kiq'orom: Xti korik noq ma' re' tee hoj xojkaansanik reh i winaq wili, eh ma' xqilow ta wo' hoq awach xkansanik reh. 8QaJaaw Dios cha kuy ru mahk aatinamiit Israel re' i xako'leej taqe chaloq i hat, maakoj pankinaah i rukimiik i ma' xta ru mahk, inko'q taqe. Chi je' re' ma' nee ta taq tiye'arik chutojariik riij i ru mahk i winaq re' re'. 9Re' taq i hat wi xa a'n taq i korik, i rub'ehel chuwach i QaJaaw Dios ma' nee ta taq inokik pananaah i rukimiik i ma' xta ru mahk. 10Noq naa taq awojiik chi q'aq'inik kuuk' i ki-ixowanik taq awach, eh xuyeew-oq q'ab' taq aweh i QaJaaw Dios chi wilik keh taq neenachop. 11Eh wila' wilik taq aweh i hat xrilow wach jino'q ixoq q'e' holohik, eh xuk'ax wach neerub'an chi nee ruchop naah chi rehk'een. 12Eh nee ruk'am reje parupaat ixoq re' re', nee ruq'or reh chi nee rujoy i rismaal naah chi nee ruyok' i rixk'aq. 13Eh nee wo' ruq'or reh chi neeresaj i ruso' rukojom noq xchoparik, eh neenkahnik parupaat i winaq re' re'. Eh jinaj poh neeroq'ej i rutuut rajaaw, chi riij i re', re' i aj Israel chopwik naah neerub'an chi neeruq'oreej chi rehk'een chik, eh re' re' naa rukahniik chi rub'ahiil. 14Eh wila' ma' ruk'ax chik wach koq'uun neerub'an chi nee rutaq'aaj reje ixoq re' re', xa re' la' ma' nee ta rub'an chi nee ruk'ayej ruuk' tumiin, ma' nee ta rub'an chi neerub'an reh je' rukab' imb'aan reh i xa minooj pankowlaj kamanik, ruum xujot' chik reje. 15Wila' re' jino'q i winaq kiib' i rixoqil, xa re' jinaj i ruk'ax, eh re' jinaj ma' ruk'ax taj, eh kikab'cheel-oq xwihik rak'uun ruuk', re' aasb'ees rak'uun ruuk'-oq irixooqil ma' ruk'ax taj xwihik. 16Eh noq naa ruponiik i q'iij chi naa ruch'aq'am i chib'ih reh i winaq re' re' ma' nee ta rub'an chi nee rukoj chi peet rak'uun i xwihik ruuk' i rixoqil i ruk'ax, ruum neentib'ik ruk'ux i rak'uun xwihik ruuk' i rixoqil ma' ruk'ax taj ruum re' re' peet rak'uun. 17Eh re' wo' re' inchol rukojom chi peet rak'uun, eh k'ih wo' hoq i rukooch naa ruye'em, je' wo' rukab' i ruk'ul chi reh. Atoob' ta ma' re' ta rak'uun i rixoqil q'e' ruk'ax, naa wo' ruye'em reh aha' wilik i rukooch ruum re' re' i peet rak'uun. 18Eh wila' wilik jino'q i winaq wilik jino'q rak'uun ma' nib'irinik taj, ma' nimanik taj, ma' runimaj taj aha' wilik inq'orarik reh ruum i rutuut rajaaw. Eh ni xata re' noq imb'aan reh chi tz'uhuum i nimanik. 19Re' ak'un re' re' neerub'an chi neenkik'am reje pan q'atb'al q'orik chikiwach i winaq k'amal b'eeh chupaam i tinamit re' re'. 20Eh je' wili i naa kiq'orom: Re' qak'uun wili ma' nimanik ta chi jumpech ma' qoh runimaj taj xa re' i wi'k iraaj, xa re' xohk'rik iraaj, inko'q taqe. 21Eh re' ak'un re' re' chi ab'aj naa rukanteesjiik kuum chu'nchel i tinamit re' re' Chi je' re' naa taq asacham wach i ti' k'axik wilik taq pana tinamiit. Eh noq naa kib'iram chi je' re' taq awuch aj Israel neekiyo'jik. 22Eh wila' wilik jino'q i winaq yohb'aal wach i ru mahk, i ruk'ul chi naa rukanteesjiik, eh neenkit'uyaa' ju' chee' noq neenkikansaj. 23Re' ruti'jolal ma' nee ta nik'ik aq'ab' chi t'uylik ju' chee' koruman chi naa kimuq'aam chupaam i q'iij naa rukimiik wii'. Ruum ye'ooj i ti' k'axik chinaah ruum i Dios awach t'uylik ju' chee' noq inkimik. Je' re' noq maa ch'uwa'reej taq paam aye'aab' ruye'em taq aweh i QaJaaw i qaDios.

will be added

X\