DEUTERONOMIO 17

1Ma' naa ta taq aq'asam chi amayiij chuwach i Dios imas wakax, oon jino'q i tentzun ma' manlik ta wach i kiti'jolal, oon wilik kiyab'ilaal, ruum re' re' ma' imponik ta chuwach i Dios. 2Eh wila' chupaam taq aaye'aab' naa ruye'em taq aweh aaWaJaaw aaDios wilik jino'q i winaq oon ixoq ma' runimaj ta taqe i k'uhb'aal, oon i rub'an i ma' imponik ta chuwach i QaJaaw Dios, 3oon xooj kixuk'aa' kiib' chi looq'jiik taqe i tiyoox, oon chi looq'jiik i q'iij, chi looq'jiik i poh, chi kilooq'jiik i ch'umiil. Re' taqe i ma' ruq'orom taj i QaJaaw Dios chi naa rub'aan. 4Wila' xab'iraj taq i rib'iral chi wilik i k'ahchi' rub'aniik reh taqe na'ojb'al re' re' cha sik' taq chi riij chi korik, wila' korik chi k'ahchi' i yiib' wach na'ojb'al re' re' chupaam taq aatinamiit Israel. 5Naa taq ak'amam reje pan q'atb'al q'orik wilik chupaam taq aatinamiit i naa rub'aniik reh yiib' wach na'ojb'al, eh naa taq akutum chi ab'aj korehtaal inakansaj. 6Wila' wilik ki'ib' oon ixib'-oq i neekiq'orik reh korik chi wilik ru mahk neerub'an chi nee taq inakansaj. Eh wila' xa jinaj i neenq'orik reh chi wilik ru mahk ma' nee ta rub'an chi neenkanteesjik. 7Eh re' taqe i naa kiq'oriik reh chi korik chi wilik ru mahk naakikutwiik reh chi ab'aj chi peet chi riij i re' naa kokiik haa' chu'nchel i tinamit reh chi naa taq asacham wach chaxilak taq i hat aj Israel i yiib' wach na'ojb'al re' re'. 8Eh wila' wilik i naa taq aq'atam i q'orik chinaah re' ruuk' k'axik chi b'anarik chi riij ikaansanik, chi riij peleto, chi riij yok'oj iib', oon xa chib'ih chik jariik i neenk'ularik chupaam taq aatinamiit. Koruman chi naa taq awojiik chupaam i ye'aab' naa rusik'im wach i QaJaaw i qaDios. 9Ar nee taq tiooj kuuk' i aj Levíta re' taqe i k'amal kib'eeh aj tiij, je' wo' ruuk' i q'atal q'orik naa ruwihiik chupaam i q'iij re' re'. Eh nee taq inaq'or keh i k'axkiil, eh re' i keh neekiq'orik taq aweh chib'ih taq i neena a'n. 10Eh re' taq i hat naa taq a'nam chi korik xti nik' wach i naa kiq'orom taq aweh. Eh re' re' ar taq naa a'nam chupaam i ye'aab' naa rusik'im wach QaJaaw i qaDios. 11Aha' wilik i k'uhb'aal neenkiq'or taq aweh koruman chi naa taq a'nam nik' wach ruq'atariik i q'orik naa kiq'orom, je' wo' re' rub'aan taq naa a'nam i hat, eh ma' naa ta taq ajalam wach rub'aan. 12Eh wila' wilik jino'q i xuq'etwachej ma' nee ta raaj rub'aan i xuq'or i k'amal kib'eeh aj tiij wilik ar chub'anariik i rukamaj i Dios, oon ma' xunimaj taj i q'ataj q'orik. Re' re' i ruk'ul chi naa rukanteesjiik, chi je' re' nee taq i naa sach wach chaxilak i hat taq aj Israel i yiib' wach na'ojb'al re' re'. 13Eh noq neenkib'iraj i tinamit chi je' re' neenchalik kiyo'jiik ma' nee ta chik inki a'n i xa chib'ih jariik ruuk' i q'etwachiil. 14Noq naa taq awokiik chupaam i ye'aab' naa ruye'em taq aweh QaJaaw i qaDios noq achopom taq chik naah, eh k'acharik taq chik i naa a'n ar nee-oq inaq'or taq chi je' wili: Re' hoj inqaj chi naa ruwihiik jino'q qa reey. Je' rukab' noq wilkeeb' i tinamit wilkeeb' chi junsuut i qatinamiit, tiko'q taq. 15Ma' xta reet chi nee taq inakoj aareey, xa re' la' koruman chi re' i QaJaaw i qaDios narusik'wiik wach. Eh re' wo' ruuk' aatinamiit taq i hat, ma' nee ta rub'an chi tokoom tinamit i nee taq inakoj chi aareey. 16Xa re' la' re' reey re' re' ma' nee ta ruwihiik ruk'ihaal-oq i rukawayu, eh ma' naa ta wo' rutaq'aam i rutinamiit Egipto chusik'ariik ruman i rukawayu. Ruum re' i QaJaaw Dios ruq'orom taq aweh chi ma' jaruuj taq chik naa asutiniik reje chupaam i ye'aab' re' re'. 17Eh ma' nee ta wo' rub'an chi neen wihik k'ih-oq rixoqil reh chi ma' nee ta inyoj i rukapeb'aal. Eh ma' nee ta wo' rub'an chi neen wihik ruk'ihaal-oq ru oro, ru plata. 18Eh noq naa rokiik chi taaq'anik i reey re' re' taq cha naah naa rutaq'aam rutz'ihb'jiik rehtalil pan jino'q huuj i k'uhb'aal wili wilik kuuk' i aj Levíta k'amal kib'eeh aj tiij re' xtz'ihb'jik cho pampeet. 19Re' huuj naa rutz'ihb'jiik wii' i k'uhb'aal wili eliik naa ruwihiik ruuk', eh naa rilom wach chib'ih i ruq'or chupaam, chu'nchel q'iij reh i ruk'achariik, reh chi nee rutijej reh chu'nchel i ruq'or i k'uhb'aal wili, eh nee ruyohleej wach i QaJaaw i qaDios. 20Reh chi ma' nee ta runimb'isaj riib' chuwach i rutinamiit. Eh ma' nee ta rukanaa' rub'aan chu'nchel i ruq'or i k'uhb'aal, chi je' re' najt naa ruwihiik chi reyil chinaah i tinamit Israel, eh najt wo' naa kiwihiik chi reyil i riih rumaam.

will be added

X\