DEUTERONOMIO 15

1Re' taq i hat rajlaal wuquub' haab' taq naa akuyum kimahk i wilik kik'aas taq awuuk'. 2Re' kuyuj mahk taq naa a'nam re' taqe wili: Wila' xayeew taq i chib'ih aweh chi kemeel keh taq aawas achaaq' koruman chi naa taq akuyum ru mahk ruuk' i rukemeel, eh wila' awach i wilik ruk'aas taq awuuk' maa pahqaaj taq chik reh awuch tinamitaal aj Israel ruum ruq'orom i QaJaaw Dios chi re' i ruwuuq haab' naa rukuyariik wii' i mahk chi riij i k'aas. 3Re' taqe i tokoom tinamit naa taq apahqaam keh chi naa kiye'em jilow i kikemeel, eh re' taqe aatinamiit naa taq akuyum kimahk ruuk' i kikemeel. 4Eh wila' je' taq re' xa a'n ma' xta jino'q i neb'aa' naa ruwihiik taq chaxilak, eh naa taq kaat rukuxisam chee Dios chupaam i ye'aab' naa ruye'em taq aweh chi akooch. 5Xa re' la' wi xanimaj taq, wi xa a'n taq chu'nchel i ruq'or taqe i k'uhb'aal k'ahchi' nuq'orom taq aweh i hin yu'naak. 6Re' i QaJaaw i qaDios naa taq kaat rukuxisam je' rukab' i ruq'orom taq aweh. Eh naa ruwihiik chib'ih taq aweh, naa taq aye'em keh chi kemeel i ma' k'isa nimaq tinamit. Eh re' taq i hat ma' naa ta taq awojiik chi kemeel kuuk', eh ma' k'isiin i nimaq tinamit naa taq aq'atam kiwach, re' keh ma' naa ta kiq'atam taq awach. 7Eh wila' wilik jino'q taq chaxilak i neb'aa' re' ruuk' taq aatinamitaal aj Israel chupaam jino'q keh taq aatinamiit re' i naa ruye'em taq aweh i QaJaaw i qaDios maa kowb'isaj taq aw√°nima chayeew la' taq reh chib'ih neerupahqaaj taq aweh chatoob'eej taq awuch tinamitaal. 8Xa hat-oq taq atoob' ruuk' chayeew taq reh chu'nchel chib'ih i neerupahqaaj taq aweh chi kemeel. 9Eh maa nokik taq panakapeb'aal i yiib' wach, maa q'or taq chi je' wili: Re' hoj ma' xtaj naa qayeew chi kemeel ruum xailook' chik imponik i wuquub' haab' reh i kuyuj mahk chi riij i k'aas, mat ko'q taq. Eh ma' nee ta rub'an chi ma' suq ta rilariik taq neena a'n i aatinamitaal, wila' ma' xakemelej taq chib'ih reh i neb'aa', re' reh nee ruq'or reh i Dios, eh naa rukahniik chi jinaj mahk taq cha naah. 10Naa la' taq atoob'eem chu'nchel ak'ux chi juneliik ruum wi je' re' taq i xa a'n naa taq kaat rukuxisam i QaJaaw i qaDios ruuk' taq i naa a'nam ruuk' taq i naa aq'orom. 11Juneliik naa kiwihiik i neb'aa' taq chupaam aatinamiit ruum aj re' i nuq'or taq aweh chi chatoob'eej taqe i neb'aa' i ti' wilkeeb' taq chaxilak taqe i ma' xta wilik keh wilkeeb' chupaam taq aatinamiit. 12Wila' xaloq' taq jino'q amoso re' ruuk' taq awuch aj Israel winaq, oon ixoq, xa waqiib' haab' naa rukamaniik awuuk', eh paruwuuq haab' naa taq awoq'taam reje. 13Eh noq naa rojiik ma' naa ta taq ataq'aam reje chi ma' xta taq i naa aye'em reh. 14Naa la' naa aye'em reje ruchikoop, k'ih wo' rutrigo naa aye'em, je' wo' hoq i ruriis uuva, naa taq awunem reje i chib'ih aweh ruye'em taq aweh i QaJaaw i qaDios. 15Mansahchik panak'ux taq i hat chi xat wihik wo' cho pankowlaj kamanik ar Egipto, eh chi re' i QaJaaw i qaDios x-esanik taq cho aweh. Ruum aj re', re' hin i nuq'or taq aweh chi je' re' taq i naa a'nam. 16Eh wila' re' amoso aloq'om ma' ti raaj ta kaat rukanaam ruum chi hat atoob' ruuk', eh xokrik chikiij taqe i awach aweh. 17Koruman chi nee nahop taq i xikin ruuk' q'as ju' ch'ihch' rehtalil chi naa rukahniik taq chi amoso chi jumpech. Eh je' wo' taq re' i naa a'nam reh taq amoso ixoq wila' ma' raaj ojik. 18Eh maayoj taq ak'ux chi nee taq i naa woq'taaj reje amoso aloq'om ruum waq'iib' haab' wo' taq naa rukamaniik awuuk', eh xayejaal ti rutojb'aal taq naa aye'em ma' manlik ta rutojb'aal jino'q i xa kamanoom chi je' wili. Eh wila' xa a'n taq i nuq'or aweh re' i QaJaaw i qaDios naa taq kaat rukuxisam, inki. 19Chu'nchel imas i peet kak'uun taq awaakaax, taq aatentzuun koruman chi naa taq aq'asam reh i aaWaJaaw aaDios. Ma' naa ta taq akojom chi kamanik i peet kak'uun taqe i wakax, eh ma' naa ta wo' taq aset'em i rismaal riij i peet kak'uun taqe atentzuun. 20Eh rajlaal haab' awuch'ihil taqe awak'uun awixq'uun naa taq rojiik ak'uxum i chikop re' re' chuwach i QaJaaw Dios chupaam i ye'aab' naa rusik'im wach i reh. 21Xa re' la' re' chikop yeq yeq rooq, oon mutz'wach, oon xa chib'ih chik jariik i ruyab'ilaal ma' nee ta rub'an chi nee taq inaq'asaj chi amayiij chuwach i QaJaaw i qaDios. 22Re' taqe chikop re' re' neerub'an chi nee taq inak'ux i panatinamiit xanik' pa' taq k'ihaal inawaaj, atoob' ta saq wach, atoob' ta ch'uwa' wach nee taq inak'ux, je' rukab' noq inak'ux i taqe i keej. 23Xa re' la' ma' naa ta taq ak'uxum i kikik'eel koruman chi naa taq achihkaam je' rukab' noq inchihkik i ha'.

will be added

X\