DEUTERONOMIO 12

1Re' taqe wili i k'uhb'aal, ruch'ihil i titaq'ab'jik taq wii' i ruk'ul taq chi naa a'nam chupaam taq aak'achariik chupaam i ye'aab' naa taq rojiik achopom naah, re' i naa ruye'em taq aweh aaDios i ki Dios aamaam awati't. 2Eh chupaam taqe i tinamit naa achopom naah naa asacham kiwach, chi jumpech i ye'aab' inkiloq'ej wii' taqe i tiyoox, re' taqe i ye'aab' wilkeeb' wataq yuuq' k'ixkaab', je' wo' hoq i wilkeeb' chi ri'sil taqe i rumuuj i nimaq chee'. 3Eh naa wo' taq asacham kiwach i kiartaal, naa taq apaxem ab'aj inki a'n wii' i loq'inik, eh naa wo' taq ak'atam taqe i chee' inkiloq'ej wii' i Asera i ki dios, eh naa wo' taq asacham kiwach i kitiyoox reh chi ma' nee ta chik inq'orarik kib'ihnaal chi jumpech ar. 4Re' QaJaaw i qaDios i hoj ma' ruk'ul ta chi je' re' rulooq'jiik naa qa'nam. 5Eh re' i QaJaaw Dios chupaam i jinaj keh taq aye'aab' i hat naa rusik'im wach jino'q i ye'aab' naa rulooq'jiik wii' i rub'ihnaal. Eh re' ye'aab' re' re' naa asik'im taq i hat, ar taq narojiik aloq'em i qaDios. 6Ar taq naa rojiik ak'atam i chikop chi mayiij chuwach i Dios. Eh ar taq ak'amam reje atumiin i lajeeb' ketzal naa taq awesam ruuk' i jinaj siento, eh naa taq ak'amam reje atoob'aal, re' aq'orom taq chi naa aye'em. Eh ar wo' naa taq ak'amam reje amayiij xanaa taq ruchaliik panak'ux, je' wo' hoq peet taq rak'uun awaakaax, i peet taq kak'uun aatentzuun. 7Eh chupaam i ye'aab' re' re' naa taq a'nam awa' ahaa' chuwach QaJaaw i qaDios chi suq taq ak'ux awuch'ihil taq awak'uun awixq'uun. Eh naa a'nam rusuqkiil taq atik, ruum naa kaat rutob'eem i QaJaaw i qaDios. 8Eh ar ma' naa ta chik a'nam taq i hat je' rukab' inqa'an ayu', yu'naak re' inqa'an aha' wilik imponik chi qawach. 9Re' taq i hat yu'naak komajaa' taq ti okik chupaam i ye'aab' naa ruwihiik wii' i rusuqkiil taq ak'ux re' ye'aab' naa ruye'em taq aweh i QaJaaw i qaDios. 10Eh noq naa taq aponiik chi juntar i nim ha' Jordán, re' i QaJaaw Dios ar taq naa kaat ruye'em chi patinik chi suq taq ak'ux. Ruum ma' naa ta chik ruye'em q'ab' chi naa kojiik chi pleto taq awuuk' i ki-ixowanik taq awach, atoob' ta wilkeeb' taq chi junsuut taq aaye'aab'. 11Re' i ye'aab' naa rusik'im wach i QaJaaw Dios chi naa ruye'ariik ruloq'il ar taq naa rojiik aq'asam chi amayiij chuwach chu'nchel i xnuq'or taq aweh. Re' taqe i k'atoj chikop ye'b'al ruloq'il i reh, je' wo' taq atumiin i lajeeb' naa taq awesam ruuk' i jinaj siento, je' wo' taq atoob'aal, je' wo' chu'nchel i sik'ooj wach i aq'orom taq reh i QaJaaw Dios chi naa taq aye'em reh. 12Re' taq i hat awuch'ihil taq awak'uun awixq'uun je' wo' taqe amoso winaq, amoso ixoq naa taq rusuuqb'iik ak'ux chuwach i QaJaaw Dios awuch'ihil taqe i riih rumaam Leví patim taq chaxilak ruum re' keh ma' xkik'ul ta kiye'aab' taq chaxilak. 13Cha wik'raaj taq awiib' ma' xata aha' taq naa ak'atam chi amayiij taqe i chikop chuwach i QaJaaw Dios. 14Re' taqe i amayiij xa ar wo' taq naa aq'asam chupaam i ye'aab' naa rusik'im wach i QaJaaw Dios chupaam i jinaj keh i ye'aab' ar taq narojiik aq'asam chu'nchel i xnuq'or taq aweh. 15Xa re' la' nee wo' rub'an chi nee taq i naakansaj i chikop, nee taq inak'ux, chupaam taq aatinamiit cha ju'junaal, xanik' pa' taq inawaaj i hat, xa re' la' mi xuyeew taq cha weh i QaJaaw Dios, atoob' ta re' ruuk' i saq wach, atoob' ta re' ruuk' i ma' saq ta wach chikop, atoob' ta rutib'kaal taqe keej neerub'an chi nee taq inak'ux. 16Xa re' la', re' i rukik'eel ma' naa ta taq ak'uxum, koruman chi naa taq achihkaam je' rukab' noq inchihkik i ha'. 17Eh ma' naa ta taq ak'uxum pan aatinamiit i lajeeb' naa awesam taq ruuk' i jinaj siento, i wach taq atrigo, i riis taq aa-uuva, taq aawaseite, taqe peet rak'uun taq awaakaax, aatentzuun. Eh ni xata re' taq i mayiij xa panak'ux taq naa ruchaliik je' wo' taq amayiij chi riij, nee taq i neenaq'or ree Dios chi wilik taq i na a'n, je' wo' taq amayiij inaq'asaj taq ruuk' aq'ab'. 18Re' taqe i mayiij re' re' xa ar taq naa ak'uxum chuwach i QaJaaw i qaDios chupaam i ye'aab' naa rusik'im wach i reh, awuch'ihil taq awak'uun awixq'uun, awuch'ihil taq amoso winaq, taqe amoso ixoq. Eh awuch'ihil wo' taqe i riih rumaam Leví wilkeeb' taq panatinamiit, eh naa taq rusuuqb'iik ak'ux chuwach i QaJaaw ruum naa taq akamaneem wach. 19Eh ma' naa ta wo' taq akanaam chi ma' xta wilik keh i riih rumaam Leví nik' najtiil naa taq aak'achariik wach ak'al. 20Eh noq re' QaJaaw i qaDios runimb'isam taq chik reje aye'aab', je' rukab' i ruq'orom taq aweh neerub'an chi nee taq inak'ux i tiwik xanik' pa' taq neenawaaj i hat panak'ux. 21Wila' re' i ye'aab' xusik' wach i QaJaaw i qaDios chi naa ruq'orariik i rub'ihnaal najt ruuk' taq aaye'aab' neerub'an chi nee taq i naakansaj ixoq wakax, je' wo' taqe aatentzuun ruye'em taq aweh aaDios. Eh neerub'an chi nee taq inak'ux i kitib'kaal i naa taq apatiniik wii' xanik' pa' k'ihaal taq inawaaj, je' rukab' i nuq'orom taq aweh. 22Eh nee wo' rub'an chi nee taq inak'ux i kitib'kaal i keej, je' wo' taqe i chikop ch'uwa' kiwach, je' wo' taqe i chikop ma' ch'uwa' ta kiwach. 23Xa re' la' ma' ruk'ul taj chi nee taq ak'uxum i kikik'eel ruum re' re' inye'wik k'acharik. Je' re' noq ma' ruk'ul taj chi nee taq inak'ux inye'wik k'acharik ruuk' i tiwik. 24Re' taq i naa a'nam naa taq achihkaam wach ak'al i kik', je' rukab' noq inchihkik i ha'. 25Maak'ux taq i kik' reh chi nee taq ti elik korik ruuk' i chib'ih jariik taq i neena a'n, eh nee wo' kielik korik taq awiih aamaam ruum naa taq a'nam i rukorkiil chuwach i QaJaaw Dios. 26Eh re' taqe i chib'ih jariik naa aq'asam taq chi mayiij chuwach i QaJaaw Dios, eh aha' wilik i aq'orom taq chi naa aye'em reh, ar taq naa aq'asam chuwach, chupaam i ye'aab' naa rusik'im wach i reh. 27Eh ar chinaah i ru artaal i QaJaaw Dios naa taq aq'asam ak'atoj mayiij. Re' i kikik'eel i chikop naa aq'asam chi mayiij naa taq ajalk'iim chinaah i ru artaal taq aaWaJaaw aaDios, eh re' kitib'kaal neerub'an chi nee taq inak'ux. 28Chab'iraj taq cha a'n taq rub'aan chu'nchel i nuq'or taq aweh, reh chi suq taq nee ti wihik i hat, eh suq wo' nee kiwihik taq awiih aamaam, ruum i rub'anariik i korik chi b'anarik, je' wo' hoq imponik chuwach i QaJaaw Dios. 29Noq re' i QaJaaw i qaDios naa rusacham kiwach i tinamit wilkeeb' chupaam i ye'aab' naa taq rojiik achopom naah, re' taq chik i hat naa awihiik ar. 30Eh noq wilkaat taq chik ar noq sachooj chik kiwach chawik'raaj taq awiib' maayeew taq awiib' chi jot'arik, maa pahqaaj taq chib'ih aweh keh taqe i kitiyoox, eh maa kapaaj wo' taq kiloq'jik je' rukab' noq inkiloq'ej keh. 31Eh noq naa taq aloq'em i QaJaaw i qaDios i hat maa a'n taq aweh i ma' holohik taj inki a'n i tokoom tinamit re' re', re' keh noq inkiloq'ej i kitiyoox inki a'n i ma' holohik taj korehtaal inkik'at i kiha'lak'uun chi kimayiij chikiwach, re' taqe re' ma' imponik ta chuwach i QaJaaw Dios. 32Eh koruman chi naa taq a'nam chi korik chu'nchel i xnuq'or taq aweh, ma' naa ta taq atiqim naah, eh ma' naa ta wo' taq awesam ruuk'.

will be added

X\