DEUTERONOMIO 10

1Re' i QaJaaw Dios je' wili i xuq'or weh: Re' hat cha yejaa' kiib'-oq i tz'ilom ab'aj je' wo' kiwii' i kiib' xnuyeew aweh pampeet, eh cha yejaa' wo' jino'q i kaxa re' ruuk' i chee'. Eh nee ti johtik chinaah i yuuq' reh chi nee nub'an nuk'utaaj awuuk'. 2Eh re' hin chikiwach taqe i kiib' chi tz'ilom ab'aj re' re' naa nutz'ihb'aam taqe i q'orik xnutz'ihb'aaj chikiwach i tz'ilom ab'aj re' xaxer wach ak'al, eh neenamol chupaam i loq'laj kaxa, inki. 3Eh re' hin xuyejaa' wo' hoq jinaj i kaxa re' ruuk' i chee' acacia, eh xnuyejaa' wo' hoq kiib' chi tz'ilom ab'aj eh xnuk'am johtoq chinaah i yuuq'. 4Eh re' i QaJaaw Dios xutz'ihb'aaj wo' chik i lajeeb' k'uhb'aal chikiwach i kiib' chi tz'ilom ab'aj re' re', je' wo' rukab' i xutz'ihb'aaj cho pampeet. Re' i xuq'or taq cha weh i QaJaaw chinaah i yuuq' chupaam i runimaal q'aaq', re' noq qamolom qiib' chi qunchelaal, eh xuyeew wo' chik cho weh i kiib' chi tz'ilom ab'aj. 5Eh re' hin xinqajik wo' chik cho chinaah i yuuq', eh xnuyeew i kiib' chi tz'ilom ab'aj chupaam i loq'laj kaxa je' rukab' i xuq'or weh i QaJaaw Dios, eh ar xkahnik chi jumpech. 6Chi riij i re', re' taqe i aj Israel xi elik reje Beerot-bene-jaacán, ar chik xi chalik chupaam i ye'aab' Mosera rub'ihnaal, eh ar xkimik i Aarón, ar xmuhqik, eh re' chik i rak'uun Eleazar rub'ihnaal xkahnik chi k'amal kib'eeh aj tiij chi jilow. 7Eh noq xi elik cho Mosera ar chik xi chalik Gudgoda. Noq xi elik cho ar xi chalik chupaam i ye'aab' Jotbata rub'ihnaal re' i wilkeeb' wii' i ma' k'isa rooq haa'. 8Chupaam taqe q'iij re' re', re' i QaJaaw Dios xusik' kiwach i riih rumaam Leví reh chi re' keh xi k'amwik chaloq i loq'laj kaxa i molooj taqe wii' i ruk'uhb'aal i QaJaaw. Reh chi xa eliik naa kiwihiik chuwach reh ruk'amariik rub'eeh i rulooq'jiik, reh chi naa kianam i kuxisanik parub'ihnaal, eh ma' xkikanaa' ta chik rub'aan. 9Ruum aj re', re' taqe i riih rumaam Leví ma' xkik'ul ta kak'aal je' rukab' i xkik'ul taqe i kuch aj Israel, ruum re' i kikooch i keh re' rukamaj i QaJaaw je' rukab' i q'orooj keh ruum i QaJaaw Dios. 10Re' hin ka'winaq q'iij ka'winaq aq'ab' xnub'an cho chinaah i yuuq'. Je' wo' najtiil i xnub'an pampeet. Eh re' i QaJaaw Dios xirib'iraj wo' cho weh i xnupahqaaj reh taq chawiij ma' xusach ta wo' taq awach. 11Xa je' la' wili i xuq'or weh: Re' hat cha yejaa' awiib' chi ruk'amariik kib'eeh i tinamit Israel reh chi nee nooj kichop naah i ye'aab' nuq'orom cho rib'iral keh i kimaam kati't chi naa nuye'em keh, inki. 12¿Hat taq aj Israel chib'ih i rupahqaaj taq aweh i QaJaaw Dios noq inaq'or taq i hat? Re' i chi naa taq ayohleem, re' chi naa taq ak'amam i rub'eeh, i QaJaaw Dios, re' chi naa taq ak'axam, re' chi naa taq kamaneem wach chu'nchel taq ak'ux, chu'nchel taq awánima. 13Eh re' chi naa taq animam taqe i ruk'uhb'aal re' chi naa taq a'nam taq tirutaq'aaj wii' reh chi nee taq ti elik korik. 14Eh re' QaJaaw Dios inehchanik reh i taxaaj, je' wo' hoq i runajtiil paam i taxaaj, ruch'ihil i wach ak'al, eh je' wo' chu'nchel i wilkeeb' chupaam. 15Eh re' i QaJaaw Dios xusik' cho kiwach taq aamaam awati't, xuk'ax taqe. Re' taq i hat, hat taq cho kiih kimaam taqe re' xusik' taq chawach chi kixilak i k'ih ch'uq chi tinamit ruum q'e' taq xatruk'ax xat rukoj taq chi hat rak'uun rixq'uun je' rukab' taq i k'ahchi' awilom yu'naak. 16Je' re' noq xti chamol taq panawánima taqe i k'uhb'aal cha kanaa' taq rukowb'eesjiik anaah. 17Ruum re' i QaJaaw i qaDios re' reh i Dios chikinaah taqe i wilik kajaawriik, chikinaah ajaab'ees. Eh Dios xiik' naah nimaal i rajaawriik, xiik' naah ruyohb'aalil wach, ma' awach taj i tokoom rilariik i rub'an ma' awach taj i neeruko'leej riij ruuk' tumiin. 18Re' rub'ehel i rub'an ruuk' i ma' xta kituut kajaaw, je' wo' kuuk' taqe i neb'aa' ixoq. Eh ruk'ax wo' taqe i tokoom tinamit wilkeeb' taq chaxilak i ruyeew kiwa' kihaa' je' wo' hoq i kiso'. 19Eh re' taq i hat cha k'ax taqe i tokoom tinamit wilkeeb' taq chaxilak ruum hat wo' taq tokoom tinamit i hat noq xat wihik taq cho Egipto. 20Eh chayeew taq runimaal wach i QaJaaw i qaDios, xa re' taq i reh naa aloq'em. Korik-oq taq wach ak'ux ruuk' noq nee taq inaq'or i xti korik cha a'n taq parub'ihnaal. 21Re' reh i raa' ri'sil taq aloq'iniik, re' wo' reh i Dios i xb'anik cho reh i nimaq wach na'ojb'al awuuk' taq i hat, re' taqe i sachb'al k'uxliis xiik' naah nimaal wach re' i k'ahchi' taq awilom ruuk' naq'awach. 22Re' taq i aamaam awati't noq xi ponik pan tinamit Egipto xalajeeb' ru kajwinaq chi kiib', eh yu'naak yohb'aal taq chik wach xat ruk'ihaaxb'isaj i QaJaaw, xa je' taq chik ak'ihaal i ch'umiil wilkeeb' pan taxaaj.

will be added

X\