DANIEL 11

1Eh re' hin xintoob'inik reh, xin ye'wik rukowiil ruk'ux i Dario i aj Media chupaam i peet haab' rokiik chi reyil. 2Eh yu'naak re' hin naa nuq'oriik aweh i korik i hat Daniel. Ko ixib' chik i reey naa ruwihiik Persia. Eh re' i rukaaj ma' k'isiin i naa rub'ehoomb'riik chikiwach ixib' chi reey. Eh noq nim chik wach naa rik'raam riib' naa rumolom cho kiwach i tinamit naa ruchaliik chi q'aq'inik ruuk' i kireey i aj Grecia. 3Xa re' la' jinaj chik i q'e' kow riib' naa rokiik chi reyil chupaam i tokoom tinamit, ruuk' i rajaawriik naa rub'anam i taaq'anik, naa rub'anam iraaj i reh. 4Eh noq k'ahchi' chik chi taaq'anik i reey re' re', naa ruyojiik wach i rutinamiit kijib' naa reliik. Ma' re' ta chik taqe i rak'uun i riih rumaam naa rukanaam chi reyil chikinaah. Re' i rajaawriik i tinamit re' re' ma' naa ta chik rureqem chi je' rukab' i pampeet, tokoom chik aj eh naa rukahniik. 5Eh re' reey pansak'aaj reh i rookb'aal q'iij q'e' naa ruwihiik rajaawriik, xa re' la' jinaj i raj kamanoom q'e' wo' chik naa ruwihiik rajaawriik chuwach i reh, re' chik i reh naa rub'aniik i taaq'anik. 6Xa re' la' noq ik'inaq chik kiib' ixib' haab' re' rixq'uun i reey naa ruwihiik chinaah i tinamit wilik reje pansak'aaj reh i rookb'aal q'iij naa ruye'em pan kaxáro rixq'uun ruuk' i reey naa ruwihiik pantz'eet reh i rookb'aal q'iij. Xa re' la' re' xq'un ma' naa ta rukuyum raansil ni xata re' i rub'ahiil naa rukuyum raansil ruum naa wo' rukanteesjiik i rixq'uun re' re', je' wo' i reey, je' wo' i rak'uun, je' wo' taqe inaruk'amam reje chi riij. 7Xa re' la' jinaj reh i rak'uun i ehk'eenb'ees naa ruwihiik rajaawriik. Re' reh naa taqe ruk'amam reje ru soldado, reh chi naa rub'anam i q'aq'inik ruuk' i reey pantz'eet reh i rookb'aal i q'iij, naa rub'anam reh. 8Eh naa ruk'amariik reje Egipto taqe i chib'ih reh naa ruk'amariik reje ar i tiyoox, re' ruuk' i ch'ihch', naa ruk'amariik reje i xa chib'ih jariik k'ih kitz'aaq oro, plata korjinaq wii', k'ih laj haab' naa kiwihiik chi ri'sil i rajaawriik i aj Egipto. 9Re' i reey pantz'eet reh i rookb'aal i q'iij, naa naq rojiik chi q'aq'inik ruuk' i reey pansak'aaj reh i rookb'aal q'iij, naa wo' chik rusutiniik reje parutinamiit. 10Re' taqe i rak'uun reey pantz'eet reh i rookb'aal q'iij, naakimolom wach i ruk'ihaal soldado reh ojik chi q'aq'inik. Eh naa kikutum kiib' chinaah i reey pansak'aaj reh i rookb'aal q'iij, xa je' chik rukab' elal ha' noq naa kojiik k'oloq chi chopariik naah. 11Xa re' la' re' i reey pansak'aaj reh i rookb'aal q'iij ruch'ihil taqe i ruk'ihaal soldado noq naa ruchaliik chi q'aq'inik ruuk' i reey pantz'eet reh rookb'aal q'iij, naa rukuxiik kikansam i ki soldado i aj ixowaal. 12Ruum chi naa rub'anam keh i aj ixowaal i reey pantz'eet reh i rookb'aal q'iij ma' k'isiin ta naa runimb'isam riib'. Xa re' la' xama' najt ta wo' naa ruwihiik rajaawriik. 13Eh re' reey pantz'eet reh i rookb'aal i q'iij, naa wo' chik rutohq'iik rumolom wach i ru soldado xiik' chik naah k'ihaal chuwach i pampeet. Eh ik'inaq-oq chik jarub'-oq haab' naa wo' chik rojiik chi q'aq'inik ruuk' i reey pansak'aaj reh i rookb'aal q'iij. 14Eh chupaam taqe q'iij re' re' ma' k'isiin i ma' naa ta chik kiye'em rajaawriik i reey pansak'aaj reh i rookb'aal q'iij. Wilik taqe i aj Israel yiib' wach i kina'ojb'al naa kiwihiik chi kixilak, je' rukab' i xk'uhtjik aweh panasaq wiriik. 15Eh re' reey wilik pantz'eet reh i rookb'aal q'iij naa rojiik chi peleto ruuk' jinaj i tinamit kow riib' naakik'otom i jul chi junsuut naa kichopom naah. Ni xata re' taqe i rukowlaj soldado i naa ruwihiik chi reyil chinaah i tinamit wilik reje pansak'aaj reh i rookb'aal q'iij naa kikuyum i peleto kuuk'. 16Eh re' naa rojiik chopwoq naah i tinamit re' re' naa rub'anam iraaj i reh, ma' awach ta naa ruk'ulb'iniik reh. Eh naa wo' ruchopom naah i holohik ye'aab' Israel, naa rukuxiik relq'aam i wilik ar. 17Eh naa rusik'im chi riij nik' wach noq naa rehchaam i tinamit wilkeeb' pansak'aaj reh i rookb'aal q'iij. Re' reh naa ruye'em i rixq'uun chi rehk'een i reey ar, xa re' raaj chi naa risam i rajaawriik chi taaq'anik. Xa re' la' re' i naa ruyej-aam wach ma' naa ta wo' rojiik eloq wach. 18Re' reey re' re' naa rub'anam i peleto kuuk' i tinamit wilkeeb' pantz'eet reh i rookb'aal q'iij wilik taqe i naa ruchopom naah. Xa re' la' jinaj kajaaw soldado naa rukuyum i peleto ruuk' eh naa rumolom chi elik ruum ruk'ixiik. 19Re' i naa ruwihiik chi reyil pantz'eet reh i rookb'aal i q'iij naa rusutiniik reje parutinamiit naa ruwihiik ruk'axkiil naa rukanteesjiik pamb'eeh, ma' naa ta chik rib'irjiik rib'iral chi jumpech. 20Eh tokoom chik reey i naa rokiik chi jilow, naa rutaq'aam jinaj i aj pahqan tooj chinaah i tinamit Israel xa reh chi naa rub'ehomb'riik eh xama' najt ta wo' naa rub'anam chi reyil xanoq wo' naa rukanteesjiik, eh ma' re' ta panq'aq'inik naa rub'aan reh. 21Eh jinaj wo' chik i naa rokiik chi reyil xa ruuk' jot'ooj, xa ruuk' chukuj q'orik naa ruponiik chi reey. Eh ma' ajwaal ta wo' k'isinoq wach xa naa rukeb'aam i ruyiib' wach na'ojb'al. 22Re' reh naa rukuxiik rusacham wach nik' nimaal i aj ixowaal naa ruk'uliik iloq chinaah. Eh naa wo' rukansam ink'amwik b'eeh ruuk' i chib'ih nkorjik wach chi naa rub'aan. 23Eh naa wo' rujot'om taqe i ramigo wilik i ruyejaam wach ruuk' chi naa kianam. Atoob' ta xama' q'e' k'ih i tinamit naa rutoob'iniik reh, naa rukuyum i q'aq'inik. 24Eh noq pansuqkiil wilkeeb' i tinamit. Re' winaq re' re' naa rokiik chupaam i holohik ye'aab', ar naa rub'anam i yiib' wach na'ojb'al re' ma' xkian ta chaloq i rumaam rati't. Naa ruch'aqam taqe reh i ru soldado i chib'ih q'uchuuj cho panq'aq'inik, eh naa rusacham wach i kowlaj tinamit, xa re' la' xama' najt ta wo' naa ruwihiik rajaawriik. 25Eh re' reey re' re', ruuk' i rukowiil, ruuk' taqe i ru soldado naa rojiik chi q'aq'inik ruuk' i reey pansak'aaj reh i rookb'aal q'iij, naa wo' rub'anam i k'ulb'ilinik i reh ruuk' taqe i soldado xa re' la' ma' naa ta reliik korik ruum naakijot'om i kireey naakik'ayem i kitinamiit reh i reey inchalik pantz'eet reh i rookb'aal q'iij. 26Re' i reey pansak'aaj reh i rookb'aal i q'iij, re' taqe i naa ruyuq'eem chi wi'k ruuk' nah mexa naa ruyej-anik wach rujot'ariik. Eh ruum i re' ma' k'isiin i ru soldado naa kikimiik. 27Re' taqe i kiib' chi reey jinaj naa kianam wii' kiwa' nah mexa xa re' rub'anariik i ti' k'axik naakikapaam rub'aan k'ul naakichukum i q'orik chikiwach, xa re' la' ma' jino'q keh i naa rub'anam, inarukapaam ruum komajaa' imponik i q'iij. 28Re' i reey pantz'eet reh i rookb'aal q'iij naa rusutiniik reje parutinamiit naa ruk'amam reje i b'ehomal naa ruq'uchum reje ma' naa ta ruponiik panaq'wach i wilik rusantohiil xuyejaa' wach i Dios, re' naa rub'anam iraaj i reh. 29Eh noq naa ruponiik i q'iij q'orooj chaloq, re' reey re' re' naa wo' chik rojiik chi q'aq'inik ruuk' i reey wilik pansak'aaj reh i rookb'aal i q'iij, xa re' la' ma' naa ta chik rub'anam okik chi je' rukab' i pampeet. 30Ruum ma' k'isiin i soldado naa kik'uliik iloq pan barco naa kichaliik ar Quitim ma' k'isiin naa ruchaliik ruyo'jiik, naa rusutiniik reje parutinamiit. Re' i reey re' re' naa rixowaam wach i wilik i rusantohiil ruyejaam wach i Dios, eh naa rub'anam jinaj wach ruk'ux kuuk' i aj Israel ma' naa ta chik kinimam i wilik rusantohiil. 31Naa ruk'amam taqe chaloq i ru soldado naa kich'uwa'risam paam i rusantolaj paat i QaJaaw Dios, ma' naa ta chik kiye'em q'ab' chi naa ruk'atariik i mayiij ar, re' ink'atarik i iqal i iqal Eh re' chik i ch'uwa' wach na'ojb'al naa kianam ar. 32Re' reey re' re' naa rujot'om taqe i aj Israel naakiq'eb'em chi riij kik'ux i ruyejaam wach i Dios. Eh re' taqe i aj Israel korik wach kik'ux ma' naa ta kikanaam rub'an naa kikuyum i ransil i ti' k'axik. 33Eh re' wilik kina'ojb'al wilik naa kikojom runa'ojb'al xa re' la' chi riij i re' naa kikanteesjiik ruuk' q'aslaj ch'ihch', wilik i naakik'atariik. Naa wo' relq'jiik i chib'ih keh, eh naa kik'amarik reje pantaq tokoom tinamit. 34Noq naakik'ulum i ti' k'axik re' re' wilik naa rutoob'iniik keh, eh wilik wo' taqe i naa kianam jinaj wach kik'ux kuuk' xa re' inkaaj chi wilik i naa ruye'ariik keh. 35Eh wilik wo' taqe i aj na'ojb'al naa rub'aan keh ti' k'axik xapajb'al keh mi kow kik'ux reh chi korehtaal inkireq i rukowiil kik'ux, i rukorkiil wach kik'ux, eh naa rusaaqb'iik wach i kánima korehtaal imponik i q'iij ruq'atam chaloq i Dios. 36Re' i reey pantz'eet reh i rookb'aal q'iij naa rub'anam iraaj i reh. Eh ma' k'isiin ta naa runimb'isam riib' chikiwach taqe i xa chib'ih t'iosil. Eh i yiib' wach naa ruq'oriik chi riij i k'achlik Dios, chu'nchel naa reliik korik chuwach, korehtaal inye'arik i ti' k'axik chinaah, ruum re' i Dios je' re' i ruyejaam wach. 37Re' reey re' re', ma' naa ta ruye'em kajaawriik i dios xkinimaj chaloq i rumaam rati't, ma' naa ta wo' ruye'em kajaawriik i dios xkiloq'ej ixoq, ruum naa rukapaam chi xa re' wo' reh i nim rajaawriik chikinaah taqe i re'. 38Eh jinaj i tiyoox naa ruloq'em, re' i ma' xkiloq'ej ta chaloq i rumaam rati't. Re' reh re' tiyoox re' re' naa ruye'wiik ransil noq naa rukapaam, ruum i re' naa ruye'em chi rumayiij chuwach i oro, i plata re' ruuk' i holohaq ab'aj, i xa chib'ih chik i jariik re' ruuk' taqe i k'ih tz'aaq. 39Reh chi naa ruko'leem riib' chuwach i tinamit kow riib', re' rukojom taqe chi ko'len reh taqe i kiloq'inik reh i tiyoox, re' kitiyoox i tokoom tinamit. Eh awach naa ruye'em ruloq'il i reey naa ruye'ariik ruloq'il, naa rukojariik chupaam i nimaq wach kamanik, eh naa rusijiik rak'aal ruum i reey. 40Eh noq naa ruk'uhliik i rajaawriik i reey pansak'aaj reh i rookb'aal i q'iij, naa ruchaliik chi q'aq'inik ruuk' i reey pantz'eet reh i rookb'aal q'ij. Xa re' la' naa rojiik k'ularoq, xa je' chik i kaq suut teew noq naa rojiik k'oloq chinaah. Eh ruuk' i soldado, chi je' pan kareta, chi je' rij kawáyu, chi je' pan barco wilkeeb', je' inooj k'oloq elal ha' chikinaah. 41Re' reey pantz'eet reh i rookb'aal i q'iij noq ojik inki a'n naakik'iik chupaam i ma' k'isa tinamit chi kansanik ruuk' q'aq'inik naa wo' kokiik pan tinamit Israel. Xa re' la' ma' naa ta kikanteesjiik i aj Edom, i aj Moab, i aj Amón. 42Eh ma' k'isiin i tinamit naa rokiik wii' chi q'aq'inik ma' naa ta kikuyum raansil, eh ma' naa ta wo' kiko'leem kiib' i aj Egipto pan kiq'ab'. 43Re' reey re' re' naa ruchopom naah chu'nchel i b'ehomal, taqe i oro, taqe i plata, eh chu'nchel i xa chib'ih jariik wilkeeb' ar Egipto. Eh je' wo' re' naakik'ulum i aj Libia, i aj Etiopía. 44Eh re' i reey noq naa ruponiik rib'iral ruuk' i k'ahchi' ruk'ulariik parelb'aal q'iij, pantz'eet reh i rookb'aal q'iij naa rusahchiik ruk'ux, eh ma' k'isiin i rujosq'iil noq naa rojiik chi q'aq'inik chikinaah i k'ih seht chi tinamit. 45Eh ar naa ruyejaam i ru-itz'ihy naah paat naa rub'anam wii' i taaq'anik panyejaal i palaw ruuk' i santo laj ruye'aab' i Dios. Xa re' la' ar naa ruponiik i ruq'ijil i reey, eh ma' awach ta chik naa ruko'liniik reh, inki weh i ánjel.

will be added

X\