DANIEL 1

1Noq ixib' chik haab' rokiik chi reyil i Joacim ar Judá. Re' i Nabucodonosor kireey i aj Babilonia haa' taqe i ru soldado xchalik kikotej riij i Jerusaleem. 2Re' i QaJaaw Dios xuyeew pan q'ab' i Nabucodonosor i Joacim reey ar Judá, xuk'am reje Babilonia. Eh wilik taqe i kulk inkamanik parupaat i Dios, xuk'am reje Sinar xumol i koq parupaat i tiyoox, re' inkimol wii' taqe i q'e' k'ih tz'aaq inkamanik parupaat i rutiyoox. 3Re' reey xuq'or reh i Aspenaz k'amal kib'eeh i winaq kapuun, chi chusik' cho kiwach chi kixilak i aj Israel i re' ruuk' i rak'uun taqe i nimaq kiwach k'amal b'eeh. 4Re' taqe i k'ijolaq re' re' holohaq-oq taqe, eh manlik wach kooq kiq'ab' kitijem-oq kiib' chi korik ruuk' chu'nchel i na'ojb'al, reh chi neenkian i kamanik parupaat i reey. Reh chi neenk'uhtjik keh i ilij wach huuj re' ruuk' tz'ihb'amaj pan qaq'oral i hoj, hoj aj Babilonia. 5Eh re' Nabucodonosor xuq'or chi re' taqe i k'ijolaq re' re' rajlaal q'iij naa ruye'ariik keh re' ruuk' i wi'k i ruk'ux i reh je' wo' hoq i vino i ruk'ej i reh. Eh xuq'or chi ixib' haab' naakitijiik reh chi neenkian i kamanik parupaat. 6Eh chi kixilak taqe i k'ijolaq re' re' wilik i Daniel, Ananías, Misael, Azarias, re' ruuk' taqe i riih rumaam i Judá. 7Re' i k'amal kib'eeh winaq kapuun xukoj rukab' kib'ihnaal i kijib' chi k'ijool. Re' Daniel Beltsasar i xukoj reh, re' i Ananías Sadrac i xukoj reh, re' i Misael Mesac i xukoj reh re' Azarías Abed-nego i xukoj reh. 8Eh re' i Daniel reh xuq'or paruk'ux chi ma' naa ta ruch'uwa' risam riib' ruuk' i ruk'ux i reey, ruuk' i vino i ruk'ej. Je' re' noq xupahqaaj reh i k'amal kib'eeh i kapuun chi manminarik chupaam chi nee ruch'uwa'reej riib' ruuk' taqe i re'. 9Re' i QaJaaw Dios xutoob'eej i Daniel chi re' runa'ojb'al xponik chuwach i k'amal kib'eeh kapuun. 10Eh re' k'amal b'eeh re' re' je' wili i xuq'or reh i Daniel: Re' hin kinyo'jik chuwach i wajaaw i nureey, ruum xuq'or weh chi aha' wilik i ruk'ux, i ruk'ej i reh re' wo' taq i naa ak'uxum i naa awuk'em i hat. Wila' xrilow chi xat b'aqrik xatyowab'jik taq ma' je' ta chik aakowiil taq awuch'ihil, amahk taq i hat wila' xirukansaj i nureey, inki. 11Eh re' Daniel xub'an ruk'utaaj ruuk' inpuhkanik i wi'k i rukojom i Aspenaz k'amal kib'eeh i kapuun chi cha'jen reh i Daniel, i Ananías, i Misael, Azarías, je' wili xuq'or reh: 12Chakuy i nupahqaaj otob'il aweh chi chanik'eej lajeeb'-oq q'iij quuk' hoj awaj kamanoom, chi xa i chaaj i nee nayeew qeh chi k'uxarik, eh xajot'ik i nee nayeew chi qahaa'. 13Chi riij i re' neenawilow awach taqe i xti wilik kikowiil mi re' taqe i naakik'uxwiik reh i ruk'ux i reey, oon re' hoj i xa i chaaj i naa qak'uxum. Re' hat neena a'n quuk' re' q'oreel nik' pa' wach qawii' neenawilow, inki. 14Eh re' inpuhkanik reewi'k xuk'ul ruk'ux i xuq'or i Daniel, xunik'eej wo' kuuk', lajeeb' q'iij xuyeew keh chi k'uxarik chi uuk'jik i xupahqaj i Daniel. 15Eh noq xik'ik i lajeeb' q'iij xrilow chi re' taqe i xik'uxwik reh i chaaj q'e' taqe kow chikiwach i xik'uxwik reh i ruk'uxb'aal, i reey. 16Xrilow chi je' re' inpuhkanik ree wi'k xa i chaaj xajot'ik chik i xuyeew keh i kijib' chi k'ijool. Ma' xuyeew ta keh i ruk'uxb'aal, i ruvino i reey. 17Eh re' taqe i k'ijool re' re' xye'arik kina'ojb'al ruum i Dios, reh chi xkireq chi riij chib'ih i ruq'or chupaam taqe i huuj, je' wo' taqe i nimaq wach na'ojb'al. Re' Daniel reh i rureq naa re' chi riij chib'ih i ruq'or inilarik pansaq wirik, inilarik pan wirik. 18Eh noq xik'ik ixib' haab' xuq'at i reey chi naa ruk'amariik reje ruuk' taqe i k'ijool re' re', re' Aspenaz i k'amal kib'eeh i winaq kapuun xuk'am wo' reje taqe k'ijool ruuk' i reey Nabucodonosor. 19Eh re' reh xub'an ruk'utaaj kuuk' i k'ijool re' re', eh ma' jino'q i xureq chi kixilak chu'nchel i k'ijool chi je' rukab' i Daniel, i Ananías, i Misael, i Azarías, ruum i re' xukanaa' taqe chi kamanik chupaam i rupaat i reey. 20Eh chu'nchel i nimaq wach i k'ayeew i nimaq wach na'ojb'al inkireq chi riij noq impahqaljik keh ruum i reey inkich'ob' rub'ehel. Re' reey xukoj rehtaal chi xiik' naah i kina'ojb'al chikiwach i wilkeeb' chi ri'sil i rajaawriik re' taqe i aj q'iij, taqe i kisik' wik chi riij i ch'umiil. 21Eh re' Daniel xkahnik chi kamanik ruuk' i reey korehtaal xureq i peet haab'rokiik chi reyil i Ciro.

will be added

X\