2 SAMUEL 7

1Noq re' i reey David wilik chik chupaam i paat i rub'an wii' i taaq'anik suq chik wilkeeb' i aj Israel noq rukanaam chik i q'aq'inik kuuk' i aj ixowaal wilkeeb' chi junsuut. 2Re' David je' wili i xuq'or reh i Natán jalal ruq'oral i Dios: Re' hat inawil chi re' hin wilkiin chupaam i paat chakaltee' korjinaq wii'. Eh re' i ruloq'laj kaxa i QaJaaw xa chupaam i itz'ihy naah paat wilik, inki. 3Re' Natán je' wili i chaq'wik xub'an: Cha a'n chu'nchel inakapaaj rub'aan, ruum re' i QaJaaw Dios wilik awuuk' cha toob'jiik, i nuchjik. 4Eh chupaam aq'ab' re' re' xq'orob'jik chee Natán ruum i QaJaaw Dios je' wili i xq'orarik reh: 5Re' hat hiy ruuk' i David waj kamanoom je' wili i neenaq'or reh: Re' QaJaaw Dios je' wili i xuq'or: Re' hat David ma' re' tee hat naa ayej-aniik reh i nupaat naa nuwihiik wii'. 6Re' hin xti korik i nuq'or chi ma' jank'al ta kimpatinik chupaam jino'q i paat i wesam taqe chaloq, i nutinamiit Israel ar Egipto. Eh xink'uloq ayu' yu'naak re' hin xa pan itz'ihy naah paat kinwihik. 7Re' hin nik' najtiil xwuch'ihleej taqe chaloq i nutinamiit Israel. Re' taqe xnukoj chi taaq'anik chikinaah i aj Israel ma' nik' ta xnuq'or keh chi naakiyejaam jino'q nupaat chee' chakaltee' naa rukorjiik wii', inki. 8Eh cha q'or reh i waj kamanoom David chi re' hin i Dios nim wajaawriik, chi re' hin xnuq'or reh chi je' wili: Re' hin xat wesaj cho chi cha'jinik tentzun, reh chi xat nupab'aa' chi reyil chinaah i nutinamiit Israel. 9Re' hin xintoob'inik aweh xa aha' pa' xat ponik. Eh xnuq'asaj taqe panaq'ab' i ki-ixowanik awach xnuyeew awajaawriik je' rukab' i kajaawriik i winaq xti wilik kajaawriik wilkeeb' chinaah i wach ak'al. 10Eh xnuyeew kiye'aab' i nutinamiit Israel reh chi ar naakipatiniik chi suq kik'ux. Reh wo' hoq chi ma' awach ta neenjot'wik keh, eh ma' awach ta neenq'uchwik i chib'ih keh je' rukab' imb'aan keh pampeet. 11Xa re' wo' noq xnupab'aa' taqe chaloq i q'atal q'orik chikinaah i nutinamiit Israel xtohq'ik cho ti' k'axik keh. Eh re' hat yu'naak naa kaat nuhi'lisam ma' naa ta chik kaat kijot'om i ki-ixowanik awach. Inuq'or wo' aweh i hin, hin Dios chi naa nuye'em awak'uun awixq'uun. 12Eh noq naa ruponiik i q'iij noq naa akimiik reje naa rojiik taqe areqem aamaam awati't. Re' hin jinaj keh awak'uun naa nukojom chajilow, eh q'e' naa ruwihiik rajaawriik chi reyil. 13Eh re' reh naa ruyej-aniik i nupaat loq'oomb'al weh. Eh re' hin naa nukojwiik reh chi reyil chi juneliik. 14Re' hin naa nukahniik chi hin raJaaw, eh re' reh naa rukahniik chi wak'uun. Eh wila' xub'an i yiib' wach na'ojb'al re' hin kow naa nuq'ilim, naa nuye'em chi tz'uhuum je' rukab' noq i ruyeew chi tz'uhuum i rak'uun jino'q i ajaab'ees. 15Xa re' la' ma' naa ta wo' nukanaam i ruketeljiik wach, je' rukab' noq xnukanaa' ruketeljiik wach i Saúl xwesaj chi reyil. Eh re' chik i hat xat nukoj chi reyil. 16Re' taqe aawiih aamaam naa kikahniik chi reyil chajilow, re' i reyil naa a'nam ma' naa ta rusahchiik wach chi jumpech, tiko'q reh inki i Dios. 17Eh re' i Natán xooj wo' ruuk' i David xuq'or reh chu'nchel i xq'orarik reh, je' wo' hoq i xk'uhtjik reh parusaq wiriik ruum i QaJaaw Dios. 18Re' David xokik i koq chupaam i itz'ihy naah paat wilik wii' i ruloq'laj kaxa i QaJaaw Dios, eh xub'an rutiij je' wili xuq'or: Re' hat waJaaw i nuDios nim awajaawriik. ¿Chib'ih nub'anam i hin? ¿Chib'ih kianam i wak'uun wixq'uun chi xayeew weh i otob'il wili? 19QaJaaw Dios re' hat ma' xata re' wili i xaq'or, xaq'or la' wo' hoq chi re' taqe i wiih numaam i hin, hin awaj kamanoom naa kiwihiik chi reyil chi juneliik. QaJaaw Dios ma' awach ta neemb'anik i na a'n. 20¿Chib'ih ta wo' naa chik i neenupahqaaj aweh? Re' hat QaJaaw Dios aweht'al i nuna'ojb'al i hin, hin awaj kamanoom. 21Re' hat QaJaaw Dios chu'nchel i q'e' loq'laj na'ojb'al wili xa a'n chaloq je' rukab' i xchalik panak'ux i hat. Re' hat xaq'or weh reh chi xayeew weh chi naab'jik. 22QaJaaw Dios re' hat xiik' naah nimaal awajaawriik, ruum ma' awach ta chik i nim rajaawriik chawach i hat. Eh ma' xta chik jino'q Dios chi je' rukab' i hat. Xa re' wo' hoq i hat je' rukab' i qib'iram cho rib'iral. 23Eh ma' jino'q i tinamit wilik wach ak'al chi je' rukab' aatinamiit Israel, xa re' wo' hoq i re' looq'. QaJaaw Dios re' hat xat ko'linik keh reh chi xakoj taqe chi aatinamiit. Re' hat xa a'n taqe i nimaq wach nawaal, i nimaq wach sahchb'al k'uxliis kuuk' reh chi xakanaa' chi holohik kib'iral. Re' hat xawesaj taqe cho chuwach i nimaq tinamit, je' wo' chikiwach i tiyoox, eh xawesaj taqe cho pan kiq'ab' i aj Egipto. 24Re' hat xasik' kiwach i aj Israel reh chi xi kahnik chi aatinamiit taqe chi jumpech, eh chi re' hat xat kahnik chi ki Dios. 25QaJaaw Dios nee ta tii na a'n wuuk' chi juneliik aha' wilik i xaq'or weh i hin, hin awaj kamanoom. Neeta naq i wihik kajaawriik taqe i wiih numaam chi reyil je' rukab' i xaq'or. 26Neeta naq inq'orarik rib'iral chi re' hat i Dios nim awajaawriik, hat qaDios i hoj, hoj aj Israel. Neeta naq i nacha'jeej taqe chi juneliik i wiih numaam chi reyil i hin, hin awaj kamanoom. 27QaJaaw Dios nim awajaawriik qaDios i hoj aj Israel re' hat xayeew weh chi naab'jik chi naa nuwihiik chi reyil. Eh chi re' taqe i wiih numaam naa akojom chi reyil chi juneliik. Je' aj re' noq re' hin, hin awaj kamanoom k'ahchi' nupahqaam aweh taqe i otob'il wili. 28Re' hat Jaaw hat Dios, re' taqe aq'oral xti korik. Eh aq'orom rib'iral weh chi naa aye'em weh awotob'il i hin, hin awaj kamanoom. 29QaJaaw Dios i nupahqaaj aweh chi chakuxisaj taqe i wiih numaam chi juneliik i hin, hin awaj kamanoom ruum aq'orom chi naa kiin akuxisam i hin chi juneliik, je' wo' taqe i wiih numaam, inki, David.

will be added

X\