2 SAMUEL 13

1Re' i Absalón rak'uun i David xwihik jinaj i ranaab' xiik' naah holwochiil, Tamar i rub'ihnaal. Eh re' i Amnón rak'uun wo' hoq i David ma' k'isiin ta xuk'ax wach i Tamar re' i ranaab'. 2Eh re' Amnón ruum i ruk'axariik wach i ranaab' Tamar i rub'ihnaal korehtaal chop chi yab'ilaal. Ruum chi ko k'isa xq'un i ranaab' ma' q'orimaj ta junriim-oq ruum winaq re' Amnón ma' rureq ta naq chi riij nik' wach noq naa rujot'om i ranaab' 3Eh re' Amnón jinaj i ramigo xwihik Jonadab i rub'ihnaal rak'uun i rikaan Simea rub'ihnaal ras i David. Re' i Jonadab kow ruk'ux chusik'ariik chi riij i yiib' wach na'ojb'al. 4Eh re' i Jonadab xupahqaaj reh i Amnón chi je' wili: Hat rak'uun i reey David ¿Chib'ih reet noq rajlaal q'iij k'ahchi' ab'aqriik? ¿Chib'ih reet noq ma' naa k'utjaaj weh aak'axkiil? inki. Re' Amnón je' wili i xuq'or: Ruum chi q'e' nuk'ax wach chi weh i Tamar re' i ranaab' i Absalón i was, inki. 5Eh re' i Jonadab je' wili i xuq'or reh i Amnón: Re' hat cha a'n awiib' chi hat yowaab' tiyook wach ayokaab'. Noq neen k'uloq awajaaw cha wilariik, je' wili i neenaq'or reh: Chakuy cha taq'aaj cho weh i Tamar i wanaab' k'oloq ruyeew nuwa'. Eh ayu' neeruyejaa' re' ruuk' i ma' kow ta laj wi'k, noq neenwil wach nee oon naq inche nuk'ux i wi'k, tiko'q reh, inki. 6Re' Amnón xooj wo' yohkoq wach ruyokaab' xutz'aq ruyab'ilaal. Eh noq xooj ilaroq ruum i rajaaw, je' wili i xuq'or reh i rajaaw: Re' hin i nupahqaaj otob'il aweh chi cha taq'aaj cho weh i Tamar i wanaab' reh chi neenk'ulik ruyejaa' kiib'-oq i re' ruuk' i suq laj kaxlanwi'k noq nee ruyeew weh nee oon naq inche nuk'ux, inki. 7Re' reey David noq xsutinik reje xutaq'aaj wo' reje i Tamar je' wili i xuq'or reh: Yu'naak hiy parupaat axib'aal reh chi neenooj ayejaa' k'isinoq ruwa', nee oon naq i ruk'ux, inki. 8Je' re' noq re' i Tamar xooj wo' parupaat i Amnón i ruxib'aal yoklik wach ruyokaab'. Re' i Tamar xuchop chaloq i arina xuyejaa' i suq laj kaxlanwi'k xuchaq'saj chuwach i Amnón. 9Eh re' i Tamar xuk'am chee kaxlanwi'k pan xartiin, xuyeew reh i Amnón, xa re' la' re' reh ma' xraaj ta ruk'uxum, je' wili i xuq'or reh i ranaab': Chawesaj taqe reje chu'nchel i wilkeeb' ayu' inki. Eh xi elik wo' chaloq chu'nchel i wilkeeb' ar. 10Chi riij i re' je' wili i xuq'or reh i Tamar: Chak'am cho weh i nuwa' xayejaa' reh chi neenuk'ux, inki. Re' i Tamar xuk'am cho reh paruyokaab' i Amnón i suq laj kaxlanwi'k xuyejaa'. 11Eh noq re' Tamar xuyeew i koq i kaxlanwi'k reh i ruxib'aal xuchohpaaj chi q'ab' xumek' i koq ruuk' je' wili i xuq'or reh: Wanaab' q'e' nuk'ax awach kim tiyook wuuk', inki. 12Re' Tamar je' wili i ruchaq'weesjiik xub'an: Ma' chih taj nuxib'aal ma' kinachop ruum re' i yiib' wach na'ojb'al je' rukab' i re' ma' imb'aan ta chi qaxilak i hoj aj Israel. Ma a'n i yiib' wach na'ojb'al je' rukab' i re', inki. 13Noq hin chik ajot'om. ¿Aha' neenooj nukeb'aa' wiib'? Eh re' hat neetikahnik xiik' naah yib'kiil wach i runa'ojb'al ayu' Israel. Re' hin i nupahqaaj otob'il aweh chi cha q'oreej i reey i qajaaw re' reh nee nq'orik aweh mi neekiruyeew chi hin awehk'een, inki. 14Eh re' Amnón ma' xunimaj taj i xq'orarik reh ruum i ranaab'. Eh xti wilik ransil chuwach i ranaab' xumek' i koq ruuk' ar xuchop i ranaab'. 15Re' Amnón pampeet yohb'aal naq wach xuk'ax wach i Tamar, eh noq ruchopom chik yohb'aal chik wach xrixowaaj wach. Noq xooj kuxoq je' wili i xuq'or reh: Yu'naak wukteen reje eleen reje ayu', inki reh. 16Eh re' Tamar i ranaab' je' wili xuq'or: Ma' chih taj nuxib'aal wila' xinawesaj reje ayu' neenkahnik chi jinaj na'ojb'al xiik' naah yib'kiil wach chuwach i xa a'n weh, inki. Eh re' Amnón xama' xunimaj ta wo' hoq. 17Xutaq'aaj la' ruk'amariik i rumoso je' wili i xuq'or reh: Chawesaj reje rij paat ixoq wili neenatz'ap reje riij chi korik i puerta, inki. 18Re' i rumoso i Amnón xresaj wo' reje rij paat, eh xutz'ap reje riij chi korik i puerta. Re' i Tamar xiik' naah holwochiil i ruso' rukojom je' holwochiil i kiso' inkikoj i kixq'uun taqe i reey ma' q'orimaj ta taqe junriim-oq ruum winaq. 19Re' i Tamar xupukej chaaj wach naah, xuxih i ruso' wilik chi riij, eh xuyeew kab'chel i q'ab' wach naah xooj pantaq b'eeh chi oq'ik i rub'an. 20Eh noq xrilow chi je' re' i ruxib'aal i Tamar, Absalón rub'ihnaal xupahqaaj reh chi je' wili: Mi re' i Amnón i axib'aal chopwik aweh wila' je' re' i xub'an aweh wanaab' ma' awach eh aq'or. Re' reh axib'aal mat qaaj kapeew chi riij i xub'an aweh re' re'. Eh re' Tamar noq xrilow chi xkahnik chi rutkeel xkahnik ruuk' i Absalón re' i ruxib'aal. 21Eh noq xrib'iraj i reey David chib'ih i xk'ularik ma' k'isiin ta noq xchalik ruk'aah. 22Re' Absalón ma' xta xuq'or reh i Amnón, xa re' la' xkahnik chi xiik' naah i rixow wach ruum xichop i Tamar re' i ranaab'. 23Eh kiib'-oq chik haab' chi riij i re', re' taqe i rumoso i Absalón k'ahchi' kiyok'om i rismaal riij i rutentzuun ar Baal-hazor ma' najt ta ruuk' i tinamit Efraín. Re' Absalón xuyuq'eej taqe chi wi'k ruuk' chu'nchel i rak'uun i reey David. 24Eh xooj wo' chi q'orob'jiik i reey David je' wili i xuq'or reh: Yu'naak taqe i numoso k'ahchi' kiyok'om i kiij taqe i nutentzuun, re' hin inwaaj naq chi re' hat reey awuch'ihil taqe i kikamanik awuuk' nee tiooj hi'loq wuuk' i hin, hin awaj kamanoom, inki. 25Eh re' reey David je' wili xuq'or: Ma' chih taj wak'uun ma' rub'an taj chi yohb'aal wach k'ihaal i saach neena a'n, inki. Re' Absalón k'ih pech xuq'or reh i rajaaw chi narojiik, eh re' reh xama' xooj ta wo' hoq xa xukuxisaj la' reje. 26Eh re' Absalón je' wili xuq'or reh i rajaaw: Wila' ma' ruyeew riib' chi nee tiooj i hat chayeew q'ab' chi neenooj hi'loq wuuk' i Amnón i was, inki. Eh re' David xupahqaaj reh i Absalón chi je' wili: ¿Chib'ih inawaaj chi riij chi neenooj hi'loq awuuk' i Amnón? inki. 27Eh re' Absalón k'ih pech xupahqaaj korehtaal xuyeew q'ab' i reey chi xooj i Amnón ruuk' i Absalón, je' wo' chu'nchel i rak'uun i reey. 28Re' Absalón je' wili xuq'or reh taqe i rumoso: Re' hin i nupahqaaj otob'il taq noq nee taq inawil chi xohk'reel chik i Amnón, noq nee i nuq'or taq aweh chi nee taq i na a'n reh i Amnón cha kansaj taq. Eh mat yo'jik taq ruum re' hin kinq'orik taq aweh, cha chop taq ak'ux chakowej taq awiib', inki. 29Eh re' taqe i rumoso i Absalón xkian wo' hoq i xq'orarik keh xkikansaj i Amnón. Noq xkilow chi je' re' taqe i ruk'uliil i rak'uun i reey David xijohtik chi riij i kikawayu xkimol chi elik. 30Eh noq wilkeeb' reje wach b'eeh xponik rib'iral ruuk' i David chi xikanteesjik chu'nchel i rak'uun ruum i Absalón, eh chi ma' jino'q chik i xi kahnik chi k'achalkeeb'. 31Noq xrib'iraj chi je' re' i reey David xwuktik johtoq xuxih i ruso' chi riij, eh xuk'ut riib' wach ak'al ruum i ruti'kiil ruk'ux. Eh chu'nchel i kikamanik ruuk' xkixih i kiso' chikiij. 32Eh re' i Jonadab i rak'uun i ras i David je' wili i xuq'or: Re' taqe awak'uun ma' xikimik ta chu'nchel, xa re' wo' hoq i Amnón xukansaj i Absalón. Ruum re' reh xanoq wo' je' re' i ruyejaam wach noq re' i Amnón xuchop i Tamar, re' i ranaab'. 33Je' re' noq manimaj aha' wilik inkiq'or aweh korik chi ma' xikimik ta chu'nchel i awak'uun, xa re' wo' hoq i Amnón xkimik, inki. 34Noq re' Absalón xumol chi elik re' i soldado wilik chi cha'jinik xukoj rehtaal chi k'ih taqe i qajik inki a'n cho wach yuuq' chupaam i b'eeh inooj Horonaim. 35Eh re' i Jonadab je' wili i xuq'or reh i reey David: Chawil re' taqe i wulu' awak'uun qajik inki a'n chaloq je' rukab' i xnuq'or aweh i hin, hin awaj kamanoom, inki. 36Eh noq xkikohlaaj i q'orik taqe i re' noq xiooj k'oloq taqe i rak'uun i reey David, xkik'er kichii' chi oq'ik je' wo' hoq i reey xuk'er wo' chii' chi oq'ik, je' wo' taqe i kikamanik ruuk' i reey xkik'er wo' kichii' chi oq'ik. 37Re' Absalón xumol chi elik xooj Gesur ruuk' i reey Talma i rub'ihnaal rak'uun i Amiud. Eh re' i reey David eqal eqal inoq'ik chi riij i rukimiik i Amnón, re' i rak'uun. 38Noq xelik i Absalón xooj Gesur ar xwihik chuwach ixib' haab'. 39Eh noq ik'inaq chik i ruti'kiil ruk'ux i reey David chi riij i rukimiik i Amnón i rak'uun xchalik paruk'ux chi q'e' raaj xraaj rilom wach i Absalón, re' i rak'uun.

will be added

X\