2 SAMUEL 10

1Koq'uun chik xkimik reje i Nahas re' i kireey i aj Amón, eh re' chik Hanún i rak'uun xokik chi kireey. 2Re' reey David je' wili i xuq'or: Re' hin naa nuwihiik panotob'il ruuk' i Hanún, je' rukab' noq xinwihik panotob'il ruuk' i Nahas i rajaaw, inki. Eh xutaq'aaj taqe i aj taqareel i David ruuk' i Hanún reh i ruye'ariik rusuqkiil ruk'ux ruum koxkimik i rajaaw. Eh noq xi ponik i taqareel chupaam i kitinamiit i aj Amón, 3re' taqe i k'amal kib'eeh i aj Amón je' wili xkiq'or reh i Hanún: ¿Mi nanimaj i hat chi re' reey David xutaq'aaj taqe chaloq i aj taqareel wili chi ruye'ariik i rusuqkiil ak'ux xa ye'b'al runimaal wach i kamnaq awajaaw? Noq inqaq'or i hoj chi xa ilool xakojol taqe rehtaliil nik' wach noq wilik i qatinamiit, eh neenchalik rusach wach, inki taqe. 4Noq xrib'iraj i Hanún chi je' re' xuchop taqe i raj taqareel i David xujoy iloq i yejaal i kusinchii', eh xuyok' panyejaal i kiso' xponik kopan kaa' johtoq, chi riij i re' xutaq'aaj taqe reje. 5Eh noq xunab'eej i reey David chi je' re' xkik'ul i raj taqareel xutaq'aaj kik'ulariik ruum ma' k'isiin ta xchalik kik'ixiik. Eh xutaq'aaj ruq'orariik keh chi kikahnoq pee Jericó korehtaal ink'ihik i kusinchii' koraj neekisutinik cho re', inki. 6Re' taqe i aj Amón xkireq chi riij chi xkikanaa' kiib' panixowaal ruuk' i reey David xkitoj reje juninaq miil chi soldado aj Sirio re' wilkeeb' chupaam i kiib' chi tinamit re' Bet-rehob, re' i Soba. Eh xkitoj wo' hoq i kireey i aj Maaca, ruch'ihil i jinaj miil chi ru soldado. Je' wo' hoq i kab'laj miil chi soldado aj Is-tob. 7Eh noq xunab'eej i David xutaq'aaj i Joab ruch'ihil taqe i ru soldado kow kiib' chi q'aq'inik. 8Re' taqe i ki soldado i aj Amón xooj i kiyejaam kiib' chi q'aq'inik panookb'al reh i tinamit. Eh re' taqe i ki soldado i aj Sirio wilkeeb' chupaam taqe i tinamit Soba, re' i Rehob, ruch'ihil i ru soldado i aj Maaca, ruch'ihil i ki soldado Is-tob xooj chi q'aq'inik chupaam taqe i ye'aab'. 9Noq xrilow i Joab chi naakokiik cho chuwach chi naakokiik cho chi riij i aj q'aq'ineel xusik' kiwach chi kixilak i aj Israel taqe i soldado kow kiib' chi q'aq'inik reh i kik'ulb'ejiik taqe i ki soldado i aj Sirio. 10Eh re' Joab xukoj i ruchaaq' Abisai i rub'ihnaal chi k'amal kib'eeh i kiqox i soldado reh chi xooj kik'ulb'ilej taqe i aj Amón, 11je' wili i xuq'or reh i ruchaaq': Wila' xtohq'ik kiq'atam nuwach i aj Sirio nee ti chalik chi nutoob'jiik i hat. Eh wila' xtohq'ik kiq'atam awach i aj Amón i hat nee kinooj chi atoob'jiik. 12Kow-oq ak'ux qachop qak'ux chi ruko'ljiik i qatinamiit Israel, re' wo' rutinamiit i QaJaaw Dios. Eh nee ta naq i rub'an chee QaJaaw Dios i ruk'ul chuwach i reh, inki. 13Je' re' noq re' i Joab xooj reje chuwach chi kik'ulb'ejiik i ki soldado i aj Sirio, xa re' la' re' i aj Sirio xkimol chi elik chuwach. 14Eh noq xkilow i kisolado i aj Amón chi xkimol chi elik i ki soldado i aj Sirio chuwach i Joab, xkimol wo' chik elik i keh chuwach i Abisai xooj kikeb'aa' kiib' pan kitinamiit. Eh re' i Joab xukanaa' i q'aq'inik kuuk' i aj Amón xsutinik reje Jerusaleem. 15Eh noq xkilow i ki soldado i aj Sirio chi xb'aan keh ruum i ki soldado i aj Israel xkimol wo' chik kiib' ruka'peech. 16Eh re' i reey Hadad-ezer xutaq'aaj kik'amariik i ki soldado i aj Sirio wilkeeb' chi juntar i nim ha' Éufrates. Re' keh xi ponik chupaam i ye'aab' Helam re' i Sobac peet reje chikiwach re' wo' hoq i k'amal kib'eeh taqe i ru soldado i Hadad-ezer. 17Noq xrib'iraj i reey David ximol kiwach i ki soldado aj Israel xiooj xi q'ahxik chi juntar i nim ha' Jordán xi ponik chupaam i ye'aab' Helam. Eh xtohq'ik kik'ulb'ilem taqe i ru soldado i David taqe i ki soldado i aj Sirio. 18Xa re' la' re' i ki soldado i aj Sirio xkimol chi elik chikiwach taqe i ki soldado i aj Israel. Eh re' David ruch'ihil taqe i ru soldado xukansaj i ka'winaq miil chi ki soldado i aj Sirio haa' i Sobac k'amal kib'eeh, re' i rij kawáyu wilkeeb', eh kikansaj wo' hoq i wuquub' siento wilkeeb' pan kareta. 19Eh noq xkilow taqe i reey k'ahchi' naq kitowiik reh Hadad-ezer chi xb'aan keh ruum i ki soldado i aj Israel, xkik'am kiib' panotob'il kuuk' i ki soldado i aj Israel, xi kahnik chi ri'sil i kajaawriik. Eh re' i ki soldado i aj Sirio ma' xkaaj ta chik kitoob'eem taqe i aj Amón ruum chalik kiyo'jiik.

will be added

X\