1 Eh noq wilik chi reyil i Joacim Judá, re' i Nabucodonosor kireey i aj Babilonia, xchalik chi q'aq'inik ar Judá. Eh re' i Joacim ixib' haab' xwihik chi ri'sil i rajaawriik i reey re' re', chi riij i re' ma' xunimaj ta chik. 2 Xa re' la', re' i QaJaaw Dios xutaq'aaj taqe chaloq i aj Babilonia, i aj Siria, i aj Moab, i aj Amón chi q'aq'inik kuuk' i aj Judá reh chi xsacharik kiwach je' rukab' i xq'orarik keh ruum i QaJaaw Dios ruuk' kichii' taqe i raj kamanoom, re' taqe jalal ruq'oral. 3 Xti korik noq re' i ti' k'axik wili re' i QaJaaw Dios xye'wik cho chikinaah i aj Judá, ruum chu'nchel i yiib' wach na'ojb'al xub'an i reey Manasés. 4 Ruum chi re' i Manasés ma' kisiin taqe i ma' xta kimahk xukansaj chupaam i tinamit Jerusaleem ruum i re' ma' xkuyarik ta chik i kimahk ruum i Dios. 5 Re' taqe i ruk'uliil i xub'an i reey Joacim, je' wo' chu'nchel i xub'an tz'ihb'amaj rehtalil chupaam taqe i huuj reh i Crónicas. Re' wo' tz'ihb'amaj wii' i rehtalil i xkian taqe i xi wihik chi reyil Judá. 6 Eh noq xkimik reje i reey Joacim xooj rureq taqe i rumaam rati't, re' chik i Joaquín i rak'uun xokik chi reyil chi jilow. 7 Re' i kireey i aj Egipto ma' kota chik xelik chi q'aq'inik ruum re' i kireey i aj Babilonia xrehchaaj chik chu'nchel i ye'aab' k'ahchi' naq chi q'aq'inik chi riij. Ar xtohq'ik reje chi chii' i nim ha' i nelik cho Egipto, korehtaal xponik chi chii' i nim ha' Éufrates. 8 Re' i Joaquín waxaqlaj haab' i wilik reh noq xokik chi reyil, eh xa ixib' wo' poh xwihik chi reyil Jerusaleem. Re' i rutuut Nehusta i rub'ihnaal rixq'uun i Elnatán aj Jerusaleem. 9 Re' i reey Joaquín xa re' i ma' holohik ta laj na'ojb'al xub'an chuwach i QaJaaw Dios, je' rukab' i xub'an i rajaaw. 10 Eh chupaam taqe i q'iij re' re' xi chalik q'aq'ineel Jerusaleem i raj kamanoom i Nabucodonosor kireey i aj Babilonia. Eh xkikotej riij i tinamit. 11 Eh noq kikotem chik riij i tinamit Jerusaleem taqe i raj kamanoom i Nabucodonosor xchalik wo' chi q'aq'inik i reey Nabucodonosor. 12 Re' i Joaquín i kireey i aj Judá, ruch'ihil i rutuut, ruch'ihil taqe i k'amal kib'eeh, ruch'ihil taqe i nimaq wach kikamaj ruuk', ruch'ihil taqe i xti reht'al kiwach xichoparik reje ruum i Nabucodonosor kireey i aj Babilonia. Re' noq waxiqiib' haab' rokiik chi reyil i Nabucodonosor. 13 Re' reh xresaj taqe cho parupaat i QaJaaw Dios chu'nchel i k'ih taq tz'aq, je' wo' taqe i wilkeeb' chupaam i rupaat i reey i rub'an wii' taaq'anik, je' rukab' i ruq'orom i QaJaaw Dios. Eh xkuxik rupaxem taqe i kulk, je' wo' chu'nchel i kikamanik parupaat i Dios. Re' taqe i ruyejaam ruuk' oro i Salomón kireey i aj Israel. 14 Re' Nabucodonosor xuk'am taqe reje Babilonia chu'nchel i aj Jerusaleem xuk'am taqe reje i k'amal kib'eeh, je' wo' taqe i soldado, je' wo' taqe i kichol i xa chib'ih jariik kamanikaal. Je' wo' taqe i ch'eyel ch'ihch'. Korehtaal xi ponik lajeeb' miil, chu'nchel i xuk'am reje, ma' xta chik i xi kahnik Jerusaleem. Ach wo' re' taqe i q'e' neb'aa' xi kahnik. 15 Re' Nabucodonosor xuk'am reje Babilonia i reey Joaquín je' wo' hoq i rehk'een, je' wo' hoq i rutuut, je' wo' taqe i nimaq wach kikamaj ruuk' i reey, je' wo' hoq i nimaq kiwach winaq wilkeeb' Jerusaleem, xkuxik ruk'amam taqe reje. 16 Eh chu'nchel i xuk'am reje Babilonia wuquub' miil, eh jinaj miil taqe i wilik kina'ojb'al chub'anariik i xa chib'ih jariik kamanikaal ruch'ihil taqe i ch'eyel ch'ihch', taqe i soldado kow kiib' chi q'aq'inik. 17 Re' i reey Nabucodonosor, re' chik i Matanías rikaan i Joaquín xupab'aa' chi reyil Judá chi jilow i Joaquín. Eh xujal wach i rub'ihnaal i Matanías, Sedequías chik i rub'ihnaal xukoj. 18 Re' Sedequías jinaj ru ka'winaq haab' i wilik reh noq xokik chi reyil, eh junlaj haab' xwihik chi reyil Jerusaleem. Re' rutuut Hamutal i rub'ihnaal rixq'uun i Jeremías aj pan tinamit Libna. 19 Re' i reey Sedequías xa re' i yiib' wach na'ojb'al i xub'an chuwach i QaJaaw Dios, je' rukab' i xub'an i reey Joacim. 20 Ruum i re' xchalik rujosq'iil i QaJaaw Dios chikinaah i aj Jerusaleem chikinaah i aj Judá. Korehtaal xuk'am taqe reje pan tokoom tinamit chi kunchelaal. Eh re' i Sedequías xub'an i q'aq'inik ruuk' i kireey i aj Babilonia.
