2 REYES 20

1Chupaam taqe i q'iij re' re' xchoparik ruum i runimaal yab'ilaal i reey Ezequías. Eh xooj k'oloq ruuk' i Isaías jalal ruq'oral i Dios rak'uun i Amoz, je' wili i xuq'or reh: Re' QaJaaw Dios je' wili xuq'or aweh: Chayejaa' kahnoq chib'ih jariik i naa ayejaam wach panapaat ruum naa akimiik ma' naa ta chik ak'aachjiik, inki. 2Eh noq xrib'iraj chi je' re' i reey Ezequías xusutej i koq i wach, wach tz'aq xub'an rutiij je' wili i xuq'or. 3QaJaaw Dios re' hin i nupahqaaj otob'il aweh chi k'oloq cho panak'ux chi xatnunimaj ruuk' i rukorkiil wach nuk'ux, eh xnub'an wo' chu'nchel i wánima taqe i xaq'or weh, inki, eh xasuq suq chik inoq'ik. 4Eh re' i Isaías noq xakomajaa' wo' i nelik cho chi chii' i paat i rub'an wii' i taaq'anik i reey xq'orob'jik cho ruum i QaJaaw Dios, je' wili i xq'orarik reh: 5Tisutinoq wo' chik reje ruuk' i Ezequías i k'amal rub'eeh i nutinamiit, je' wili i cha q'or reh: Re' i QaJaaw i qaDios, i ruDios i David i xikin cho aamaam je' wili ruq'or: Re' hin xb'iraj chik atiij xwilow chik i riis naq'awach. Re' hin naa kaat nuk'achrisam, paroox q'iij naa ajohtiik chupaam i nupaat. 6Re' hin ko ho'lajuuj chik haab' naa nutiqim rooq ak'achariik, naa kaat nuko'leem i hat, naa nuko'leem i tinamit Jerusaleem pan q'ab' i kireey i aj Asiria. Re' hin naa nuko'leem i tinamit re' re' k'axb'al reh i nub'ihnaal i hin, eh k'axb'al reh i rub'ihnaal i David waj kamanoom, inki Dios. 7Re' i Isaías je' wili i xuq'or: Chake'j taq k'isinoq wach i higo netaq inakoj chuwach i ruyab'ilaal reh chi neenk'aachjik. 8Re' reey Ezequías rupahqaam naq chik reh i Isaías chi je' wili: ¿Chib'ih jariik i rehtaliil neenwil chi re' QaJaaw naa ruk'achrisaniik weh, eh chi paroox q'iij naa nub'anam ojik parupaat i Dios? inki. 9Re' i Isaías je' wili xuq'or: Re' i wili i rehtaliil naa ruk'uhtaam aweh i QaJaaw, neenaq'or aha' wilik inawaaj. ¿Mi re' chi nenooj chi jumehq'iil i q'iij chuwach i ho'oob'-oq ora, oon re' chi neensutinik chi riij ho'oob'-oq ora? inki. 10Re' reey Ezequías je' wili xuq'or: Chi nee nooj chi jumehq'iil q'iij chuwach ho'oob'-oq ora ma' k'axik taj. Chi neensutinik chi riij ho'oob'-oq ora ra'j k'axik re', inki. 11Eh re' i Isaías jalal ruq'oral i Dios xupahqaaj reh i QaJaaw Dios chi naa ruk'uhtaam rehtaliil. Eh re' i Dios xub'an wo' hoq chi xsutinik chi riij i q'iij ho'oob' ora, je' rukab' i ruk'uhtaaj i rilow wii' ru ora i Acaz. 12Chupaam taqe i q'iij re' re', re' kireey i aj Babilonia Merodac-baladán rak'uun i Baladán xrib'iraj chi yowab'jik i reey Ezequías xutaq'aaj taqe i raj taqareel re' chi xkik'am reje ruhuuj, eh xkik'am wo' reje rukooch. 13Re' reey Ezequías xuk'ul taqe i aj taqareel, eh xuk'uhtaaj keh i rub'ehomal, xuk'uhtaaj keh i oro i plata, ink'ohnik laj iq'oom i aseite k'ih tz'aaq. Eh xuk'uhtaaj keh i tz'a'amb'al reh q'aq'inik je' wo' chu'nchel i rumolom panye'aab' reh. Eh chu'nchel xuk'uhtaaj keh i wilik parupaat i rub'an wii' i taaq'anik, je' wo' hoq i wilkeeb' chupaam i tinamit ruchopom naah. 14Eh re' i Isaías jalal ruq'oral i Dios xooj ruuk' i reey Ezequías xupahqaaj reh chi je' wili: ¿Aha' xi chalik taqe i winaq wili? ¿Chib'ih i xkiq'or aweh? inki. Re' i Ezequías je' wili xuq'or: Re' taqe winaq wili chi najt yuuq' xi chalik kopan tinamit Babilonia, inki. 15Re' Isaías xupahqaaj wo' chik reh i Ezequías chi je' wili: ¿Chib'ih jariik i xkilow wach chupaam apaat? inki. Re' i Ezequías je' wili xuq'or: Re' hin xnuk'uhtaaj keh chu'nchel i nub'ehomal wilkeeb' ar ma' xtaj i xkahnik chi ma' ta xkilow wach, inki. 16Re' i Isaías je' wili i xuq'or reh i Ezequías: Chab'iraj i xuq'or weh i QaJaaw Dios chi je' wili: 17Naa ruponiik i q'iij chi chu'nchel i kimolom cho wach aamaam awati't wilik yu'naak chupaam i aapaat i na a'n wii' i taaq'anik naa ruk'amariik reje Babilonia ma' xta chik i naa rukahniik ayu'. 18Eh naa wo' kik'amariik reje Babilonia taqe awak'uun awixq'uun. Re' keh naakikanab'jiik chi kapuun taqe, ar naa kiwihiik chupaam i paat i rub'an wii' i taaq'anik i kireey i aj Babilonia, inki i Dios. 19Re' i reey Ezequías xupahqaaj reh i Isaías chi je' wili: ¿Mi holohik i ruk'am chaloq i ruq'oral i QaJaaw Dios xaq'or weh? inki. Ruum re' reh xraaj chi konaa ruwihiik i rusuqkiil k'uxliis, suq laj wihik nik' chik najtiil naa ruk'achariik i reh. 20Eh re' taqe ruk'uliil i xub'an i reey Ezequías, eh nik' wach noq xuyejaa' i nimlaj molb'al ha', eh noq xuyejaa' i rooq ha' xokik pan tinamit, tz'ihb'amaj rehtalil chupaam taqe huuj reh i Crónicas, re' wo' tz'ihb'amaj wii' rehtaliil i xkian taqe i xi wihik chi reyil Judá. 21Re' i reey Ezequías xkimik reje xooj taqe rureq i rumaam rati't. Eh re' chik i Manasés i rak'uun xkahnik chi reyil chi jilow.

will be added

X\