2 REYES 11

1Noq re' i Atalía i rutuut i reey Ocozías xrib'iraj rib'iral chi xkimik i Ocozías xutaq'aaj rukanteesjiik chu'nchel i rak'uun i reey Ocozías. 2Re' i Josaba rixq'uun i reey Joram ranaab' i Ocozías xresaj i Joás re' chaq'b'ees rak'uun i Ocozías chi kixilak i rak'uun i Ocozías i k'ahchi' kikanteesjiik, xukeb'aa' chuwach i Atalía pan warb'al ruch'ihil inq'uninik reh, xa je' chik re' noq ma' xkanteesjik taj i Joás ruum i Atalía. 3Re' i Josaba xukeb'aa' i Joás chupaam i rupaat i Dios chuwach i waqiib' haab' nik' najtiil xwihik chi reyil i Atalía chinaah i tinamit. 4Eh paruwuuq haab' chik, re' i Joiada i k'amal kib'eeh aj tiij xutaq'aaj kik'amariik i kajaaw soldado, taqe i soldado, i aj cha'joom. Eh noq xi ponik xukoj taqe i koq chupaam i rupaat i Dios. Eh ar xkiyejaa' wach chib'ih i naa kianam, eh xkiq'or i xti korik parub'ihnaal i QaJaaw Dios. Chi riij i re', re' i Joiada xuk'uhtaaj keh i Joás rak'uun i Ocozías. 5Eh je' wili i xuq'or keh: Re' taq i hat oxch'uq taq naa awesam i soldado re' kib'anik i cha'jinik pan hi'limb'al q'iij, junch'uq taq i naa akojom chi cha'jinik chupaam i paat i rub'an wii' i taaq'anik i reey. 6Eh junch'uq taq i nee nakoj chi cha'jinik panookb'al reh Shur. Eh re' i junch'uq chik nee taq inakoj chi cha'jinik chi junsuut i kiye'aab' i soldado, chi je' re' nee taq i naa a'n rucha'jaljiik i paat imb'aan wii' i taaq'anik. 7Eh re' taqe i ka'ch'uq chi soldado ma' naa ta kianam i cha'jinik pan hi'limb'al q'iij naa taq akojom chi cha'jinik reh i rupaat i Dios chucheel i reey Joás. 8Eh naa taq akojom chi cha'jinik chi junsuut i reey. Eh kichopom kiq'aslaj ch'ihch' chi kiju'junaal. Eh xa awach pa' i naa ruminim i koq riib' chi kixilak naa kikansam. Re' taqe soldado re' re' xa aha' pa' naa rojiik i reey Joás naa kojiik chi riij, inki. 9Re' taqe kajaaw soldado xkian wo' hoq i xq'orarik keh ruum i Joiada k'amal kib'eeh aj tiij. Chi kiju'junaal xkichop i kitaaq'anik chinaah taqe i ki soldado. Chi je' taqe kiokik chi cha'jinik chupaam i hi'limb'al q'iij chi je' taqe i kielik chi cha'jinik chupaam i q'iij re' re' xiooj ruuk' i Joiada k'amal kib'eeh aj tiij. 10Eh re' i k'amal kib'eeh aj tiij xuq'asaj keh i kajaaw soldado taqe q'aslaj ch'ihch' nimaq pulato ch'ihch' ko'lb'al iib' re' taqe i molooj parupaat i Dios, re' taqe i xkamanik cho reh i reey David. 11Re' taqe i soldado xi kojarik chi cha'jinik parumuuj reje reh i rusak'aaj i rupaat i Dios, eh parumuuj reje reh i rutz'eet i rupaat i Dios. Xikojarik wo' chi cha'jinik chi junsuut i artaal parupaat i Dios. Eh kichopom kiq'aslaj ch'ihch' chi kiju'junaal chi rucha'jaljiik i reey Joás. 12Eh re' i Joiada xresaj chee Joás rak'uun i reey Ocozías, xukoj i corona wach naah, xkijalk'iij i aseite wach naah xkipab'aa' chi reey xkiyeew pan q'ab' i huuj reh i k'uhb'aal. Eh xkipoq'poteej paam i kiq'ab' xkik'er kichii' chi q'orariik chi je' wili: Najt ta naq neenk'acharik i qareey, inki taqe. 13Eh re' i Atalía noq xrib'iraj chi k'erik kichii' i soldado ruch'ihil i tinamit xooj parupaat i Dios i wilkeeb' wii' chu'nchel i re'. 14Re' i Atalía xrilow chi pa'lik i reey wach rooq i paat, je' rukab' i okrinaq taqe wii' i kiokik chi reyil. Eh re' reey Joás wilkeeb' i koq chi junsuut i kajaaw i soldado, je' wo' taqe i kixulinik reh i tuun. K'ahchi' kixulem i kituun, chu'nchel i tinamit xasuq chik kik'ux. Noq xrilow chi je' re' i Atalía xuxih i ruso' xuk'er chii' chuq'orariik chi je' wili: Xinajot' taq, xinajot' taq, inki. 15Eh re' Joiada k'amal kib'eeh i aj tiij je' wili i xuq'or keh i kajaaw i soldado: Chawesaj taq reje i Atalía chi muuj i rupaat i Dios, eh awach neentahqinik reje reh nee taq inakansaj, inki. Je' re' xuq'or i Joiada k'amal kib'eeh aj tiij ruum ma' xraaj taj chi xkikansaj i Atalía chupaam i rupaat i Dios. 16Re' taqe i soldado xkichop i Atalía ixoq reey xkiteh reje rub'eeh i ki-ik'ik wii' taqe i wilkeeb' chi riij i kawáyu noq kiokik chupaam i paat imb'aan wii' taaq'anik, eh ar xkikansaj. 17Eh re' i Joiada wilik i xuyejaa' wach ruuk' i Dios, eh je' wo' ruuk' i reey Joás, je' wo' kuuk' i tinamit. Eh je' wo' hoq i reey wilik wo' xuyejaa' wach kuuk' i tinamit, xuq'or keh chi naa kikahniik chi rutinamiit i Dios. 18Eh chu'nchel i tinamit xi okik i koq chupaam i rupaat i tiyoox Baal xkikut wach ak'al. Eh xkixereb'eej wo' chu'nchel i artaal, xkixereb'eej wo' wach ak'al i chu'nchel i xatz'aqoj tiyoox. Eh xkikansaj chuwach i artaal i Matán re' k'amal b'eeh aj tiij chuwach i Baal. Re' i Joiada i k'amal kib'eeh aj tiij xukoj taqe i soldado chi cha'jaljiik i rupaat i Dios. 19Eh re' i Joiada ruch'ihil taqe i k'amal b'eeh ruch'ihil taqe i kajaaw i soldado ruch'ihil chu'nchel i tinamit xkesaj reje reey Joás parupaat i Dios ar ki-ik'ik reje i kiokik wii' i soldado noq xkik'am i koq chupaam i paat i rub'an wii' i taaq'anik i reey ar xkitzunaa' i reey Joás paruye'aab'. 20Eh chu'nchel i tinamit xsuuqb'ik kik'ux, xi wihik pansuqkiil k'uxliis ruum xkikansaj i Atalía ma' najt ta ruuk' i paat i rub'an wii' i taaq'anik i reey. 21Eh re' i Joás wuquub' haab' i wilik reh noq xokik chi reyil ar Judá.

will be added

X\