2 CRONICAS 36

1Re' i tinamit xkipab'aa' i Joacaz rak'uun i Josías chi reyil Jerusaleem chi jilow i rajaaw. 2Re' Joacaz ixib' ru ka'winaq haab' i wilik reh noq xokik chi reyil. Eh xa ixib' wo' poh xwihik chi reyil Jerusaleem. 3Eh re' i kireey i aj Egipto x-esanik reh i Joacaz chi reyil Jerusaleem. Re' i kireey i aj Egipto xumin taqe chupaam i tinamit Judá chi xkitoj oxlaj ru kajwinaq kintaal i plata, eh ixib' aroba i oro. 4Eh re' i kireey i aj Egipto xupab'aa' chi kireey i aj Judá, i aj Jerusaleem i Eliaquim, re' i ruchaaq' i Joacaz xujal i rub'ihnaal Joacim chik i rub'ihnaal xukoj. Eh re' Necao i kireey i aj Egipto xuk'am reje Egipto i Joacaz i ras i Joacim. 5Re' Joacim ho'oob' ru ka'winaq haab' i wilik reh noq xokik chi reyil. Eh junlaj haab' xwihik chi reyil Jerusaleem, eh xa re' i yiib' wach na'ojb'al xub'an chuwach i ruDios. 6Re' i Nabucodonosor kireey i aj Babilonia xchalik chi q'aq'inik kuuk' i aj Judá xuchop i Joacim xub'ak' reje wach chi karena xuk'am reje Babilonia. 7Re' Nabucodonosor wilik wo' taqe i xa chib'ih jariik inkamanik parupaat i QaJaaw Dios xuk'am reje Babilonia xuyeew chupaam i rupaat i rutiyoox i reh. 8Eh re' taqe ruk'uliil i xub'an i reey Joacim, ruch'ihil i ma' holohik taj xub'an tz'ihb'amaj rehtaliil chupaam i kihuuj i xi wihik cho chi reyil Israel i xi wihik cho chi reyil Judá. Eh re' chik i Joaquín i rak'uun xokik chi reyil chi jilow. 9Re' Joaquín waxiqiib' haab' i wilik reh noq xokik chi reyil. Eh xa ixib' wo' poh ruuk' lajeeb' q'iij xwihik chi reyil Jerusaleem. Xa re' i yiib' wach na'ojb'al xub'an chuwach i QaJaaw Dios. 10Eh noq xponik i jinaj haab', re' reey Nabucodonosor xuq'or chi naa ruk'amariik reje Babilonia i Joaquín chi naa ruk'amariik taqe i xa chib'ih jariik k'ih taq tz'aaq inkamanik parupaat i Dios. Re' chik i Sedequías, ma' tokoom ta ruuk' i Joaquín xupab'aa' chi reyil ar Judá, i Jerusaleem. 11Re' Sedequías jinaj ru ka'winaq haab' i wilik reh noq xokik chi reyil. Eh junlaj haab' xwihik chi reyil Jerusaleem. 12Eh xa re' i yiib' wach na'ojb'al xub'an chuwach i ruDios. Ma' xuloch' ta riib' chuwach i Jeremías jalal ruq'oral i Dios re' ixq'orik reh chib'ih iraaj i Dios. 13Re' Sedequías xuq'etwachej riib' chuwach i reey Nabucodonosor xuchuk reh i q'orik ruum ma' xub'an taj i xuq'or reh parub'ihnaal i Dios chi naa naq rub'anam. Eh ma' xraaj ta rub'anariik aha' wilik iraaj i QaJaaw i qaDios i hoj, hoj aj Israel. 14Eh chu'nchel i kajaaw i k'amal kib'eeh aj tiij, je' wo' taqe i tinamit xkitiq naah rub'anariik i yiib' wach na'ojb'al. Xkian keh je' rukab' inki a'n i tokoom tinamit ma' kinimanik ta ree Dios. Ruuk' taqe xkian re' re' xkich'uwa'reej paam i rupaat i Dios, re' i rusik'im wach chi santo laj ruye'aab' ar Jerusaleem. 15Re' i QaJaaw i ki Dios i qamaam qati't k'ih pech xutaq'aaj taqe i raj taqareel chi kik'uhb'aljiik, ruum xuketelaaj wach i rutinamiit ruum ar wilik i rupaat. 16Xa re' la' re' keh xkikaqse'laaj i raj taqareel i Dios, ma' xponik ta panaq'kiwach i xkib'aj ma' xkiyeew ta kajaawriik taqe i raj taqareel. Korehtaal xuyeew chee rujosq'iil i QaJaaw Dios chikinaah, ma' kota chik xkuyarik kimahk. 17Ruum i re', re' i QaJaaw Dios xuk'am chaloq i kireey i aj Babilonia reh chi xikanteesjik taqe i k'ijool ruuk' q'aslaj ch'ihch' chupaam i rupaat i Dios. Ma' xkiketelaaj ta wach taqe i kok' q'ahxoq, taqe i mama' winaq, ati't ixoq, taqe i ma' kichol ta b'ehik. Chu'nchel xuq'asaj taqe pan q'ab' i reey. 18Eh chu'nchel i xa chib'ih jariik inkamanik parupaat i Dios chi nimaq chi kok' taq xuk'am reje i kireey i aj Babilonia parutinamiit. Eh xkik'am reje taqe i k'ih taq tz'aaq' wilik parupaat i Dios, wilik parupaat i reey, wilik pankipaat taqe i nimaq wach kikamaj ruuk'. 19Eh xkik'at kahnoq i rupaat i QaJaaw Dios, xkich'a'aaj kahnoq wach ak'al i koraal tz'aq wilik chi riij i tinamit Jerusaleem. Eh xkik'at i paat i rub'an wii' taaq'anik i reey, xkiyojib'eej i xa chib'ih jariik q'e' naq inkik'ax i aj Judá. 20Eh nik' k'ihaal i ma' xikimik ta ruuk' q'aslaj ch'ihch' xuk'am taqe reje Babilonia i reey ar xumin taqe pankowlaj kamanik, ximinarik wo' pankowlaj kamanik i rak'uun, rixq'uun, xti koxponik chik i q'iij chi xb'aan keh i aj Babilonia kuum i aj Persia. 21Je' re' xb'aan, reh chi xooj eloq wach i ruq'orom chaloq i QaJaaw Dios ruuk' i chii' i Jeremías jalal ruq'oral i Dios noq xuq'or chi naa ruhi'liik ak'al, xhi'lik wo' hoq ruum ma' xta chik ixtikarik chupaam, korehtaal chik xik'ik i lajeeb' ru kajwinaq haab'. 22Eh pampeet haab' reh i rokiik chi reyil Persia i Ciro, reh chi xooj eloq wach i ruq'orom QaJaaw Dios i xuq'or ruuk' chii' i Jeremías jalal ruq'oral i Dios. Re' QaJaaw Dios xuq'or paránima i Ciro xutaq'aaj ruq'orariik ruuk' huuj chupaam chu'nchel i rutinamiit i k'uhb'aal i ruq'or chi je' wili: 23Re' Ciro i kireey i aj Persia je' wili xuq'or: Re' QaJaaw Dios wilik pan taxaaj xuyeew panuq'ab' chu'nchel i tinamit wach ak'al, xuyeew wo' panuq'ab' chi naa nuyejaam i rupaat i Dios ar Jerusaleem wilik ar Judá. Wila' hat taq rutinamiit i Dios, neerub'an chi nee taq tiooj Jerusaleem chi rutejeb'jiik i rupaat i Dios, re' ta naq i QaJaaw Dios neentoob'inik taq aweh, inki.

will be added

X\