2 CRONICAS 31

1Noq kuxinaq chik i ninq'iij, chu'nchel i aj Israel kimolom kiib' Jerusaleem xiooj chupaam taqe i tinamit wilkeeb' ar Judá. Eh xkiyojib'eej i nimaq ab'aj inkiloq'ej wii' taqe i tiyoox, xkipaxej i rujalwaach i Asera, xkiyoj wo' taqe i ye'aab' wilkeeb' chikinaah taqe inajt kinaah yuuq', je' wo' taqe i artaal wilkeeb' ar Judá, i riih rumaam i Benjamín, i riih rumaam i Efraín, i riih rumaam i Manasés. Eh re' taqe i aj Israel xiooj chi kiju'junaal pan kiye'aab', pan kitinamiit. 2Eh re' i reey Ezequías xuyeew taqe pankikamaj i ju'jun chi k'amal kib'eeh aj tiij, re' taqe i aj Levíta re' q'oreel chib'ih i kamanik kichol, wilik i xukoj taqe chi k'atoj mayiij, wilik i xukoj taqe chuq'ahteesjiik i mayiij k'amb'alkiib' panotob'il i tinamit ruuk' i Dios, wilik i xukoj taqe chi t'iosinik, wilik i xukoj taqe chi tz'uyinik panookb'al reh i rupaat i QaJaaw Dios. 3Eh re' reey xuyeew taqe i chikop xi k'atarik chi mayiij rajlaal wahq'eq, rajlaal xq'eq. Xuyeew wo' i chikop ink'atarik chi mayiij chupaam i hi'limb'al q'iij, je' wo' i chikop ink'atarik chi mayiij noq i ninq'ijik i ak' poh, je' wo' ink'atarik noq imb'aan i runimaal wach ninq'iij inkik'saj, je' rukab' i tz'ihb'amaj chupaam i ruk'uhb'aal i QaJaaw Dios. 4Re' i reey xuq'or keh i aj Jerusaleem chi naa kiye'em i kimayiij, re' i ruk'ul chi naakik'ulum i k'amal kib'eeh aj tiij, je' wo' taqe i aj Levíta. Reh chi neenkiq'asaj kiib' chi korik chupaam i rukamaj i Dios je' rukab' i ruq'or i ruk'uhb'aal. 5Eh noq xkib'iraj rib'iral i aj Israel i xuq'or i reey xiik' naah i wach i kitik i xkiyeew, eh xkiyeew wo' hoq i riis uuva, i aseite i riiskaab', i wach chu'nchel i kitik, xkiyeew wo' hoq i ju'jun i xkesaj ruuk' i lajeeb' i chu'nchel i chib'ih wilik keh, xiik' naah k'ihaal i xkiyeew. 6Re' taqe i aj Israel, i aj Judá wilkeeb' chupaam i ju'jun chi tinamit wilkeeb' ar Judá, xkiyeew wo' hoq i ju'jun i xkesaj ruuk' i lajeeb' i kiwakax, je' wo' hoq i kitentzuun. Eh xkiyeew wo' hoq i ju'jun xkesaj ruuk' i lajeeb' i chib'ih jariik i xkiq'asaj reh i QaJaaw Dios jinaj xkimulaa' wii'. 7Chupaam i roox poh reh i haab' xkitoq'aa' kimolom wach taqe re', eh ko chupaam i ruwuuq poh xkikohlaaj. 8Noq re' i reey Ezequías, ruch'ihil taqe i wilkeeb' chi taaq'anik xponik kilow nik' nimaal i xkimol wach xkiloq'ej i Dios, xkiyeew wo' ruloq'il i kitinamiit Israel. 9Eh re' i Ezequías xupahqaaj keh i k'amal kib'eeh aj tiij je' wo' taqe i aj Levíta aha' inchalik i mayiij tub'lik ar. 10Re' i Azarías k'amal kib'eeh aj tiij re' ruuk' taqe i rak'uun i Sadoc, je' wili chaq'wik xub'an: Xa re' wo' hoq i rutohq'iik cho kik'amam i kimayiij i tinamit chupaam i rupaat i QaJaaw Dios re' hoj juneliik wilik k'uxumb'al qeh korehtaal inqanujisaj qiib' chi korik, eh xqohxanik chi qawach. Chu'nchel i tub'lik wili re' i xqohxanik, xti korik wo' hoq chi re' Dios xukuxisaj chee rutinamiit, inki. 11Ruum aj re', re' i reey Ezequías xutaq'aaj ruyejeb'jiik parupaat i Dios molb'al reh i ruqox i mayiij re' re', eh xkorjik wo' hoq. 12Noq korjinaq chik xkimol i koq ar chu'nchel i ju'jun xkesaj ruuk' i lajeeb' chu'nchel i wach chib'ih keh, je' wo' hoq i xkiq'asaj reh i QaJaaw Dios. Eh re' i Conanias i aj Levíta xkipab'aa' chi ilil reh ruch'ihil i Simei i ruchaaq. 13Eh re' i reey Ezequías ruch'ihil i Azarías k'amal b'eeh chupaam i rupaat i Dios xkipab'aa' wo' chi kitoob'jiik taqe Conanias, i Simei, re' ruchaaq' winaq, je' wili kib'ihnaal: Jeihel, Azarías, Nahat, Asael, Jerimot, Jozabad, Eliel, Ismaquías Mahat, Benaía. 14Eh re' Coré i aj Levíta rak'uun i Imna, incha'jinik reh i puerta wilik reje parelb'aal q'iij. Re' wo' reh xk'ulwik reh i mayiij inchalik pankik'ux i tinamit chi nkik'am cho reh i Dios, re' wo' reh xpa'ab'jik chi ruch'aqariik i mayiij inkik'am cho reh i Dios, je' wo' chi rilariik taqe i xa chib'ih jariik wilik kisantohiil. 15Eh wilik wo' taqe winaq je' wili kib'ihnaal: Edén, Miniamín, Jesua, Semaías, Amarías, Secanías wilkeeb' pan kitinamiit i k'amal kib'eeh aj tiij re' i xitoob'inik reh i Coré chi ruch'aqariik paruwii' i chib'ih keh i k'amal kib'eeh aj tiij, chi wilik chik kihab'ul, chi komajaa' k'ih i kihab'ul. 16Eh xkich'aq keh taqe i kiokik parupaat i Dios chi kamanik rajlaal i q'iij re' q'oreel chib'ih i kikamaj i ju'jun. Re' taqe re' tz'ihb'amaj i kib'ihnaal chupaam i huuj i tz'ihb'amaj wii' i kib'ihnaal i ju'jun, eh kiokik haa' taqe i wilik keh ixib' haab' johtoq chikiwach i tz'ihb'amaj kib'ihnaal chupaam i huuj. 17Eh inkich'aq keh taqe i k'amal kib'eeh aj tiij i tz'ihb'amaj wii' i kib'ihnaal taqe i k'amal kib'eeh aj tiij, eh taqe i aj Levíta i wilik keh i juninaq haab' johtoq chikiwach, re' q'oreel nik' kik'ihaal chi kich'uhqaal, eh re' q'oreel chib'ih i kikamaj i ju'jun. 18Eh chi kixilak i tz'ihb'amaj i kib'ihnaal re' re' tz'ihb'amaj wo' haa' kib'ihnaal i kehk'een i kak'uun, kixq'uun, eh inkik'ul chib'ih keh ruum re' keh kiq'asam kiib' chub'anariik i rukamaj i QaJaaw Dios. 19Chupaam chu'nchel i tinamit xipa'ab'jik i xich'aqwik i chib'ih keh i k'amal kib'eeh aj tiij, re' ruuk' taqe i riih rumaam i Aarón, i wilkeeb' chupaam i ju'jun chi tinamit. Eh xkich'aq wo' chib'ih keh i aj Levíta tz'ihb'amaj i kib'ihnaal. 20Re' i reey Ezequías je' re' i xub'an chupaam i chu'nchel i tinamit Judá. Eh re' i rub'ehel, re' i rukorkiil re' i holohik laj na'ojb'al xub'an chuwach i QaJaaw Dios. 21Eh chu'nchel i xuyejaa' wach chi xb'aan i rukamaj i Dios chupaam i rupaat i Dios, xub'an i ruq'or i k'uhb'aal, ruum xusik' i Dios chu'nchel ruk'ux, ruum i re' holohik xelik ruuk' taqe i xub'an.

will be added

X\