2 CRONICAS 3

1Re' reey Salomón xutaq'aaj ruyejeb'jiik i rupaat i Dios Jerusaleem, chinaah i yuuq' Moriah. Re' i ye'aab' xuk'uhtaaj wii' riib' QaJaaw Dios chuwach i reey David i rajaaw, re' wo' ye'aab' ruyejaam kahnoq i David. Ar chupaam i ye'aab' i resaj wii' riij i rutrigo i Ornán i aj jebuseo. 2Re' Salomón xutaq'aaj ruyejeb'jiik i rupaat i Dios chupaam i kiib' rub'eeh i rukab' poh reh i rukaaj haab' rokiik chi reyil. 3Re' rupaat i QaJaaw Dios xuyejaa' i reey Salomón lajeeb' ru ka'winaq b'ara runimaal rooq, eh lajeeb' b'ara runimaal wach. 4Re' i peet muuj wilik panookb'al reh i rupaat i QaJaaw Dios lajeeb' b'ara runimaal rooq, eliik wach ruuk' i runimaal wach i rupaat i Dios, eh lajeeb' b'ara runajtiil naah. Eh re' Salomón xub'ur i koq wach chi manlik oro chu'nchel i rutz'aq'iil paam i muuj re' re'. 5Eh re' santo laj ye'aab' xub'ur i koq wach i rutz'aqiil wach ruuk' i tz'ilom chee' sohchaj. Eh xutz'ap i koq wach i tz'aq ruuk' xti manlik oro. Och'imaj wach ruuk' i chee' kalab', eh ruuk' i rehtalil karena. 6Eh xixoyej i koq wach i rutz'aqiil wach i paat ruuk' taqe i holohaq ab'aj, ruuk' taqe i xti holohaq oro. 7Je' wo' taqe rib'ojal, taqe chopolkeeb' wii' puerta, je' wo' chuwach taqe ru puertahiil. Eh xuyejaa' i je' kiwii' ánjel chuwach i tz'aq. 8Re' reey Salomón xuyejaa' wo' hoq i santo laj ye'aab' lajeeb' b'ara runimaal rooq. Eh lajeeb' b'ara i runimaal wach je' wo' runimaal wach i rupaat i Dios. Re' i xti manlik oro xkib'ur i koq wii' wach i rutz'aqiil hoob' siento kintaal. 9Re' kalawux korjinaq ruuk' oro ik'inaq jinaj libra rahliil i ju'jun. Eh xub'ur wo' wach ruuk' oro i rutz'aqiil i kok' paat wilkeeb' johtoq paruka'ch'iht i paat. 10Eh chupaam i ye'aab' wilik rusantohiil kiib' i je' kiwii' ánjel xuyejaa' ruuk' chee' xukoj oro chikiij. 11Lajeeb' b'ara rooq i kixiik' i je' kiwii' ánjel, ho' taq b'ara rooq i kixiik' chi ju'juntar, re' kixiik' imponik rureq wach i rutz'aqiil i paat, eh re' i ruxiik' juntar hoob' b'ara runimaal rooq imponik ruk'ul riib' ruuk' i ruxiik' i je' ruwii' ánjel jinaj. 12Eh je' wo' hoq i ruxiik' i je' ruwii' ánjel jinaj, hoob' wo' b'ara rooq i kixiik' chi ju'juntar imponik wo' rureq wach i rutz'aqiil i paat. Eh re' i ruxiik' juntar imponik ruk'ul riib' ruuk' i ruxiik' i je' ruwii' ánjel jinaj. 13Re' taqe i kiib' chi je' kiwii' ánjel kihe'em paam i kixiik' lajeeb' b'ara i rutz'apam i kixiik' chi kiju'junaal, eh pa'alkeeb' noq wilkeeb', ar kika'yik reje i wilik wii' santo laj ye'aab'. 14Eh xuyejaa' wo' hoq i nimlaj itz'ihy q'atb'al paam i ye'aab' wilik rusantohiil ruuk' i itz'ihy kemooj ruuk' inooq' q'eq jutik ru kaqiil raxmuqiik ruq'eqiil, eh kaq lino. Eh xuxoyej wach ruuk' i je' kiwii' ánjel. 15Eh xuyejaa' ki'ib' i pilalix wuqlaj b'ara ruuk' yejaal i b'ara i runimaal kooq kab'chel. Eh ju'jun i nimaq ch'ihch' kiib' b'ara ruuk' yejaal i b'ara runimaal kooq xukoj chikinaah kab'chel i pilalix re' re'. 16Eh xuyejaa' wo' taqe i jitz'ooj ch'ihch' xuyeew chinaah i nimaq ch'ihch' wilik chikinaah i kiib' chi pilalix, xuyejaa' jinaj siento i je' kiwii' wach granado xukoj chinaah i jitz'ooj ch'ihch'. 17Eh chuwach i rupaat i Dios xupab'aa' i kiib' chi pilalix, jinaj i xupab'aa' pansak'aaj, eh jinaj i xupab'aa' pantz'eet. Re' i xupab'aa' pansak'aaj reh i rupaat i Dios, Jaquín i rub'ihnaal xukoj, re' i xupab'aa' pantz'eet Boaz i rub'ihnaal xukoj.

will be added

X\