2 CRONICAS 22

1Re' taqe i aj Jerusaleem xkipab'aa' chi reey i Ocozías chi jilow i rajaaw Joram, ruum junch'uq taqe aj i leq' xi chalik chi kixilak i aj árabe xkichop naah i kiye'aab' i aj Judá. Eh xkuxik kikansam taqe aasb'ees rak'uun i Joram. Re' chik i Ocozías chaaq'b'ees rak'uun xokik chi reyil Judá chi jilow. 2Re' Ocozías kiib' roxk'ahl haab' i wilik reh noq xokik chi reyil, eh jinaj haab' xwihik chi reyil Jerusaleem. Re' rutuut Atalía rub'ihnaal, eh riih i Omri. 3Re' i Ocozías xub'an i yiib' wach na'ojb'al je' rukab' i xkian i riih rumaam i Acab. Eh re' rutuut xq'orik reh chi xub'an i yiib' wach na'ojb'al. 4Je' re' noq re' Ocozías xub'an i yiib' wach na'ojb'al chuwach i QaJaaw Dios je' rukab' i xkian taqe i riih rumaam i Acab. Ruum noq kamnaq chik reje i rajaaw re' keh xi taq chi'inik reh chi xub'an i yiib' wach na'ojb'al. 5Re' reey Ocozías xub'an i yiib' wach na'ojb'al xq'orarik reh kuum i riih rumaam i Acab. Eh ruch'ihil i Joram noq xiooj chi q'aq'inik ruuk' i Hazael kireey i aj Siria. Eh ar xkian i q'aq'inik Ramot wilik paruyuq'ul i Galaad, re' i xkiq'oj wii' i Joram taqe i aj Siria. 6Re' Joram i kireey i aj Israel xsutinik wo' chik cho Jezreel reh chi xchalik riq'omaaj i ruq'ojeel xb'aan cho reh kuum i aj Siria ar Ramot noq xkian i q'aq'inik ruuk' Hazael kireey i aj Siria. Eh ruum chi ti' wilik i Joram xchalik Jezreel i Ocozías chi rilariik. 7Re' i QaJaaw Dios xa ruyejaam wo' naq chik wach chi naa rukanteesjiik i Ocozías noq naa ruchaliik chi rilariik i Joram. Eh noq xponik i Ocozías xelik chaloq ruch'ihil i Joram, chi k'ulariik i Jehú, rak'uun i Nimsi re' i rusik'im wach i Dios chi naa rusacham kiwach i rak'uun rixq'uun i Acab. 8Eh noq re' Jehú k'ahchi' rukansam taqe i rak'uun rixq'uun i Acab xuk'ul taqe i kik'amwik b'eeh chi kixilak i aj Judá, eh je' wo' taqe i rak'uun i Ocozías intoob'inik ree reh. Re' Jehú xkuxik taqe rukansam i re'. 9Eh xooj chi rusik'ariik i reey Ocozías ar Samaria re' rukeb'aam wii' riib'. Eh re' taqe i ruch'ihil i Jehú xponik kireq i Ocozías, xkik'am reje ruuk' i Jehú, eh xkikansaj, xkimuq'aa' ruum keht'al chi rak'uun i reey Josafat, re' i xusik' i QaJaaw Dios chu'nchel ruk'ux. Eh xkuxik kikanteesjiik i rak'uun rixq'uun i Ocozías. Ma' jino'q chik i rak'uun i xkahnik chi xokik ta chi reyil. 10Eh noq xunab'eej i Atalía rutuut i Ocozías chi xkikansaj i Ocozías, xutaq'aaj kikanteesjiik chu'nchel i rak'uun i Ocozías i kireey i aj Judá. 11Xa re' la' re' i Josabet rixq'uun i reey Joram xuko'leej i Joás rak'uun i Ocozías xresaj chi kixilak taqe i rak'uun i Ocozías k'ahchi' kikanteesjiik. Eh xuk'am i Joás ruch'ihil ixoq inilwik reh chuwach i Atalía chupaam i jinaj i ye'aab' warb'al, xa je' re' noq ma' xukansaj taj. Je' re' i xub'an i Josabet rixq'uun i reey Joram ranaab' wo' hoq i Ocozías, rehk'een i Joiada k'amal kib'eeh aj tiij. 12Re' Joás waq'iib' haab' xkikeb'aa' chupaam i rupaat i QaJaaw Dios. Re' noq wilik chi ixoq reey i Atalía chinaah i tinamit.

will be added

X\