2 CRONICAS 12

1Noq re' Roboam xrik'raaj chi kow chik riib' chi reyil xukanaa' rub'aan i ruq'or i ruk'uhb'aal i QaJaaw Dios. Eh je' wo' re' xkian chu'nchel i aj Israel. 2Ruum chi xkikanaa' runimjiik i ruk'uhb'aal i Dios, re' Sisac kireey i aj Egipto xchalik chi q'aq'inik chinaah i tinamit Jerusaleem, re' noq ho'oob' chik haab' rokiik chi reyil i Roboam ar Jerusaleem. 3Re' i Sisac xuk'am chaloq jinaj miil ruuk' kiib' siento chi kareta reh q'aq'inik, eh oxk'ahl miil taqe i soldado kib'ehik rij kawáyu. Eh k'ih taqe i xa chi kooq kib'ehik, wilik taqe i aj Egipto, taqe i aj Libia, taqe i aj Suquienos, taqe i aj etiope ma' xata ajlamaj taqe. 4Eh jumehq'iil xkichop naah i tinamit wilkeeb' paruyuq'ul i Judá, re' kotimaj kiij chi koraal tz'aq, korehtaal xi ponik Jerusaleem. 5Re' i Semaías jalal ruq'oral i Dios xooj ruuk' i reey Roboam kuuk' i k'amal kib'eeh i aj Israel kimolom kiib' Jerusaleem ruum chi k'ahchi' naq chik rub'aan keh ruum i Sisac. Re' Semaías, je' wili xuq'or keh: Re' QaJaaw Dios je' wili xuq'or: Ruum chi xinaq'eb' taq chi riij ak'ux re' hin xat nukanaa' taq pan q'ab' i Sisac, inki. 6Re' reey Roboam ruch'ihil taqe i k'amal kib'eeh i aj Israel, xkiloch' kiib' je' wili xkiq'or: Re' QaJaaw Dios xti rub'ehel i rub'an, inki taqe. 7Eh noq xrilow i QaJaaw Dios chi xkiloch' kiib' xuq'oreej wo' chik i Semaías i jalal ruq'oral je' wili i xuq'or reh: Re' keh xkiloch' kiib' ruum aj re' ma' naa ta nusacham kiwach naa la' nuko'leem taqe chi jumehq'iil ma' naa ta wik'sam i nujosq'iil chikinaah i aj Jerusaleem ma' naa ta nuye'em q'ab' chi naa rusachariik kiwach ruum i Sisac. 8Xa re' la' naa kikahniik chi ri'sil i rajaawriik, reh chi neenkikoj rehtaal chi ma' elik ta wach i nunimjiik i hin ruuk' i kinimjiik taqe i kireey i tokoom tinamit. 9Eh re' i Sisac i kireey i aj Egipto xooj wo' chi q'aq'inik Jerusaleem xrehchaaj taqe i k'ih taq tz'aaq wilkeeb' chupaam i rupaat i Dios, i wilkeeb' chupaam i paat i rub'an wii' taaq'anik i reey, xuk'am taqe i pulato ch'ihch' oro ko'lb'al kiib' taqe i soldado re' xuyejaa' kahnoq i Salomón. 10Eh re' reey Roboam xuyejaa' jilow taqe i nimaq pulato ch'ihch' re' re' chi q'an ch'ihch', xukoj taqe chi cha'jen reh k'amal kib'eeh i wilkeeb' chi cha'jinik pantaq ookb'al reh i rupaat i reey. 11Eh jarpech inooj i reey parupaat i Dios re' taqe i aj cha'joom inkik'am reje i pulato ch'ihch', noq kisutinik chaloq inkik'am wo' chik chaloq inkiyeew wo' chik pan kiye'aab' taqe i aj cha'joom. 12Ruum chi xuloch' riib' i reey Roboam xik'ik i rujosq'iil i QaJaaw Dios, ma' xkuxik ta rusacham kiwach. Eh xtohq'ik ruhiliik wach i ti' k'axik Judá. 13Re' Roboam xwihik ruman i rajaawriik chi reyil Jerusaleem. Eh jinaj roxk'ahl haab' i wilik reh, eh noq xokik chi reyil wuqlaj haab' xwihik chi reyil Jerusaleem, re' i tinamit xusik' wach i QaJaaw Dios chi kixilak chu'nchel i ruch'uhqaal i tinamit Israel, reh chi xlooq'jik i rub'ihnaal. Re' Roboam, Naama rub'ihnaal i rutuut aj ar Amón. 14Re' i reey Roboam ma' holohik taj i runa'ojb'al xub'an ruum ma' xusik' taj i QaJaaw Dios chu'nchel ruk'ux. 15Eh chu'nchel i xub'an i Roboam noq xutoq'aa' cho reyil, eh korehtaal xelik chi reyil tz'ihb'amaj rehtaliil paruhuuj i Semaías jalal ruq'oral i Dios, je' wo' chupaam i ruhuuj i Iddo jalal ruq'oral i Dios, ar wo' tz'ihb'amaj i kib'ihnaal i ju'jun chi patineel. Re' i reey Roboam i rajlaal q'iij xub'an i q'aq'inik ruuk' i reey Jeroboam. 16Re' reey Roboam xponik i q'iij noq xkimik reje, ar xkimuq'aa' chupaam i ye'aab' xkimuq'aa' wii' i rumaam rati't, chupaam i rutinamiit i David. Re' chik i Abías i rak'uun xokik chi jilow chi reyil.

will be added

X\