2 CRONICAS 10

1Re' Roboam xooj Siquem ruum chu'nchel i tinamit Israel xiooj ar chi rupa'ab'jiik chi reey. 2Xa re' la' xunab'eej chee Jeroboam rak'uun i Nabat wilik cho ar Egipto, re' i xooj wii' chi patinik noq ximol chi elik chuwach i reey Salomón, noq xrib'iraj i k'ahchi' ruk'ulariik xsutinik wo' chik cho Jerusaleem. 3Eh noq xkitaq'aaj ruk'amariik i Jeroboam chu'nchel i tinamit Israel xiooj chi q'orob'jiik i Roboam je' wili xkiq'or reh: 4Re' awajaaw noq xwihik chi reyil q'e' kow xooj rutaq'aaj, eh q'e' ahl ihq xuyeew chi qanaah. Eh re' hat yu'naak inqaaj chi nee naajot'isaj wach i qak'axkiil re' re' ma' q'e' ta chik kow nee qoh ataq'aaj, wila' xa a'n i je' re' neeqohkamanik awuuk', inki taqe. 5Eh re' i Roboam je' wili i xuq'or: Hiy taq, k'oloq wo' chik taq ab'iraj weh paroox q'iij, inki. Re' taqe tinamit xi sutinik wo' reje. 6Re' reey Roboam xupahqaaj runa'ojb'al keh taqe i mama' winaq xi kamanik cho ruuk' i Salomón noq kok'ahchlik, xupahqaaj keh chi je' wili: ¿Chib'ih i na'ojb'al i nayeew taq weh i hat, nik' wach kichaq'weesjiik naa nub'anam i tinamit? 7Re' keh je' wili i xkiq'or: Wila' re' hat wilkaat chi reyil chikinaah i tinamit, parukorkiil, ruuk' holohaq q'orik cha q'oreej taqe. Re' keh juneliik neekikamanik awuuk', inki taqe. 8Xa re' la', re' i Roboam ma' xunimaj taj i xq'orarik reh kuum i mama' winaq. Xooj wo' rupahqaaj runa'ojb'al kuuk' taqe i k'ijool, junk'iih taqe ruuk' wilkeeb' chi kamanik ruuk'. 9Xupahqaaj keh chi je' wili: ¿Chib'ih i na'ojb'al nayeew taq i weh i hat nik' wach kichaqweesjiik naa nub'anam taqe i tinamit k'ahchi' kipahqanik weh chi naa nujot'isam wach i kik'axkiil xye'arik kahnoq wach kinaah ruum i wajaaw? inki. 10Re' taqe i k'ijool junk'iih ruuk', je' wili ruch'aqweesjiik xkian: Re' taqe i tinamit kipahqanik aweh chi naa ajot'isam wach i kik'axkiil xkanab'jik wach kinaah ruum aawajaaw, je' wili kichaq'weesjiik cha a'n: Wila' re' wajaaw kow xtaaq'anik taq cha naah noq inaq'or, re' hin q'e' wo' chik kow naa nutaaq'aniik taq cha naah chuwach i reh. 11Wila' re' wajaaw q'e' ahl i ihq xuyeew taq cha naah noq inaq'or, re' hin q'e' wo' chi ahl i ihq naa nuye'em taq cha naah. Re' wajaaw xa tz'uhuum taq xukoj aweh, eh re' hin ch'ihch' panju' i tz'uhuum naa nukojom taq aweh, tiko'q keh, inki taqe. 12Eh paroox q'iij, re' taqe tinamit kuch'ihil i Jeroboam xiooj wo' chik k'oloq ruuk' i reey Roboám, ruum xuq'or wo' keh chi paroox q'iij wo' chik naa kojiik k'oloq ruuk'. 13Re' reey Roboám kow taqe xuq'oreej i tinamit ma' xub'an taj i xq'orarik reh kuum i mama' winaq. 14Xuq'or wo' keh i tinamit i xq'orarik reh kuum taqe i k'ijool je' wili i xuq'or keh: Wila' naq'or taq chi ahl i ihq xuyeew taq kahnoq cha naah i wajaaw, re' hin q'e' chik ahl i ihq naa nuye'em taq cha naah. Re' wajaaw xatz'uhuum chi je' re' xat ruyeew taq wii' chi tz'uhuum, re' hin ch'ihch' panju' i tz'uhuum naa nukojom taq aweh, inki. 15Re' reey Roboám ma' xunimaj taj i xq'orarik reh kuum i tinamit, ruum re' wo' QaJaaw Dios xyej-anik cho wach chi je' re' i xk'ularik. Reh chi xooj eloq wach i ruq'orom chee QaJaaw Dios reh i Jeroboam rak'uun i Nabat, re' i xq'orarik reh ruum i QaJaaw ruuk' chii' i Ahías jalal ruq'oral i Dios aj ar Silo. 16Noq xkilow i tinamit Israel chi ma' xunimaj taj i reey Roboam i xkiq'or, je' wili i xkiq'or reh: ¿Chib'ih inqak'ax i hoj ruuk' i riih rumaam David rak'uun i Isaí? Re' hoj ma' xtaj i chib'ih jariik ruyeew qeh. Re' hoj naa qilom qiib' chi qib'il qiib', re' hat Roboam tikahnoq chi reyil chikinaah i riih rumaam David, inki taqe reh. Eh chu'nchel i aj Israel xi sutinik reje pan kiye'aab'. 17Je' aj re' noq re' Roboam xa chikinaah i aj Israel wilkeeb' Judá xkahnik chi reyil. 18Re' reey Roboam xutaq'aaj reje i Adoram re' pab'amaj chi kilariik taqe i minooj pankowlaj kamanik. Xa re' la' re' Adoram re' re' xkanteesjik chi ab'aj kuum i aj Israel. Ruum i re', re' Roboam xjohtik reje parukareta xumol chi elik xooj Jerusaleem. 19Je' aj re' noq re' taqe i aj Israel xkesaj kiib' chi jumpech chi ri'sil i rajaawriik i riih rumaam David.

will be added

X\