1 REYES 5

1Noq xrib'iraj rib'iral i Hiram xwihik chi reyil ar Tiro chi re' i Salomón xpa'ab'jik chi reey chi jilow i David i rajaaw, xutaq'aaj chaloq i raj taqareel ruuk' i Salomón ruum re' i Hiram q'e' wo' naq iraaj cho wach i David. 2Eh re' reey Salomón je' wili i xutaq'aaj ruq'orariik reh i Hiram. 3Re' hat aweht'al chi re' David i wajaaw ma' xuyeew ta riib' chi xuyejaa' jino'q i paat loq'oomb'al reh i QaJaaw Dios, ruum ma' k'isiin naq i q'aq'inik imb'aan. Korehtaal re' QaJaaw Dios xuq'asaj pan q'ab' i David taqe i aj ixowaal. 4Xa re' la' yu'naak i waJaaw i nuDios xoj ruyeew pansuqkiil k'uxliis kuuk' tinamit wilkeeb' xa aha' yuuq', ma' awach ta chik inixowanik qawach, ma' xta chik qak'axkiil. 5Je' aj re' noq re' hin yu'naak xnuyejaa' chik wach chi naa nuyejaam jino'q i paat loq'oomb'al reh i waJaaw i nuDios. Je' wo' rukab' i xuq'or cho reh i David re' i wajaaw chi je' wili: Re' awak'uun i naa nupab'aam chi reyil chi ajilow re' reh naa ruyej-aniik reh i paat naa nulooq'jiik wii', inki. 6Eh re' hin i nuq'or aweh i hat Hiram chi cha taq'aaj amoso ar Líbano, reh chi neenooj kiyok' i chee' chakaltee', eh re' taqe numoso i hin neentoob'inik keh. Re' hin neenutoj taqe amoso jarub' pa' i neenapahqaaj weh. Re' hat aweht'al chi ma' jino'q keh i numoso i hin inchol yok'oj nimaq chee' chi je' rukab' inki a'n i aj Sidón, inki. 7Eh noq xponik rib'iral ruuk' i Hiram taqe i xuq'or i reey Salomón ma' k'isiin ta xsuuqb'ik ruk'ux, je' wili xuq'or: Neeta naq inye'arik ruloq'il i QaJaaw Dios yu'naak, ruum xuyeew jinaj rak'uun i David xti wilik runa'ojb'al, reh chi naa ruwihiik chi reyil chinaah i runimaal tinamit re' re', inki. 8Chi riij i re', re' i Hiram je' wili i xutaq'aaj ruq'orariik reh i Salomón: Re' hin xk'ulik chik kiq'or weh xataq'aaj cho ruq'orariik. Re' hin naa nub'anam i xapahqaaj cho weh, naa nutaq'aam aweh taqe i chee' chakaltee', je' wo' taqe i chee' sohchaj. 9Re' taqe i numoso naa rojiik kesam i chee' ar Líbano naa kik'amam reje chi chii' i palaw naa kiyejaam ik'tesb'al reh nah ha'. Ar narojiik kikanaam aha' i neenaq'or i hat. Ar naa koq'taam reje i k'amb'al reh, eh re' hat naa ataq'aam cho ruk'amariik i chee', re' otob'il i nupahqaaj aweh i hin xa re' chi neenataq'aaj cho k'uxumb'al qeh, inki. 10Je' re' noq re' i Hiram xuyeew reh i reey Salomón taqe i chee' chakaltee' je' wo' taqe i chee' sohchaj nik' k'ihaal i xraaj. 11Re' reey Salomón i rutaq'aaj wo' k'uxumb'al keh i awach reh parupaat i Hiram. Rajlaal haab' i rutaq'aaj reje i juninaq miil pajb'al i Trigo, eh wuquub' miil ruuk' kijib' siento i nimaq lemeta i holohik aseite. 12Re' i QaJaaw Dios xuyeew runa'ojb'al chi manlik i Salomón, je' rukab' i ruq'orom chaloq. Re' i reey Salomón xkik'am kiib' pansuqkiil ruuk' i Hiram i reey ar Tiro, wilik i xkiyejaa' wach chikiwach chi xkian. 13Re' reey Salomón ximol kiwach i lajeeb' ru ka'winaq miil chi winaq chupaam chu'nchel i tinamit Israel xutaq'aaj taqe kamanoom. 14Ar xutaq'aaj taqe kamanoom Líbano laj taq miil i rutaq'aaj reje reh i ju'jun riim, jinaj poh imponik kian. Chi riij i re' kisutinik wo' chik chaloq, kiib' poh ink'ulik kian pankipaat xan kijal kiib'. Eh re' Adoniram xpa'ab'jik chi k'amal kib'eeh. 15Re' Salomón xupab'aa' taqe i lajeeb' ru kajwinaq miil chi aj ihq, eh kajwinaq miil taqe i sehkan wach chee' wilkeeb' ruum paraxchee'. 16Eh wilkeeb' wo' taqe ixib' miil ruuk' ixib' siento chi winaq inilwik keh i kamanoom re' re'. 17Re' reey Salomón xutaq'aaj ruk'amariik i nimaq taq ab'aj q'e' holohaq, je' wo' taqe ab'aj sehkamaj kiwach reh chi xokik chi ch'ikaab' reh i raa' i rupaat i QaJaaw Dios. 18Re' taqe i rumoso i Salomón, ruch'ihil taqe i rumoso i Hiram, ruch'ihil taqe i kichalik Gebal xkiyejaa' taqe i chee', eh xkisehkaaj wach taqe ab'aj xkorjik wii' i rupaat i QaJaaw Dios.

will be added

X\