1 REYES 17

1Re' Elías jalal ruq'oral i Dios Tisbe i rutinamiit wilik paruyuq'ul i Galaad je' wili xuq'or reh i reey Acab: Re' hin parub'ihnaal i qaDios i hoj, hoj aj Israel re' nukamaneej wach i hin i nuq'or aweh i xti korik chi chupaam taqe haab' xchalik ma' naa ta chik rub'anam k'isinoq i jab', konaa chik nuq'orom i hin noq naa rub'anam, inki. 2Je' re' noq re' i QaJaaw Dios je' wili i xuq'or reh i Elías: 3Eleen reje ayu' hiy reje chi korkiil ireelb'aalq'iij chakeb'aa' awiib' chi chii' i ha' Querit, re' wilik reje pareelb'aal q'iij reh i nim ha' Jordán. 4Ar neenawuk'ej ahaa' chupaam i rooq ha'. Eh neenutaq'aaj taqe reje i nim taq tz'ok reh chi neenooj kiyeew awa' ar. 5Re' Elías xub'an wo' hoq aha' wilik i xq'orarik reh ruum i QaJaaw Dios, xooj wo' hoq, ar xkahnik chi patinik chi chii' i ha' Querit wilik reje pareelb'aal q'iij reh i nim ha' Jordán. 6Eh re' taqe i nim taq tz'ok kik'amwik reje rutiib', kik'amwik reje rukaxlanwi'k pantaq wahq'eq pantaq xq'eq, ar i rub'an ruhaa' chupaam i rooq ha'. 7Xa re' la' noq ik'inaq chik jarub'-oq q'iij xchiqik i ha' ruum ma' rub'anam ta naq chik k'isinoq i jab' chi jumpech. 8Re' QaJaaw Dios je' wo' chik wilik i xuq'or reh i Elías. 9Yu'naak eleen reje ayu' hiy chupaam i tinamit Sarepta wilik paruyuq'ul i Sidón. Eh ar nee ti wihik chupaam i ye'aab' re' re', eh ar wilik jinaj ixoq kamnaq rub'ahiil xnuq'or chik reh chi re' reh naa ruketwiik aweh, inki. 10Eh re' Elías xelik wo' reje ar, xooj pan tinamit Sarepta. Noq xponik panookb'al reh i tinamit xrilow wach jinaj ixoq kamnaq rub'ahiil molooj rusii' i rub'an. Eh re' Elías xuyuq'eej reje ixoq je' wili i xuq'or reh: Chakuy chak'am cho jino'q k'ulk nuhaa' reh chi neenwuk'ej, inki. 11Eh noq ojik naq chik i rub'an ixoq chuk'amariik i ha' re' Elías xuyuq'eej wo' chik reje je' wili i xuq'or: Chakuy nee wo' nak'am cho k'isinoq nukaxlanwi'k, inki reh. 12Re' ixoq je' wili xuq'or: Re' hin xti korik i nuq'or aweh parub'ihnaal aaDios chi ma' xta kaxlanwi'k nuchaq'sam, xa k'isiin chik i warina wilik pan wikoom, eh xa k'isiin chik i waseite wilik pan xaro. Eh xin chalik chi molariik nusii' reh chi naa nuchaq'sam reh chi nee ruk'ux i wak'uun, eh chi nee nuk'ux i hin, eh k'uhlik naa rub'anam. Chi riij i re' naaqakimiik ruum qawa', inki. 13Re' Elías je' wili i xuq'or: Maa yohb'isaj awiib' hiy cha chaq'saj i kaxlanwi'k inaq'or, xa re' la' peet nee nayeew jino'q k'isa nukaxlanwi'k i hin nee nak'am cho weh chi riij i re' neenayejaa' reh awak'uun, eh aweh i hat. 14Cha a'n chi je' re' ruum je' wili i xuq'or i QaJaaw i qaDios i hoj, hoj aj Israel: Ma' naa ta ruk'uhliik i rarina wilik panikom, eh ma' naa ta wo' ruk'uhliik i raseite wilik pan xaro korehtaal i rureq i q'iij noq naa nuye'em qohoq i jab' i hin chinaah i wach ak'al, inki. 15Eh re' ixoq kamnaq rub'ahiil xooj wo' rub'an i xq'orarik reh ruum i Elías. Eh xwihik rukaxlanwi'k i Elías je' wo' hoq ixoq, je' wo' hoq i rak'uun chuwach i k'ih laj q'iij. 16Eh xama' xk'uhlik ta wo' hoq i rarina wilik panikom, je' wo' hoq i aseite wilik paruxaro, je' wo' rukab' i xuq'or i QaJaaw ruuk' chii' i Elías. 17Eh koq'uun chik xqajik pan yab'ilaal i rak'uun ixoq kamnaq rub'ahiil, eh yohb'aal wach x-uhtik wach i ruyab'ilaal, xama' nelik ta chik i ruxlaab'. 18Noq xrilow chi je' re' ixoq kamnaq rub'ahiil je' wili i xuq'or reh i Elías: ¿Chib'ih i numahk chawach i hat jalal ruq'oral i Dios? ¿Mi xat chalik chi nuye'ariik, chutojariik i numahk, eh chi rukanteesjiik i wak'uun jinaj chi riib' chi nuwach? inki. 19Re' Elías je' wili i xuq'or reh ixoq kamnaq rub'ahiil: Chak'am cho weh awak'uun ayu', inki xuk'ul reh ixoq i rak'uun xuk'am johtoq naah ka'ch'iht paat i wilik wii' chi patal xuyok'aa' wach ruch'aht. 20Re' Elías xub'an rutiij kow xuq'or chi je' wili: QaJaaw Dios, ¿Chib'ih reet noq xayeew cho ruti'kiil ruk'ux ixoq wili i wilik wii' nupatal? ¿Chib'ih reet noq naa aye'em q'ab' chi naa rukimiik i rak'uun? inki. 21Eh oxpech xupachaa' riib' chinaah i k'isa rak'uun ixoq, eh kow xuq'or chi je' wili: WaJaaw nuDios i nupahq'aaj aweh chi chayeew wo' chik cho ruk'achariik i k'isa k'un wili, inki. 22Re' QaJaaw Dios xrib'iraj wo' hoq rutiij i Elías, xuyeew wo' chik ruk'achariik i k'isa k'un. 23Eh re' Elías jumehq'iil xuqasaj cho nah ka'ch'iht paat i k'isa k'un xuk'am cho wach ak'al, xuq'asaj reh i rutuut je' wili xuq'or reh: Wili i k'isa aawak'uun xk'aach wo' chik, inki. 24Eh re' ixoq kamnaq rub'ahiil je' wili i xuq'or: Yu'naak i hin i nunimaj chi hat jalal ruq'oral i Dios, chu'nchel inaq'or korik ruum re' wo' Dios inq'orik cha weh, inki.

will be added

X\