1 REYES 16

1Re' QaJaaw Dios xuq'oreej i Jehú rak'uun i Hanani jalalruq'oral i reh xq'orarik reh chi naa ruq'orom reh i reey Baasa chi ma' holohik taj i k'ahchi'. 2Re' Jehú je' wili xuq'or reh i Baasa re' QaJaaw Dios je' wili ruq'or chawiij: Re' hin xin ye'wik awajaawriik noq xat nukoj chi reyil chinaah i nutinamiit Israel. Eh xa a'n i mahk je' rukab' i xub'an i Jeroboam, xak'am taqe pamahk i aj Israel ruum i re' xajosaj cho wach i rujosq'iil. 3Ruum aj re', re' hin naa nusacham awach, eh naa wo' nusacham kiwach awach aweh, je' rukab' noq xnusach wach i Jeroboam rak'uun i Nabat. 4Re' taqe awach aweh naa kikimiik pan tinamit re' taqe tz'i' naa ruk'uxwiik keh. Eh re' taqe i awach keh naa kikimiik pantaq ab'iix re' taqe i k'uch naa ruk'uxwiik keh, inki Dios, inki. 5Eh chu'nchel i xub'an i reey Baasa ruch'ihil i rajaawriik noq xwihik chi reyil tz'ihb'amaj rehtaliil chupaam taqe ruhuuj i Crónicas re' wo' tz'ihb'amaj wii' i xkian chu'nchel i xi wihik chi reyil Israel. 6Eh noq xkimik i reey Baasa ar xkimuq'aa' Tirsa. Re' chik i Ela i rak'uun xkahnik chi reyil chi jilow. 7Re' QaJaaw Dios xuq'or cho ruuk' chii' i jalal ruq'oral Jehú rub'ihnaal rak'uun i Hanani i ti' k'axik xuk'ul i reey Baasa, ruch'ihil taqe awach reh. Ruum xub'an taqe i yiib' wach na'ojb'al chuwach i Dios. Re' i Baasa xujosaj chee rujosq'iil i Dios, ruum xub'an reh i yiib' wach na'ojb'al xub'an i Jeroboam, je' rukab' i xkian taqe awach reh, re' taqe i xsacharik kiwach ruum i Dios. 8Noq waqiib' ru ka'winaq haab' chik rokiik chi reyil Judá i Asa, re' i Ela rak'uun i Baasa xokik chi reyil chikinaah chu'nchel i aj Israel ar Tirsa. Eh kiib' haab' xwihik chi reyil. 9Xa re' la' re' i Zimri inkamanik ruuk' k'amal kib'eeh i yejaal i kareta reh q'aq'inik xuyejaa' wach chi naa rukansam. Eh pan jinaj q'iij i Ela noq wilik ar Tirsa parupaat i Arsa inilwik reh i chib'ih reh xutoq'aa' xohk'rik korehtaal xukansaj riib' chi xohk'rik. 10Eh xa chi jumehq'iil xponik i Zimri xukansaj i Ela, re' xraaj i reh chi re' chik i reh xokik chi reyil chi jilow. Re' taqe wili xk'ularik noq wuquub' chik ru ka'winaq haab' rokiik chi reyil Judá i Asa. 11Xa chi jumehq'iil xokik chi reyil i Zimri, eh xukansaj taqe awach reh i reey Baasa, ma' jino'q chik i xukanaa' chi k'achlik xkuxik taqe rukasam re' xraaj i reh chi ma' awach ta neenq'ajwik wach reh i xub'an keh. 12Eh re' Zimri xkuxik wo' taqe rukansam i awach reh i reey Baasa, xkik'ul wo' hoq i ti' k'axik je' rukab' i xuq'or i QaJaaw Dios ruuk' chii' i Jehú jalal ruq'oral. 13Eh ruum chu'nchel i mahk i xub'an i Baasa, ruum wo' taqe mahk xub'an i Ela i rak'uun, ruum taqe re' xkimin pamahk taqe i kuch aj Israel. Eh ruum i kilooq'jiik taqe i tiyoox xkijosaj wach i rujosq'iil i qaDios i hoj, hoj aj Israel. 14Re' taqe i xuq'or, i xub'an i reey Ela tz'ihb'amaj rehtaliil chupaam taqe i huuj ree Crónicas re' tz'ihb'amaj wii' i rehtaliil i xkian chu'nchel i xi wihik chi reyil Israel. 15Noq wuquub' ru ka'winaq haab' chik rokiik chi reyil Judá i Asa re' i Zimri xokik chi reyil. Xa re' la' xawuquub' wo' q'iij xwihik chi reyil ar Tirsa. Re' taqe i ki soldado i aj Israel xkimol kiib' chub'anariik keh i aj Gibetón, i aj filisteo. 16Eh noq xkib'iraj rib'iral i ki soldado i aj Israel chi re' Zimri xukansaj i reey Ela jumehq'iil xkipab'aa' i Omri chi kireey i aj Israel chupaam i ye'aab' wilkeeb' wii'. Re' i Omri re' reh ink'amwik kib'eeh i soldado panq'aq'inik. 17Chi riij i re', re' Omri ruch'ihil taqe i soldado xooj chi q'aq'inik pan tinamit Tirsa. 18Noq xrilow i Zimri chi kotimaj chik riij i tinamit wilik wii' xumol chi elik xooj rukeb'aa' riib' chupaam i paat imb'aan wii' i taaq'anik. Eh re' i Zimri xuqop ruq'aq'al i paat imb'aan wii' i taaq'anik, eh ar k'ahtik. 19Re' reh ruum i mahk xub'an, ruum wo' hoq chi xub'an i yiib' wach na'ojb'al chuwach i QaJaaw Dios. Eh xub'an reh i mahk je' rukab' i xub'an i Jeroboam ruuk' taqe re' xuk'am taqe pamahk i aj Israel. 20Re' i ruqox taqe i xub'an i reey Zimri ruch'ihil i rukanteesjiik i reey Ela xub'an tz'ihb'amaj rehtaliil chupaam taqe i huuj ree i Crónicas, re' wo' tz'ihb'amaj wii' i xkian chu'nchel i xi wihik chi reyil Israel. 21Re' taqe i tinamit Israel xkich'aq kiib', kiib' xi elik. Re' junch'uq xkaaj naq chi naa rokiik chi reyil i Tibni rak'uun i Ginat. Eh re' junch'uq xkaaj chi re' Omri xkahnik chi reey. 22Re' taqe i wilkeeb' chi riij i Omri xkitoq'aa' peleto kuuk' i wilkeeb' chi riij i Tibni rak'uun i Ginat. Re' Tibni xkimik reje noq xokik chi reyil i Omri. 23Re' Omri xokik chi reyil ar Israel noq lajeeb' ru ka'winaq ruuk' jinaj haab' rokiik chi reyil Judá Asa. Eh kab'laj haab' xwihik chi reyil, waqiib' haab' xwihik chi reyil Tirsa. 24Re' re' reey Omri xuloq' ruuk' i Semer i ye'aab' wilik nah yuuq' wilik ar Samaria. Eh i jinaj siento ruuk' hoob' roxk'ahl libra rahliil i plata xuyeew, eh chupaam i ye'aab' re' re', xuyejaa' jinaj i tinamit Samaria i rub'ihnaal xukoj. Je' re' b'ih xukoj ruum re' i ehchan naq reh i ye'aab' re' re' Semer i b'ih. 25Eh re' i Omri xti xiik wo' chik naah i yib'kiil wach na'ojb'al xub'an chuwach i QaJaaw Dios, chuwach xkian i reey xi wihik chi peet chuwach i reh. 26Re' reh xub'an wo' taqe i mahk je' rukab' i xub'an i Jeroboam rak'uun i Nabat ruuk' taqe re' xumin taqe pamahk i aj Israel. Eh ruum i loq'inik i tiyoox xub'an xujosaj wach i rujosq'iil i QaJaaw qaDios i hoj, hoj aj Israel. 27Eh re' i xub'an i xuq'or ruum i rukowiil i naah i reey Omri tz'ihb'amaj rehtaliil chupaam taqe i huuj ree Crónicas, re' wo' tz'ihb'amaj wii' rehtaliil xkian chu'nchel i xi wihik chi reyil Israel. 28Eh noq xkimik i reey Omri ar xkimuq'aa' Samaria. Eh re' chik Acab i rak'uun xkahnik chi reyil chi jilow. 29Noq lajeeb' ru ka'winaq ruuk' waxiqiib' haab' chik rokiik chi reyil Judá i Asa rak'uun i Omri noq xokik i Acab chi reyil Israel. 30Eh kiib' ru ka'winaq haab' xwihik chi reyil ar Israel, eh Samaria. Re' Acab xti xiik' wo' chik naah yib'kiil wach na'ojb'al xub'an chuwach i QaJaaw Dios, chuwach i xkian i reey xi wihik chi peet chuwach i reh. 31Re' Acab ma' xta xraaj reh chi xub'an i mahk je' rukab' i xub'an i Jeroboam rak'uun i Nabat. Eh q'e' wo' chik yiib' wach i xub'an ruum xuk'am chi rehk'een i Jezabel rixq'uun i Et-baal kireey i aj Sidón. Noq xooj kuxoq xtohq'ik ruloq'em i tiyoox Baal. 32Eh xuyejaa' jinaj i artaal jinaj i rupaat i tiyoox Baal ar Samaria. 33Eh xuyejaa' wo' jinaj i tiyoox Asera i b'ih. Ruuk' taqe xub'an re' re' xujosaj wach i rujosq'iil i QaJaaw i qaDios i hoj, hoj aj Israel. Ma' xata je' rukab' i xkian taqe reey xi wihik Israel peet chuwach i reh. 34Eh chupaam taqe i q'iij re' re' jinaj i winaq xwihik chaloq i Hiel i b'ih Bet-el i rutinamiit xuyejaa' wo' chik i tinamit Jericó. Noq xuyejaa' xkimik i Abiram, re' i peet rak'uun. Eh noq xukoj i raa' i paat xkimik i Segub re' i chaq'b'ees rak'uun, xuyeew wo' taqe paruye'aab' i ru puertahiil. Xub'an wo' hoq je' rukab' i xuq'or chaloq i QaJaaw Dios ruuk' chii' i Josué rak'uun i Nun.

will be added

X\