1 Chupaam i haab' jinaj chik paruq'ijil i siq'jil noq kiooj i reey chi q'aq'inik, re' Joab i xuk'am taqe reje i ru soldado chi q'aq'inik, eh xusach wach i kitinamiit i aj Amón. Eh xooj kikotej riij i tinamit Rabá, eh xusach kiwach. Xa re' la' re' reey David xkahnik Jerusaleem. 2 Eh noq re' David xponik Rabá xkiq'uch reh i ru corona i kireey i aj Rabá, wach naah chik i David xkikoj. Re' corona re' re' oro wilik wo' hoq i holohaq ab'aj chuwach ixib' aroba naa rahliil. Re' David ma' k'isiin taqe i xa chib'ih jariik k'ih taq tz'aaq xresaj chaloq chupaam tinamit re' re'. 3 Re' David xresaj taqe chaloq chu'nchel i tinamit koxikahnik ar xukoj taqe chi taraj chee', chi k'otooj paam ak'al ruuk' ch'ihch', chi ch'irij sii' ruuk' ikej. Eh je' wo' re' i xub'an keh chu'nchel i aj Amón. Chi riij i re', re' David ruch'ihil chu'nchel i ru soldado xi sutinik wo' chik cho Jerusaleem. 4 Chi riij i re', re' taqe i aj Israel xiooj wo' chik chi q'aq'inik kuuk' i aj filisteo ar Gezer. Re' Sibecai aj pan tinamit Husa xukansaj i Sipai re' ruuk' i kiih taqe i nimaq winaq. 5 Eh xiooj wo' chik chi q'aq'inik kuuk' i aj filisteo. Re' i Elhanán rak'uun i Jair xukansaj i Lahmi ruchaaq' i Goliat aj geteo, xiik' wo' naq naah nimaal rooq. Re' i ruche'el i ruq'as ju' ch'ihch' je' nimaal i ruche'el i nimlaj keem. 6 Eh xwihik wo' chik i jinaj i q'aq'inik ar Gat, ar xwihik jinaj winaq nim rooq waqtaq i ju'q'ab' chi ju'juntar, eh waqtaq i naah rooq chi ju'juntar kijib' ru ka'winaq chu'nchel. Eh re' reh re' ruuk' i kiih taqe i nimaq winaq. 7 Re' winaq re' re' xub'aj taqe i aj Israel, ruum aj re' xkanteesjik ruum i Jonatán rak'uun i Simea, ruchaaq' i David. 8 Re' taqe nimaq kooq winaq wili aj Gat taqe re' ruuk' riih rumaam i Rafa i nim rooq winaq. Re' winaq re' re' xkanteesjik ruum i David, eh ruum taqe i ru soldado.
