1 CRONICAS 17

1Noq re' reey David wilik chik chupaam i paat i rub'an wii' taaq'anik je' wili i xuq'or reh i Natán jalal ruq'oral i Dios: Chakoj rehtaal re' hin wilkiin chupaam jinaj i paat korjinaq ruuk' i chee' chakaltee', eh re' i ruloq'laj kaxa i QaJaaw xa chupaam i itz'ihy naah paat wilik, inki. 2Eh re' Natán je' wili i xuq'or: Re' hat cha a'n taqe chu'nchel inawaaj rub'aan, ruum re' Dios wilik awuuk' chatoob'jiik, inki. 3Eh xa chupaam wo' aq'ab' re' re' q'orob'jik chee Natán ruum i Dios je' wili xq'orarik reh: 4Hiy ruuk' i David i waj kamanoom cha q'or reh re' QaJaaw Dios je' wili i ruq'or: Re' hat David ma' re' tee hat naa ayej-aniik reh i nupaat naa nuwihiik wii'. 5Re' hin xti korik i nuq'or chi ma' jank'al ta kimpatinik chupaam jino'q i paat, i wesam taqe chaloq i nutinamiit Israel, ar Egipto, eh xink'uloq ayu' yu'naak. Re' hin xa pan itz'ihy kinaah paat wo' kinwihik. 6Re' hin nik' najtiil xwuch'ihleej taqe chaloq i nutinamiit Israel. Re' taqe i xnukoj chi taaq'anik chikinaah i aj Israel ma' nik' ta xnuq'or keh chi naa kiyejaam jino'q nupaat chee' chakaltee' naa rukorjiik wii'. 7Je' re' noq cha q'or reh i waj kamanoom David chi re' hin i Dios nim wajaawriik je' wili i nuq'or reh: Re' hin xat wesaj cho chi cha'jinik tentzun, reh chi xat nupab'aa' chi reyil chinaah i nutinamiit Israel. 8Re' hin xintoob'inik aweh xa aha' pa' xat ponik. Eh xnuq'asaj taqe panaq'ab' i ki-ixowanik awach. Xnuyeew awajaawriik je' rukab' i kajaawriik i winaq, xti wilik kajaawriik wilkeeb' wach ak'al. 9Eh xnuyeew wo' kiye'aab' i nutinamiit Israel reh chi ar naakipatiniik chupaam i kiye'aab' chi suq kik'ux. Reh wo' hoq chi ma' awach ta neenjot'wik keh, eh ma' awach ta neenquchwik i chib'ih keh, je' rukab' imb'aan keh pampeet. 10Xa re' wo' noq xnupab'aa' taqe chaloq i q'atal q'orik chikinaah i nutinamiit Israel xtohq'ik cho ti' k'axik keh. Eh re' hat yu'naak naa kaat nuhi'lisam, ma' naa ta chik kaat kijot'om i ki-ixowanik awach, i nuq'or wo' aweh i hin, hin Dios chi naa nuye'em awak'uun, awixq'uun. 11Eh noq naa ruponiik i q'iij noq naa akimiik reje naa rojiik taqe areqem aamaam awati't. Re' hin jinaj keh awak'uun naa nukojom chajilow, chi reyil. 12Eh re' reh naa ruyej-aniik i nupaat. Eh re' hin naa nukojwiik reh chi reyil chi juneliik. 13Re' hin naa nukahniik chi hin raJaaw, eh re' reh naa rukahniik chi wak'uun. Re' hin ma' naa ta nukanaam ruketeljiik wach, je' rukab' noq xnukanaa' ruketeljiik kiwach i xwihik cho chi reyil peet chawach i hat. 14Re' hin naa nuye'em rajaawriik chinaah i nutinamiit naa wo' nuye'em rajaawriik chi juneliik chi reyil. Eh naa ruwihiik jino'q awiih aamaam naa rokiik chi reyil, tiko'q reh, inki i Dios. 15Eh re' Natán jalal ruq'oral i Dios xooj wo' ruuk' i David xooj ruq'or reh chu'nchel i xq'orarik reh, je' wo' hoq i xk'uhtjik reh. 16Noq xrib'iraj i David chi je' re' xokik i koq chupaam i itz'ihy naah paat chi tiij chuwach i QaJaaw Dios je' wili xuq'or: ¿Chib'ih nub'anam i hin chib'ih kianam i wak'uun wixq'uun chi xayeew weh awotob'il wili? 17QaJaaw Dios re' hat ma' xata re' wili xaq'or la' wo' hoq chi re' taqe i wiih numaam i hin, hin awaj kamanoom naa kiwihiik chi reyil chi juneliik. QaJaaw Dios chawach i hat hin jinaj winaq wilik rajaawriik. 18¿Chib'ih chik jariik i nupahqaaj chi riij i nuloq'il xayeew? Re' hat aweht'al chik nik' wach i nuna'ojb'al i hin, hin awaj kamanoom. 19QaJaaw Dios ruum chi q'e' kinak'ax panawánima hin awaj kamanoom xa a'n wuuk' i runimaal wach na'ojb'al wili. Reh chi naa ruk'utiniik taqe i runimaal awajaawriik. 20QaJaaw Dios ma' xta chik jino'q Dios chi je' rukab' i hat, eh ma' awach ta neemb'anik i na a'n je' wo' rukab' i qib'iram cho rib'iral. 21Eh ma' jino'q i tinamit wach ak'al chi je' rukab' aatinamiit Israel. QaJaaw Dios re' hat xat ko'linik cho keh reh chi xakoj taqe chi aatinamiit. Re' hat xa a'n taqe i nimaq wach ma' ilooj taj i nimaq wach sahchb'al k'uxliis re' noq xawesaj taqe i tokoom tinamiit pan kiye'aab' aatinamiit. Eh xawesaj taqe cho ar Egipto. 22Re' hat xasik' kiwach i aj Israel, reh chi xi kahnik chi aatinamiit taqe chi juneliik. Eh chi re' hat xat kahnik chi ki Dios. 23QaJaaw Dios nee ta tii na a'n cho chi juneliik i xaq'or weh, i hin, hin awaj kamanoom. Neeta naq inwihik kajaawriik taqe i wiih numaam chi reyil je' rukab' i xaq'or weh. 24Neeta naq inye'arik runimaal wach ab'ihnaal chi juneliik. Eh nee ta naq inq'orarik rib'iral chi re' hat i Dios nim awajaawriik qaDios i hoj, hoj aj Israel. Neeta naq i nacha'jeej taqe chi juneliik i wiih numaam chi reyil, i hin, hin awaj kamanoom. 25QaJaaw Dios re' hat xayeew weh chi naab'jik chi naa nuwihiik chi reyil. Eh chi re' taqe i wiih numaam naa akojom chi reyil chi juneliik. Je' aj re' noq re' hin, hin awaj kamanoom k'ahchi' kiin chi tiij chawach. 26Re' hat Jaaw, hat Dios aq'orom rib'iral chi naa aye'em weh aawotob'il, i hin, hin awaj kamanoom. 27QaJaaw Dios i nupahqaaj aweh chi chakuxisaj taqe chi juneliik i wiih numaam i hin, hin awaj kamanoom ruum xaq'or chi naa ruwihiik kajaawriik chi juneliik chawach. Ruum aq'orom chi naa kiin akuxisam hin, eh je' wo' taqe i wiih numaam, inki David.

will be added

X\