1 CRONICAS 13

1Re' reey David xupahqaaj keh k'amal kib'eeh i jinaj miil chi soldado, je' wo' keh i k'amal kib'eeh i jinaj siento chi soldado, je' wo' keh i kajaaw i soldado. 2Eh je' wili i xuq'or keh i aj Israel kimolom kiib' ar: Wila' ruk'ul ak'ux taq i hat, wila' je' re' i xraaj i QaJaaw Dios chi neenqataq'aaj kik'amariik taqe i quch tinamitaal wilkeeb' chupaam chu'nchel i qatinamiit Israel. Eh nee wo' inqataq'aaj kik'amariik i k'amal kib'eeh aj tiij re' ruuk' taqe i aj Levíta wilkeeb' pan kitinamiit, pan kiye'aab' reh chi neenchalik kimol kiib' quuk' ayu'. 3Reh chi neenqak'am chaloq i hoj i loq'laj ru kaxa i QaJaaw Dios ruum nik' najtiil xub'an chi reyil i Saúl sahchinaq panqak'ux chi jumpech, inki. 4Eh chu'nchel i tinamit kimolom kiib' ar xuk'ul kik'ux i xuq'or, eh xkiq'or chi ma' xta reet chi neenb'aan. 5Eh re' i reey David xumol kiwach chu'nchel i aj Israel xutoq'aa' reje pan tinamit Sihor wilik pank'ula't reh i Egipto, eh xponik panookb'al reh i Hamat. Reh chi xkesaj chee ru kaxa i QaJaaw Dios wilik ar Quiriat-jearim xkik'am cho Jerusaleem. 6Eh re' David ruch'ihil taqe chu'nchel i aj Israel xiooj Quiriat-jearim Baala wo' inkiq'or reh wilik paruyuq'ul i Judá re' chi xkesaj cho ar i ruloq'laj kaxa i QaJaaw Dios wilik chi kixilak taqe i k'achaach wilik kixiik' re' wo' hoq inq'orarik wii' i rub'ihnaal. 7Chi riij i re' xkesaj chaloq parupaat i Abinadab i loq'laj ru kaxa i QaJaaw Dios xkiyeew cho chupaam i jinaj ak' laj kareta. Eh re' Uza ruch'ihil i Ahío kib'esanik ree kareta. 8Re' David ruch'ihil chu'nchel i aj Israel xakipisk'anik chik pankooq ruum rusuqkiil kik'ux chuwach i Dios, k'ahchi' keeb' chi tz'uuy, k'ahchi' kiq'ojem i arpa, kik'ahaam wach q'ooj, kisetesaq q'ooj intz'ilininik, kipulato q'ooj, i kituun. 9Eh noq xi ponik chupaam i ye'aab' i resaj wii' riij i rutrigo i Quidón xkitoxk'iij i kooq i b'oyax kiqerinik ree kareta, eh re' Uza xuchohpaaj i ruloq'laj kaxa i QaJaaw Dios reh chi ma' xq'ehb'ik taj. 10Eh re' i QaJaaw Dios ma' k'isiin ta xchalik rujosq'iil chinaah i Uza ruum xuchop reje i loq'laj kaxa, ruum i re' xa re' yu' xukansaj i Uza. 11Re' David ma' xponik ta chuwach i xub'an i QaJaaw Dios chi xukansaj i Uza. Ruum aj re', re' ye'aab' re' re' Pérez-uza i rub'ihnaal, eh je' re' rub'ihnaal xkahnik chi jumpech. 12Eh re' David chupaam q'iij re' re' ma' k'isiin ta xchalik ruyo'jiik chuwach i Dios, je' wili i xuq'or: Re' hin ma' ruk'ul ta chi neenuk'am reje i ruloq'laj kaxa i QaJaaw Dios, inki. 13Eh ma' xkik'am ta chaloq i loq'laj kaxa Jerusaleem parutinamiit i David. Ar la' xutaq'aaj rukanab'jiik chupaam i rupaat i Obed-edom patim pan tinamit Gat. 14Eh re' i ruloq'laj kaxa i QaJaaw Dios ixib' poh xkahnik chupaam i rupaat i Obed-edom. Re' QaJaaw Dios xukuxisaj i Obed-edom, je' wo' chu'nchel i chib'ih wilik reh.

will be added

X\