1 CRONICAS 10

1Re' taqe i aj filisteo xkian i q'aq'inik kuuk' i aj Israel. Eh xkimol chi elik i aj Israel chikiwach, ma' k'isiin i xkikansaj chinaah i yuuq' wilik Gilboa. 2Eh re' taqe i aj filisteo xkajimaj reje i Saúl ruch'ihil taqe i rak'uun korehtaal xkikansaj i Jonatán, Abinadab, i Malquisúa rak'uun taqe i reey Saúl. 3Chi riij i re' kow xkitoq'aa' q'aq'inik chi rukanteesjiik i Saúl, korehtaal xkireq ruuk' kiflecha. 4Eh noq ti' chik wilik i Saúl je' wili i xuq'or reh ink'amwik reh ch'ihch' ko'lb'al riib': Chawesaj chaa q'aslaj ch'ihch' kinakansaj chi jumpech. Re' hin ma' inwaaj taj chi nee kinki kaq se'laaj i ma' keht'al ta wach i Dios noq nee kinki kansaj, inki. Xa re' la' re' i winaq ma' xraaj ta rub'aan ruum ma' k'isiin inyo'jik. Eh re' Saúl xuchop chee q'as ju' ch'ihch' xumin riib' chi ju'. 5Eh noq xrilow ink'amwik reh i ru nimlaj pulato ch'ihch' chi re' Saúl kamnaq chik xumin wo' riib' chi ju' ruq'as ju' ch'ihch' i reh, eh xkimik. 6Je' aj re' noq xkimik i reey Saúl ruch'ihil ixib' chi rak'uun, eh chu'nchel i awach reh parupaat junkimiik taqe ruuk'. 7Eh noq xkib'iraj chu'nchel i aj Israel patim taqe wach k'ixkaab' i xkimol chi elik, chi xkanteesjik i reey Saúl ruch'ihil taqe rak'uun, xkiq'eb' chaloq taqe i kitinamiit, re' chik taqe i aj filisteo xiooj chi patinik ar. 8Eh noq xi ponik chi junwaar taqe i aj filisteo chi q'uchariik i chib'ih keh i kamnaq, xponik kireq chi tuch'lik i ruti'jolal i Saúl ruch'ihil i kiti'jolal i rak'uun chinaah i yuuq' wilik Gilboa. 9Eh xkesaj i ruso' reh q'aq'inik chi riij i Saúl xkik'am reje i naah ruch'ihil taqe i rutz'a'amb'aal. Eh xkitaq'aaj ruq'orariik chupaam i chu'nchel i kitinamiit i aj filisteo chi xkimik chik i Saúl. Eh xkitaq'aaj wo' ruq'orariik chupaam i rupaat i kitz'aqoj tiyoox. 10Chi riij i re' xkiyeew ruq'aslaj ch'ihch' chupaam i rupaat taqe i kitiyoox. Eh xkit'uyaa' i naah chupaam i rupaat i kitiyoox Dagón rub'ihnaal. 11Noq xkib'iraj rib'iral i aj Jabes, taqe i aj Galaad chib'ih jariik i xkian i aj filisteo reh i Saúl. 12Xkimol kiib' chu'nchel i winaq aj Jabes. Re' taqe i kow kiib' chi q'aq'inik xiooj reje xponik kik'am i ruti'jolal i Saúl je' wo' kiti'jolal ixib' chi rak'uun, xkik'am reje Jabes. Eh ar xkimuq'aa' chi ri'sil i juniwal i chee' tz'inuj, ruum i re' wuquub' q'iij ma' xkian ta kiwa' kihaa'. 13Je' aj re' noq xkimik i reey Saúl ruum ma' xunimaj taj i QaJaaw Dios, xuq'ehtaaj i ruq'oral, eh xupahqaaj runa'ojb'al ruuk' jinaj ixoq aj q'iij. 14Ma' re' ta ruuk' i QaJaaw Dios xupahqaaj runa'ojb'al. Ruum i re' xuyeew q'ab' i Dios chi xkanteesjik. Eh re' chik i David i rak'uun i Isaí xupab'aa' chi reyil ar Israel.

will be added

X\