SAN MATEO 1

1Tíhi mé chrónka nkexro kaín tí sín k'uaxrjeníxin ch'ín Jesucristo. Mé jehe ch'án k'uaxrjeníxin ch'án tí ch'ín David la ko tí ch'ín Abraham. 2Ch'ín Abraham mé it'é tí ch'ín Isaac la ko ch'ín Isaac mé it'é tí ch'ín Jacob la jehe ch'án mé it'é tí ch'ín Judá la ko kaín kíchó ch'án. 3Ch'ín Judá mé it'é tí ch'ín Fares la ko ch'ín Zara la tí ìné sín mé it'in Tamar. Ch'ín Fares mé it'é tí ch'ín Esrom la jehe ch'án mé it'é tí ch'ín Aram. 4Ch'ín Aram mé it'é tí ch'ín Aminadab la jehe mé it'é tí ch'ín Naasón la jehe mé it'é tí ch'ín Salmón. 5Ch'ín Salmón mé it'é tí ch'ín Booz la ìné mé tjan Rahab. Ch'ín Booz mé it'é tí ch'ín Obed la ìné tí ch'ín Obed mé tjan Rut. Tí ch'ín Obed mé it'é tí ch'ín Isaí. 6Ch'ín Isaí mé it'é tí rey David la jehe ch'án la ko tí tjan k'uéchjién ch'ín Urías mé táha it'é la ko ìné tí ch'ín Salomón. 7Ch'ín Salomón mé it'é tí ch'ín Roboam la jehe mé it'é tí ch'ín Abías la jehe ch'án mé it'é tí ch'ín Asa. 8Ch'ín Asa mé it'é tí ch'ín Josafat la ch'ín Josafat mé it'é tí ch'ín Joram la ch'ín Joram mé it'é tí ch'ín Uzías. 9Ch'ín Uzías mé it'é tí ch'ín Jotam la ch'ín Jotam mé it'é tí ch'ín Acaz la ch'ín Acaz mé it'é tí ch'ín Ezequías. 10Ezequías mé it'é tí ch'ín Manasés la ch'ín Manasés mé it'é tí ch'ín Amón la ch'ín Amón mé it'é tí ch'ín Josías. 11Ch'ín Josías mé it'é tí ch'ín Jeconías la ko kíchó ch'án. Tí sín a mé k'uéjó sín tí ya̱on a ntá xrína̱hya ikui tí sín Babilonia sákjuíko sín tí sín israelita kíxin ts'ejóchjina sín tí chjasén sín Babilonia. 12Ntá kjuixin sákjuí sín mé ch'ín Jeconías mé it'é tí ch'ín Salatiel la ch'ín Salatiel mé it'é tí ch'ín Zorobabel. 13Ch'ín Zorobabel mé it'é tí ch'ín Abiud la ch'ín Abiud mé it'é tí ch'ín Eliaquim la ko ch'ín Eliaquim mé it'é tí ch'ín Azor. 14Ch'ín Azor mé it'é tí ch'ín Sadoc la ko ch'ín Sadoc mé it'é tí ch'ín Aquim la ko ch'ín Aquim mé it'é tí ch'ín Eliud. 15Ch'ín Eliud mé it'é tí ch'ín Eleazar la ch'ín Eleazar mé it'é tí ch'ín Matán la ch'ín Matán mé it'é tí ch'ín Jacob. 16Ch'ín Jacob mé it'é tí ch'ín José la ch'ín José mé k'óna xìí tjan María la jehe tjan María mé ìné tí ch'ín Jesús. Tí ch'ín Jesús la mé nchek'in sín Cristo. 17Mé xiḵ aha catorce t'áchrii̱ k'uaxrjeníxin tí ch'ín Abraham ntá kjuák'e ch'ín David la í jnko catorce t'áchrii̱ k'uaxrjeníxin tí ch'ín David la ntá tí sín Babilonia sákjuíko tí sín israelita chjasén sín la ntá í jnko catorce t'áchrii̱ k'uéjó la ntá kokjíhi Cristo. 18Tí kokjíhi Jesucristo mé xiḵ ihi kónhen. Tí tjan María ìné ch'án mé tso̱te̱he tjan ch'ín José. A̱ ntá na̱xa̱ kuákjahya kíchó sín ntá kónoxín kíxin jehe tjan la ó tjeyá tjan kíxin tíha la kjua̱cha̱xién Ncha̱kuen Dios. 19Ch'ín José mé tí nkexro ts'óna xìí tjan María, mé ijnko chojni jína la tjinkakonhya ch'án noxín chrók'óxroan ch'án tjan ntá kjuenka̱yáxin ch'án imó chrókjuáke̱he̱ ch'án tjan kíxin tjinkaon ch'án kíxin ninkexró tsoṉ oehya. 20Ntá tí na̱xa ̱ tjenkay̱ áxin ch'án kíxin xiḵ aha sich'e ch'án ntá kotáchrién ch'án chrónkaxín titàya̱ k'uíkuèn ch'án ikui ijnko ángel kuènte Ìnchéni nixja, chrónka kíxin: ―José jaha mé k'uaxrjeníxian David. Tóxakuanhya la ko chrakonhya chrókuákjá tjan María ts'óna ichjián kíxin tí xjan tsochónta tjan la kjuachaxin kuènté Ncha̱kuen Dios ikui mé k'óna tí xjan a. 21Sinchekokjíhi tjan ijnko xjan ntoa la its'in xjan Jesús mé xiḵ aha its'in xjan kíxin jehe xjan tsjakjìin ijié̱ chojni ―mé xiḵ aha chrónka tí ch'ín ángel. 22Kaín tíha kónhen kíxin tsoxiteyá tí nkehe chrónka Ìnchéni k'uénixja tí sín k'uéchrónka itén ch'án ósé. Mé ntáchro xiḵ ihi: 23Ijnko tjan na̱xa̱ chóntahya chojni ntoa mé tsjak'eyá tjan la tsochónta tjan ijnko xjan, la sinchek'in sín ch'án Emanuel, la tíha t'axrjexín kíxin Dios tjejókoni. Mé xiḵ aha chrónka itén Dios. 24Ntá k'uàya ch'ín José ntá kjuínchexiteyá ch'án tí nkehe k'ue̱to̱an tí ángel kuènte Ìnchéni la kuákja ch'án tjan María ts'óna ichjién ch'án. 25A̱ ntá kjónté xiḵ aha la na̱xa ̱ kójnkojiéhya sín tí na̱xa̱ kokjíehya xjan la ntá tí xjan mé kjuínchek'in sín Jesús.

will be added

X\