MATEO 1

1Re' hu̱j tz'ihmbimaj wi̱' quibihnal take rima̱m rati't i Jesus risakomej lok wach chi re' Jesus, re' i Pahbamaj chi K'atal K'oric maj re're', ra̱' ri'sil cho ma' Awraham eh ra̱' ri'sil wo' cho ma' Tawiy nqui rik'or i hu̱j re're' chi je' wili: 2Re' ma' Awraham xac'unej cho Isahac, re' Isahac xac'unej cho Jacow, re' Jacow xac'unej cho Jurah ch'i̱l take junlaj chi ras richa̱k', 3re' Jurah xac'unej cho i Pa̱res ch'i̱l i Sa̱ra naxic'am i Tama̱r chi rehq'ue̱n, re' Pa̱res xac'unej cho Hesrom eh re' Hesrom xac'unej cho i Aram. 4Re' Aram xac'unej cho i Aminaraw, re' Aminaraw xac'unej cho i Nahason, re' Nahason xac'unej cho i Salmon, 5re' Salmon xac'unej cho i Wohos naxic'am i Rahaw chi rehq'ue̱n, eh re' Wohos xac'unej cho i Ower naxic'am i Rut chi rehq'ue̱n, re' Ower xac'unej cho Isayih, 6re' Isayih xac'unej i Tawiy. Re' Tawiy naxwih'ic cho chi k'atal k'oric chi quina̱ take ra̱' ri'sil cho Israhel, xac'unej cho i Salomon naxic'am chi rehq'ue̱n i rehq'ue̱n cahnok i Uri̱yas. 7Re' Salomon xac'unej cho Rowoham, re' Rowoham xac'unej cho i Awi̱yas, re' Awi̱yas xac'unej cho i A̱sa, 8re' A̱sa xac'unej cho i Josapat, re' Josapat xac'unej cho i Joram, re' Joram xac'unej cho i Usi̱yas. 9Re' Usi̱yas xac'unej cho Jotam, re' Jotam xac'unej cho i Acas, re' Acas xac'unej cho i Esequi̱yas, 10re' Esequi̱yas xac'unej cho i Manases, re' Manases xac'unej cho Amon, re' Amon xac'unej cho Josi̱yas, 11eh pa ribihnal i Josi̱yas jenaj queh take rac'u̱n xac'unej cho i Jeconi̱yas ch'i̱l take richa̱k', re' xi'asjic chiwach take ha̱b nok re' take kama̱m kati't xic'amaric je ar pan tinamit Wawilo̱nya. 12Nok wilque̱b chic ar Wawilo̱nya, re' Jeconi̱yas xac'unej cho Salatyel eh re' Salatyel xiq'uihsaj cho i Sorowawel. 13Pa ribihnal aj i Sorowawel re' je' jenaj queh ra̱' ri'sil cho ru' xac'unej cho Awiyur, eh pa ribihnal i Awiyur, re' jenaj queh ra̱' ri'sil cho ru' xac'unej cho Elyaquim. Pa ribihnal wo' i Elyaquim, re' jenaj queh ra̱' ri'sil cho ru' xac'unej cho i Asor, 14eh pa ribihnal i Asor, re' jenaj queh ra̱' ri'sil cho ru' xac'unej cho Saroc. Pa ribihnal i Saroc, re' jenaj queh ra̱' ri'sil cho ru' xac'unej cho i Aquim, eh pa ribihnal i Aquim, re' jenaj queh ra̱' ri'sil cho ru' xac'unej cho Elyur. 15Pa ribihnal i Elyur, re' jenaj queh ra̱' ri'sil cho ru' xac'unej cho Elya̱sar, eh pa ribihnal i Elya̱sar re' jenaj queh ra̱' ri'sil cho ru' xac'unej cho i Matan. Pa ribihnal wo' i Matan, re' jenaj queh ra̱' ri'sil cho ru' xac'unej cho i Jacow, 16eh pa ribihnal i Jacow, re' jenaj queh ra̱' ri'sil cho ru' xac'unej cho i Chep re' ribahi̱l i Mari̱ya. Ru̱c' i Mari̱ya wili, ar xasjic i Jesus, nqui rik'or i hu̱j re're'. Je' re' k'uru', chiri̱j i Jesus re' enkak'or chi til re' i Pahbamaj chi K'atal K'oric, 17keht'alim hab wach take cho rima̱m rati't, re' take eriban chi enajlajic ri̱j chi xib tik ro̱k chi c'acharic ca'nam cho chi cajlaj buhr quiwi̱' chi je' wili: Cu ru̱c' cho ma' Awraham cu nponic ru̱c' ma' Tawiy wilic cajlaj buhr chi c'acharic. Chiri̱j chic cho re're', cu ru̱c' rik'ijil quic'amaric je kich katinami̱t ar Wawilo̱nya wilic wo' cajlaj buhr chi c'acharic. Cu ru̱c' cho rik'ijil re're', cu nponic ru̱c' rik'ijil ric'acharic kAja̱w Jesus, re' Pahbamaj chi K'atal K'oric, wilic wo' cajlaj buhr chi c'acharic. 18Re' asjic xiban i Jesus re' Pahbamaj chi K'atal K'oric je' wili riwi̱': Re' ritu̱t i Jesus re' Mari̱ya ribihnal, nok ja' rituna̱' ta pe ri̱b chi c'acharic rich'i̱l i Chep, re' xpahkanic reh chi rehq'ue̱n, xcahnic pe' nchel chi yowa̱b ixok chic ru'um rajawric i Lok' laj rUxlabal i Dios. 19Chi ma' reht'alim ta chaj wa'ric chi je' chic re' riwi̱' i Mari̱ya, re' Chep ma' xa̱j ta nak chic rituna̱b ri̱b rich'i̱l i Mari̱ya ru'um nok til ric'am na̱ chi coric nic' nimal rik'or i C'uhbal Ye'o̱j reh Moyses. Re' cok ru' reh chi ma' eta ncahnic i Mari̱ya pan q'uixbilal, xa̱j ricana̱b chi ma' xik'or ta queh take c'acharel chaj bih riwi̱' chi je' re' naribanam. 20Chi je' re' ricapew-bal i Chep, pan jenaj chak'ab jenaj raj tz'e' wa̱ch i Lok' laj Ajabe̱s Dios xic'uhtaj ri̱b reh pa riwiric eh je' wili xik'or reh: «Re' hat Chep, ra̱' ri'sil cho ma' Tawiy, chac'am i Mari̱ya chi awehq'ue̱n. Ma̱capaj chi mahc chaweh ric'amaric chi je' ricab wilic wi̱' maj re' ha'lac'un rihkam cho ru', re' rajawric i Lok' laj Uxlabal xbanic chi xcahnic chi je' re', nqui xitak'a̱' cho rik'ormojic aweh i Dios. 21Re're' xitak'a̱' wo' rik'ormojic chi re' ha'lac'un narasjic ru̱c' i Mari̱ya chacoj tak ribihnal chi Jesus re' ra̱j rik'orom Aj Co'lonel. Je' re' ribihnal chacoj maj re're' narico'lonic queh awich atinamital chiwach i ti'c'axic wilic chi quina̱ ru'um quimahc, nqui xik'or i raj tz'e' wa̱ch i Dios. 22Ru̱c' xik'or i aj tz'e' wa̱ch re're' reh ma' Chep, xo̱j elok wach rik'orbal i Lok' laj Ajabe̱s Dios rik'orom cho ru̱c' chi̱' raj k'orol C'uhbal, re' Isayi̱yas ribihnal 23naxik'or cho chi je' wili: “Na ilirok chi narasjic i rac'u̱n jenaj k'ahxok cahnanak chi yowa̱b ixok chic chi cu ja' wih'inak ta ru̱c' winak, re' hoj ra̱' ri'sil cho ma' Israhel kak'or tak i k'oric wili: “Emanwel”, nqui Isayi̱yas. Re' k'oric re're' keht'alim i hoj ra̱' ri'sil cho ma' Israhel maj re're' ra̱j rik'orom pan kak'orbal re' hewre̱yo ribihnal: “Re' Dios wilic chi kaxilac chi kaco'ljic”. 24Je' re' k'uru' chi ribanaric xk'ormojic reh ru'um raj tz'e' wa̱ch i Lok' laj Ajabe̱s Dios, re' Chep naxc'a'chic ti wach chiwach i wahk'ek re're', xo̱j ti ru̱c' i Mari̱ya eh xitik'a̱' wo' chic wach chi naric'amam ri̱b rich'i̱l 25eh chi je' re' xquic'am qui̱b, xa re' la' ru' cu rehtal asjanak chic i pe̱t rac'u̱n i Mari̱ya re' xquicoj ribihnal chi Jesus, cu re' aj ru' xquina'bej quiwach pan quic'acharic take qui̱b chi c'acharel re're'.

will be added

X\