San Marcos 3

1Sa ye Jesu ʉsã judio masa buheri wʉhʉpʉ esaro, sajãhye tja. Sa yero omoca bʉhariquiro gʉ̃hʉ topʉ ijiahye. Sa ye ti wʉhʉpʉ ijiyequina Jesu dihitare ihñadoque ohõahye. 2Saurú ijigʉ̃ Jesu omoca bʉhariquirore tiquiro yʉhdʉogʉ̃ ihña duahye tiquina. Tiquiro sa yegʉ̃ ihñañe tiquirore yahusã duahye. “Mari sori decore Jesu dahraro nine”, ni yahusã duahye tiquina. 3Sa yero ohõ saha niahye Jesu omoca bʉhariquirore: —Wahcãdʉca saya. Ohõpʉ ahtaya, niahye. Sa ni tuhasa ti wʉhʉpʉ ijiyequinare yahuahye: 4—¿Saurú ijigʉ̃ quehnoañene yegʉ̃ quehnoaedajari? ¿O ñañe yegʉ̃ pehere quehnoajari, mʉsa tʉhotugʉ̃? Saurú ijigʉ̃ masʉnore masogʉ̃ quehnoarĩne. Masʉnore wejẽgʉ̃ pehere quehnoaedare, ni yahuahye Jesu tiquinare. Tiquiro sa niepegʉ̃ta tiquina pehe ne yʉhtierahye. 5Tiquina sa yʉhtieragʉ̃ ihñano Jesu tiquina mehna usuahye. Tiquina tʉho dueragʉ̃ ihñano Jesu bʉjʉa witiahye. —Mʉhʉ omocare siõ potoya, niahye tiquiro omoca bʉhariquirore. Tiquiro sa nigʉ̃ tʉhoro tiquiro omocare siõ potoahye. Tiquiro siõ potogʉ̃ta omoca quehnoa wahahye. 6Sa omoca quehnoa wahagʉ̃ ihñañe fariseo masa wijiaa wahahye. Wijia, Herode mehna cjẽna mehna cahmecoa, “¿Dʉhse ye Jesure wejẽnatari mari?” niahye tiquina basi. 7Sa ye Jesu tiquiro buheyequina mehna ditara cahapʉ wahahye. Tiquina sa wahagʉ̃ ihñañe Galilea cjẽna masa peyequina tiquiro bato esahye. Sa ye Judea yehpa cjẽna, Jerusalẽ cjẽna, Idumea yehpa cjẽna, Jordã wame tiri ma ape sie pahrẽ cjẽna, Tiro wame tiri maca cjẽna, to cahapʉ ijiyequina, Sidõ wame tiri maca cjẽna, to cahapʉ ijiyequina mehna masa peyequina ijipihtiyequina tiquiro yerire tʉhoye, tiquiro cahapʉ esahye. 9Sa ye masa peyequina ijiye, Jesu cahare bihsa dʉca sahye. Sa yero Jesu yucʉsare quehno pahsa dutiahye tiquiro buheyequinare. 10Peyequina dohatiyequinare tiquiro yʉhdʉogʉ̃ ihñañe apequina dohatiyequina gʉ̃hʉ Jesure piha duaye, bihsa dʉca sahye. 11Sa ye watĩare cʉoyequina pehe Jesure ihñañe tiquiro cahapʉ dʉsepe curi mehna quehe sahye. —Mʉhʉ Cohãcjʉ̃ macʉ ijire, ni sañuducuahye tiquina tiquirore. 12Sa yero tiquinare Cohãcjʉ̃ macʉno tiquiro ijiyere tutuaro mehna apequinare yahu dutierahye Jesu. 13Sa ye Jesu cʉnʉpʉ mʉja, tiquiro cahmeñequinare pijiahye. Tiquiro pijigʉ̃ tʉhoye, tiquiro cahapʉ esahye tiquina. 14Sa yero doce ʉmʉare tiquiro mehna cjẽnare, tiquiro ohoatiquinare, apeye macaripʉre tiquiro yere buheatiquinare bese docoahye Jesu. Sa ye tiquina ya curua Jesu cũriquina wame tiahye. 15Sa yero dohatiyequinare yʉhdʉoatire, watĩare cohãti gʉ̃hʉre cũahye tiquinare. 16Ahriquina ijiahye doce ʉmʉa Jesu tiquiro bese docoriquina: Simo, Santiago Zebedeo macʉno, Ñu Santiago bahʉro, Andre, Felipe, Bartolomé, Mateo, Tomasu, Santiago Alfeo macʉno, Tadeo, Simo celote ya curua cjʉ̃no ijimediquiro, Juda Iscariote, ahriquina ijiahye tiquiro bese docoriquina. Jesu Simore Pedro wame yeahye. Santiagore, Ñu mehna Boanerges wame yeahye. Boanerges “Ʉpo cjẽna”, nino nine. Juda Iscariote Jesure ihña tuhtiyequinare ihñoatiquiro ijiahye. 20Tiquinare bese doco tuhasa, dijia, Jesu tiquiro buheyequina mehna wʉhʉpʉ sajãa wahahye. Sa ye topʉ pari turi masa peyequina cahmecoañe, bihsaa wahahye. Tiquina sa bihsagʉ̃ ihñano Jesu ihya masiedahye. Sa ye tiquiro buheyequina gʉ̃hʉ ihya masiedahye. 21Sa ye apequina Jesu acaye tire tʉhoye tiquiro cahapʉ esaye, tiquirore ñehemahye. “Tiquiro tʉho masieniquiro waharo nine”, nimahye tiquina. 22Apequina ohõ saha nimahye: —Beelzebú tiquirore sa wahagʉ̃ yero niaga. Tiquiro watĩare cohãno, Beelzebú watĩa pʉhtoro tutuaye mehna tiquinare cohãre, nimahye Jerusalẽpʉ ahtariquina ʉsã judio masare buheyequina. 23Tiquina sa nigʉ̃ tʉhoro Jesu pehe tiquinare piji, tiquiro tʉhotuye mehna queoye mehna yahuahye tiquinare, “Watĩno ye tutuaye mehna watĩare cohãgʉ niedaja”, nino taro. 24—Watĩa tiquina basi cohã masiedare. Sa ye ihcã yehpa cjẽna tiquina basi cahme wejẽ, ti yehpa cjẽna yaria pihtia wahaboaga. 25Sa ye ihcã wʉhʉ cjẽna tiquina basi cahmequeñe ti wʉhʉ cjẽna waha pihtia wahaboaga. 26Sa yero Satana watĩa pʉhtoro pehe watĩare cohãno tiquina basita cahmequeñe niboaga. Sa ye tiquina waha pihtia wahaboaga. 27’Ohõ sahata ijire mari queoye mehna buhegʉ̃. Tutuariquiro ya wʉhʉpʉ apequiro sajã sa yaque masiedare. Tutuariquirore dʉhteraro tiquiro ya wʉhʉpʉ sajã sa yaque masiedare. Tutuariquirore tiquiro dʉhteri bato sajã sa yaque masine, ni yahuahye Jesu. (Ohõ saha ni yahuahye watĩnore tiquiro yʉhdʉdʉcarire yahuro. Watĩno tutuariquiro tiquiro ijiepegʉ̃ta Jesu tiquirore yʉhdʉdʉcare watĩare cohãno.) 28Sa ni tuhasa ohõ saha ni yahu nemoahye Jesu: —Poto niita niaja mʉsare. Ijipihtiye ñañe masa tiquina yegʉ̃ tiquina yahuducugʉ̃ gʉ̃hʉre Cohãcjʉ̃ bo masine. 29Sa boeperota Espíritu Santore tiquina ñano yahuducugʉ̃ ti pũritare ne bosi. Tiquina sa nidi buhiri sa buhiri tiducuyequina ijieta, niahye Jesu tiquinare. 30Jesu Espíritu Santo tiquiro tutuaye mehna watĩare tiquiro cohãepegʉ̃ta “Tiquiro watĩno tutuaye mehna watĩare cohãno nine”, nimahye masa. Tiquina sa nigʉ̃ tʉhoro ti quitire Espíritu Santo quitire yahuahye Jesu tiquinare. 31Sa ye Jesu bahana tiquiro pacoro mehna wihiahye. Sa wihiye sopecahapʉ ijiahye. Apequinare piji dutiahye tiquirore. 32Sa ye masa tiquiro cahapʉ dujiyequina yahuahye tiquirore. —Mʉhʉ paco, mʉhʉ bahana mehna sopecahapʉ mʉhʉre pijiri, niahye. 33Tiquina sa nigʉ̃ tʉhoro ohõ saha niahye Jesu tiquinare buhero taro: —¿Noa ijiajari yʉhʉ paco, yʉhʉ bahana gʉ̃hʉ, mʉsa ihñagʉ̃? niahye tiquiro tiquinare buhero. 34Sa nino tiquiro caha dujiyequinare ihñano ohõ saha niahye: —Ahriquina ijire yʉhʉ paco, yʉhʉ bahana yero saha ijiyequina. Cohãcjʉ̃ cahmeñene yere ahriquina. 35Sa yeyequina yʉhʉ bahʉ, yʉhʉ baho, yʉhʉ paco yero saha ijire, ni buheahye Jesu tiquinare.

will be added

X\