Luk 15

1Enitaim Jisos dey prish, tax koletors and sinas dey kom listin to am. 2Bot di Farisi pipol and di law tishas dey komplain sey, "Dis man dey folo sinas chop." 3So, Jisos kon tel dem dis parabol: 4"If yu get ondred ship and won kon loss, yu nor go liv di nainti-nain wey rimain go faind dat won til yu si-am? 5"Den wen yu si-am, yu go kari am for shoulda, dey hapi. 6"Wen yu rish haus, yu go kol yor frends and nebors sey, 'Mak una kom folo mi hapi, bikos I don si my ship wey loss bifor.' 7"I tel una tru wod, na so hapines dey for hevun wen won sina turn from sin kom mit God, pas nainti-nain gud pipol wey don alredi dey wit God. 8"Or, if won wuman get ten koins and won loss, wetin e go du? E nor go lite lamp, swip di hol haus ontil e si-am? 9"Wen e don si-am, e go kol en frends and nebors gada kon sey, 'Mak una kom folo mi hapi, bikos I don si my moni wey loss bifor.' 10"I tel una tru wod, na so God angels dey hapi, wen won sina turn from sin kom mit God." 11Den Jisos sey, "Won man dey wey get tu sons. 12Di younga won kon tel en papa, 'Giv mi my own share for awa propati.' So en papa kon gi-am. 13"Afta som taim, di young boy kari evritin wey e get travol go won far kontri kon waste all en moni for yeye life. 14"Wen e don finish all wetin e get, e nor si enitin to chop, bikos hunga dey for dat kontri, so e kon dey sofa. 15"Naim e kon dey wok for won man for der, di man dey send am go en farm go giv pig fud. 16"Di hunga kon mak am dey won chop di fud wey di pig dem dey chop, bikos nobodi gi-am fud. 17"Bot wen en eye klear, e kon sey, 'All my papa wokas get fud wey dem nor fit chop finish, bot hungri don nearli kil mi for here! 18'I go get up go mit my papa tel am, "Papa I don sin against hevun and against yu. 19"I nor rish mak dem kol mi yor pikin again. Mak yu tak mi as won of yor wokas.'" 20"So e get up kon go mit en papa. Bot wen en papa si-am dey kom from far, e sori for am, run go mit am, hol am near bodi kon kiss am. 21"Den di pikin tel am, 'Papa, I don sin against hevun and yu. I nor rish mak dem kol mi yor pikin again. Mak yu tak mi as won of yor wokas.' 22"Bot di papa kol en savants kon tel dem, 'Mak una bring di best klot, ring and shu and mak una wear dem for my pikin. 23'Den, mak una go tak di melu wey fat pas, kil-am mak wi du parti, 24bikos dis my pikin die bifor, bot naw, e don kom bak to life, e loss bifor, bot naw, I don si-am!' So di parti kon start. 25"By dat taim, di senior son dey kom from farm wer e go wok. Wen e don near haus, e kon dey hear muzik and si pipol dey dance. 26"So e kol won savant kon ask am, "Wetin dey hapun?' 27"Di savant ansa, 'Yor broda don kom bak and yor papa don kil di melu wey fat pas, bikos e kom bak wel and nor-tin bad hapun to am.' 28"Di senior broda kon dey ves and e nor gri enta haus, so en papa kon beg am mak e enta. 29"So, e tel en papa, 'Si, all dis meni years I dey wok laik slave for yu and e nor get eni taim wey I disobey yu, bot yu neva giv mi ivun won smol goat mak I du parti wit my frends. 30'Bot wen dis yor pikin kom bak afta e don waste all yor moni wit ashawo, yu kon kil di melu wey fat pas for am!' 31"Den di papa tel am, 'My pikin, yu always dey here wit mi and evritin wey I get na yor own. 32'Bot e gud mak I du parti, bikos yor broda die bifor, bot naw, e don kom bak to life, e loss bifor, bot naw, wi don si-am.'"


Copyrighted Material
Learn More

will be added

X\