TITUS 3

1Momeklatk er a ruumerang me bo loltirakl a tekingir tirkel merreder ma rulab a dereder, e di loruul a ungil, 2e mdu er tir me lak lolekoi a mekngit el tekoi el kirel a ngii di le chad, e bai le chad er a budech e le medemedemek a rengrir e le bekokuii el mor a re bek el chad. 3Ele ser a ngar a mong e kid me kede mle mekebelung e dimlak dolengesenges er a Dios e mle cheleuid. Kede mle sibil a bek el bedengel a ngibes ma tametereng. A klengar er kid a mle mui er a omerellel a mekngit el mor a re chad ma chelechei; kede mle chetirir a re chad, e di mle kauketui er a delongeled. 4Ngdi ser a be lecholt a klechubechub ma bltikerreng er a Dios el Osebeled, 5e ng ulsebelid. Ng diak lungil el omerelled el de riruul a uchul; ng kmal di klechubechub er ngii el mer kid a uchul me ng ulsebelid, el oeak a Chedaol Reng, el ngii a milskid a beches el cheroll ma beches el klengar el kilikidid. 6A Dios a rirellii a kmal klou el tekoi er a le beskid a Chedaol Reng el oeak a Jesus Kristus el Osebeled. 7Me ng oeak a krasia er ngii e kede mo ngmai a dikesed er sel dolatk e mengiil er ngii el diak a ulebengelel klengar. 8Tial bla kdelii a meral tekoi. Ng kmal soak a cho msal osiich a ikal tekoi el mor tirkel oumera er a Dios, me bo le blak a rengrir el meruul a ungil tekoi, el ikel ungil el ngar ngii a belkul el kirir a re chad. 9E kau mongeroid er kau er a diak a belkul el klaititekangel, ma omesodel a mekemanget el beldeklel a ngklir a ruchelir a re chad, ma klautoketok ma klaititekangel er a tekoi er a Llach. A ikang a kmal diak a belkul e diak a ngeral le rellii. 10A kesengil e ng erul momeklatk er ngikel omuchel a klautok e mereko e mecherei. 11Ke medengei el kmo a choua isel chad a mekngit, el kngtil a di ngii el ochotii el kmo ng cheleuid. 12Sel bo kuderchii a Artemas ma lechub e ng Tikikus el ekong, e bor a ikel sebechem el osiik a cheldechulem e mer a Nikopolis, ele kmla tibir er a renguk a ngar isei er a belsechel a kelekolt. 13Moutekangel el ngosuir a Senas el chad er a llach ma Apolos er omerolir, me lak bo le metacherbesrir e le ngar ngii er tir a ikel lousbech. 14A re bebil er kid a kmal kirir el mesuub el mo meruul a ungil, me bo le sebechir el kudmokl a ikel meklou a belkul el tekoi el dousbech er tir er ngii, me lak bo lak a ultutelir. 15A rokui el chad el kimdak a melekoi a yorosku er tir el ekor kau. Mdu yorosku er kemam el mor tirkel rokui el betik a rengrir er kid el dedak el oumerang. A krasia er a Dios bo lobengkemiu el rokui.

will be added

X\