TITUS 2

1Ngdi kau, molisechakl er a ruumerang a ikel melemalt el osisechakl. 2Mongelechel er a re meklungal chad me bo lulserchakl a rengrir, e lulterekokl e lultebechel, e le melemalt a osisechakl el loumerang, e loubltikerreng, e longlou a rengrir. 3Ke dirrek el mengelechel er a re meklungal dil me bo lungil omerellir, e lak lolaes ma lechub e le blekall er a omelim el mesisiich el ilumel; ng kirir el olisechakl a ungil el omeruul, 4me bo le sebechir el olisechakl er a re mekekerei el redil el mo betik a rengrir er a re becherir, ma re ngelekir, 5e mo ultebechel, e klikiid, e meses e ungil er a ngerchelir er a blai, e orrenges a tekingir a re becherir, me lak a mekngit el medung el kirel a tekingel a Dios. 6Ke dirrek el melekoi er a re mekekerel chad me bo lomtebechel er tir. 7E kau bo lungil omerellem er a rokui el tekoi me losuub er kau a re chad, e le meral ngar a rengum osisecheklem el me tuobed el ultebechel. 8Mousbech a melemalt el tekoi el diak a mekngit el sebechel medung el kirel, ma chad el omtok, di le ngii el mo merur er ngii, ele ng diak a ngeral mekngit el sebechel el dmung el kired. 9Mongelechel er a re sibai me bo loltirakl a tekingir a re merreder er tir er a rokui el tekoi me bo lungil a rengir er tir. Ng diak loutoketok er tir, 10ma ka lorechorech a ngera er tir, e bai lolecholt a kmal merang e ungil el blekerdelir, me bo loruulchisel osisechakl el kirel a Dios el Osebeled er a rokui el tekoi. 11A Dios a ulechotii a klou el krasia er ngii el mo uchul e bo lesobel a rokui el chad, 12e dirrek el olisechakl er kid el mo imikr a blekerdelel a klechad el diak leko Dios, ma ngibeserreng er tial beluulchad, e mo kiei el ultebechel a rengud, e melemalt, e mengull er a Dios er tial beluulchad, 13e mengiil er a dolatk er ngii el sils er a deurreng, el sel be ledum er ngii a klebkellel a klou el Dios er kid ma Osebeled el Jesus Kristus, 14el ngii a di mle ngii el odersii a klengar er ngii el kired, el mo ngubetid e osebelid er a rokui el klengit, e mengikiid er kid el chedal, el semeriar el meruul a ungil el tekoi. 15Molisechakl a ikal tekoi; e mousbech er a klisichem el rokir el melisiich e mellach er a re chad el orrenges. Lak a chad el metetoech a medal er kau.

will be added

X\