ROM 9

1Ak melekoi a meral tekoi, el chedal a Kristus e melekoi, el diak kuutingaol. Ma renguk, el lomesiur er ngii a Chedaol Reng, a dirrek el melekoi el kmo ak melekoi a meral tekoi 2a kdu el kmo ng kmal mekngit a renguk, e diak bo lak a ringel er a chelsel a renguk. 3Ele chomko ak mo medebeakl el mo cheroid er a Kristus, e ng di ungil er a renguk, a lsekum ng mo uchul a klungiolir a re chedak el kim tal rasech. 4Tir el chad a chad er a Israel, el Dios a rirelleterir el mo ngelekel, e milsterir a dikesir er a klebkellel, e rirengedii a telbiil er a delongelel ngii me tir, e milsterir a Llach, ma meral rolel omengull el meluluuch er a Dios, ma ikel le tilib el kirir. 5E tir a ngelekir tirkel mle kot el mengilt er a Dios el mo uchelir a re chedal, ma Kristus me ng mle duubech el tar tir er a klechad er ngii. Ma Dios el merreder a rokui el tekoi bo le modanges el mo cherechar. Amen! 6E ngdi tial kulekoi er ngii a diak le belkul a kmo a telbilel a Dios a dimlak bo letaut, ele ng diak le rokui el ngelekel a Israel a mlengilt el mo chedal a Dios, 7ma ka le rokui el ngelekel a Abraham a mlo ngelekel el oltirakl er a telbilel el kmo, “Tirkel me duubech el okiu a Isak ia mo mokedo el kmo te ngelekem.” 8Me ng diak le rokui el ngelekel a Abraham er a klechad, te di tirkel mle duubech el okiu a telbilel a Dios a mlor a belsachel er a re ngelekel a Dios. 9Ele le tilbir a Dios a kmo, “Choua chelechang er sel mel rak, e ak lmuut el mei, e seikid e a Sara a mo mechellii a ngelekel el sechal.” 10Ng diak di le tiaikid e le merekong. Ng dirrek el mle ua isei el mor a Rebeka er a bo le dioll er a re ngelekel, el di mle ta demerir, el demad er a Isak, 11me ng dirkak le mechell, er uche er a bo loruul a ungil ma lechub e ng mekngit, me ng mo sebechel el melemolem a uldesuel a Dios el diak lokiu omerellir a re chad e bai okiu a lulekedongii el le ngileltii, 12me ng dilu er ngii el Rebeka el kmo, “Ngikel klou a mo mesiou er ngikel kekerei.” 13Ng di ua ikel lolekoi a Chedaol Llechukl el kmo, “Ak ngileltii a Jakob, e choitii a Esau.” 14Me kede mo kmo ngerang? Kede mo kmo Dios a chebirukel? Ng kmal diak! 15Ele ng dilu er a Moses el kmo, “Ak mo ochotii a klechubechub er ngak er a ngii di le chad a le soak, e mo chubur a ngii di le chad a le soak.” 16Me ng diak lokiu a soal a chad ma lechub a dechal a rengul a chad el mekerang; ng okiu a klechubechub er a Dios. 17Ele Chedaol Llechukl a melekoi er a Farao el kmo, “Ak ulengesecheklau er a deruchellem el mo uchul e ng mo chemolt a klisichek el okiu kau, me ng mo meraelchisek er a beluulchad el rokir.” 18Ma le ua isei, e a Dios a mo ochotii a klechubechub er ngii er a chad a le soal, e dochercherii a rengul a chad a le soal. 19Ma lta e kau el chad a mo dmu er ngak el kmo, “A le ua isei, e ng mekera Dios e mo omtab a kngtil a chad. Ng techa sebechel el mtekengii a Dios er a telbilel a rengul?” 20E kau el chad ke bekord techang, me ke melekoi er a Dios el ua isei? A bekai a diak el sebechel el dmu er a chad el milebii el kmo, “Ngera me ke mirruul er ngak el ua isei?” 21A chad el omeob a bekai a sebechel el ngar a ikel soal er a chutem el lousbech er ngii, el otebedii er a di osisiu el chutem a chimol mo osongel er a klebekelel ma chimol di bo lousbech er ngii. 22Ma Dios me ng dirrek el ua isei. Ng mle soal el omals el ochotii a klisichel, e ngdi killungii a rengul el kirir tirkel mle kesib a rengul er tir, el mle kirir el nguemed. 23Ng dirrek el mle soal el ochotii a klou el klebkellel el okiu a klechubechub er ngii el mer kid, kid el blo le chebkid, el di mla telbiil er a rengul a mo meskid a klebkellel, 24kid el lulekedongid er a chelsir a re chad er a Israel ma chelsir a re Chisentael. 25A ikakid a tekingel a Dios el ngar a Hosea el kmo, “Tirkel chad el dimlak le chedak, a bo kumekedo er tir el kmo, ‘Re Chedak.’ Ma re beluu el dimlak le betik er a renguk, a bo kumekedo er tir el kmo, ‘Re Betik er a Renguk.’ 26Me sel meldu er tir el kmo, ‘Ng diak kom chedak,’ a bo le mokedo er ngii el kmo te ngelekel a di ngar el Dios.” 27Ma Isaia a oldiu el kirel a Israel el kmo, “A lta e a re chad er a Israel a kmal mo obdois el mo ua ildisel a chelechol er a rriil, e ngdi re mo suobel er tir a di mekesai, 28ele Rubak a di mo mereched el mo meringel el omals er a re chad er a beluulchad el rokui.” 29Ng di ua ikel di bla ledu Isaia er a ngar a mong el kmo, “A lsekum a Rubak el Olab a Bek el Klisiich a dimlak le bechititerir a re bebil er kid me lolemolem, e kede mlol mo ua ia Sodom ma Gomora “ 30Me kede kmo ngerang? Kede kmo a re Chisentael el dimlak lolasem el mo ungil er a rengul a Dios a bla le relleterir a Dios el mo ungil er a rengul, ele tir el uluumera er ngii; 31e a re chad er a Israel el millasem el osiik er a llach el rulleterir el mo ungil er a rengul a Dios a dimlak le betik er ngii. 32E ngera me ng dimlak? Ele tir el dimlak loumera er a Dios el mo ultuil er ngii e mle ultuil er omerellir. Te melsibas er sel olibesongel 33el lolekoi er ngii a Chedaol Llechukl el kmo, “Chelechang, e ak mo mengkengkii a bad er a Sion, el bo le mesibas er ngii a re chad, el ngii el bad a mo uchul a rebetir. E ngdi ngikel chad el oumera er ngii a diak bo le moalech a rengul.”

will be added

X\