ROM 8

1Ma le ua isei er chelechang e ng diak a medebeakl er tirkel oltirakl er a Kristus Jesus. 2Ele llach er a Reng, el omeskid a klengar el obengkel a Kristus Jesus, a mla ngubetak er a llach er a klengit ma kodall. 3Ele sel dimlak el sebechel a Llach el rullii, el chelitechetul a klechad a uchul, a le rirellii a Dios. Ng milelsii a klengit er a klechad er a loderchii a kmal Ngelekel el mei el mo chad el ua ia teleteled a re ngar a klengit, e odersii a klengar er ngii el mo mengeroid a klengit. 4Me tia ia mo uchul e a ikel ungil el omeruul el kired el meruul el oltirakl a Llach a mo sebeched el remuul ele kedoltirakl er a Reng e dikea doltirakl er a di klechad er kid. 5Tirkel oltirakl er a di klechad er a klengar er tir a lomesiur a rengrir a di klechad. E tirkel oltirakl er a Reng er a klengar er tir a lomesiur a rengrir a Reng. 6A lomesiur a rengud a di klechad, e ng mekrolid el mor a kodall; e a lomesiur a rengud a Reng, e ng mekrolid el mor a klengar ma budech. 7Ma le ua isei, e a chad a mo cherrouel a Dios a lomesiur er a rengul a di klechad er ngii, ele ng diak loltirakl a llechul a Dios, ele ng diak el sebechel. 8Me tirkel di oltirakl er a di klechad er tir a diak el sebechir el odeuir a rengul a Dios. 9Ngdi kemiu a diak moltirakl er a di klechad er kemiu; kom oltirakl er a Reng, a lsekum a Reng er a Dios a meral ngar kemiu. Me ngikel diak er ngii a Reng er a Kristus a diak le chedal a Kristus. 10Ngdi lsekum a Krisrus a ngar a rengmiu, e a lta e a bedengiu a mor a kodall, el klengit a uchul, e ngdi reng a mo ngar el llemalt a uchul. 11E a lsekum a Reng er a Dios, el ulekisii a Jesus er a kodall a kie er a rengmiu, e ngii el ulekisii a Kristus Jesus er a kodall a dirrek el mo msa klengar a mo mad el bedengiu, el okiu a Reng el ngar kemiu. 12Ma le ua isei e rudam, e ng ngercheled el diak doltirakl er a di klechad er a klengar er kid. 13Ele lsekum kom oltirakl er a di klechad er a klengar er kemiu, e kom mo mad; e ngdi lsekum kom okiu a Reng el mekoad a mekngit el omerelliu, e kom mo suobel. 14Tirkel oltirakl er a Reng er a Dios a ngelekel a Dios. 15Ele Reng el mngiluu er a Dios a dimlak le rellemiu el mo sibai me medakt; ng bai rirellemiu el mo ngelekel a Dios, me kede mo okiu ngii el oldiu el mor a Dios el kmo, “Abba! Chedam!” 16A Reng er a Dios ma rengud a dmak el dmu el kmo kede ngelekel a Dios. 17Me chelechal de ngelekel a Dios, e kede mo ngma klengeltengat er ngii, e dirrek el mo ngma dikesed el obengkel a Krisrus; ele lsekum kede obengkel el chuarm, e ker dirrek el mo obengkel er a klebkellel. 18Ak melebedebek a ikel ringel el de charm er ngii er chelechang el di mo ua lak a ultutelel a domekesiu ngii ma klebkall el bo le beskid a Dios. 19A rokui el bleob a delechall el semeriar el mengiil er a Dios el mo olecholt er a re ngelekel. 20Ele bleob a ulebals el mo oridii a ultutelel, el dimlak luldesuel, ng bai uleak a uldesuel a Dios el tibir el kmo ng mo ua isei. E ngdi mlar ngii a omelatk 21el kmo a tar a klebesei, e a beluulchad el rokir a mo mengubet er a klisichel a kodall, e mo soiseb er a mededaes el klebkellir a re ngelekel a Dios. 22Ele kede medengei el kmo a rokir el bleob a ongingd er a ringel el me lmuut er chelechang, el di ua ia le ngar a ringel er a cheroll. 23E diak di le bleob e le merekong; kid el ngar ngii er kid a Reng, el mle kot el sengk er a Dios, a dirrek el ongingd el mengiil er a Dios el mo rodelid el mo ngelekel e osebelii a cherrungel el klengar er kid. 24Ele ng uleak a omelatk e kede silobel; e ngdi lsekum kede omes er a dolatk er ngii, e ng diak le meral omelatk. Ele ng techa melatk er a lomes er ngii? 25E ngdi lsekum kede melatk er a diak domes er ngii, e ng mo klou a rengud el mengiil. 26Ng dirrek a Reng a mei el olengeseu er kid er a chelitechetud. Ele ng diak dodengei el kmo ng mekera doluluuch el ngar sel kirel; ngiil Reng a mesisiich el olengit er a Dios el kired me ng ongingd el mesaod a tekingel. 27A Dios el omes a rengud a medenge uldesuel a Reng el kmo ng meluluuch el kirir a re chedal el oltirakl er a soal a Dios. 28Kede medengei el kmo ng ngar a rokui el tekoi e a Dios a oureor el kirel a ungil el obengterir tirkel betik a rengrir er ngii, tirkel lulemekedong er tir el oltirakl er a uldesuel a rengul. 29Tirkel Dios a mla melilt er tir a dirrek el bla loleakl er tir el mo ua Ngelekel, ma Ngelekel bo le kot el ngalek er a delongelir a re betok el odam. 30E sola e tirkel Dios a milleakl er tir a lulemekedong er tir; e tirkel lulemekedong er tir, a lulemeklemalt er tir, e tirkel lulemeklemalt er tir a dirrek el lulengebkall er tir. 31Me kede kmo ngera el kirel a ikal rokui el tekoi? A lsekum a Dios olab el mer kid, e ng techa sebechel el omtok er kid? 32Ng dimlak le kiresii a Ngelekel, e uldersii el kired el rokui, e mekera e diak bo le beskid a rokui el ngerang el uldak er a Ngelekel? 33Ng techa mo oltutakl er a re ngellitel er a Dios? A Dios a kmo ng diak el mekngit! 34Me ng techa mo omals er tir? Ng kol Kristus Jesus el mlad el kired, e mlekiis er a kodall, e chelecha e ng ngar a kadekmel a Dios el meluluuch el kired? 35Ng techa sebechel el choridid er a bltkil a rengul a Krisrus? Ng ringel; ng oturkreng; ng odechelakl; ng klengerenger; ng chelebuul; ng kdekudel tekoi, ada ng kodall a sebechel? 36Ng di ua ikel lolekoi a Chedaol Llechukl el kmo, “Aki di chemau a kodall el kirem er a bek el sils; aki di ua ia sib kung el kirel el mo okodall.” 37E ngdi ngikel betik a rengul er kid a uchul me kede kmal di mo mesisiich er a ikal rokui! 38Ele kungil el medengei el kmo ng ka le kodall, ma ka le klengar, ma ka le re anghel, ma ka le omengedereder, ma ka le tekoi er chelechang ma ka le tekoi er a ngar medad, ma ka le klisiich, 39ma ka le beluulchad er bab, ma ka le beluulchad er iou; ng kmal diak a ngera el ngar a rokuil bleob el mo sebechel el choridid er a bltikerreng er a Dios el ngar a Kristus Jesus el Rubak er kid.

will be added

X\