ROM 7

1Kom ulterkokl el medengei, kemiu el odam er ngak, a ikal bochu kulekoi, ele ng ngar ngii a klaodengei er kemiu er a llach. A llach a di mengedereder er a chad er a dirk le chad. 2Ng di ua ia bechiil el redil el rrengodel er a llach el mor a bechil a dirk le chad a bechil, e ngdi lsekum ng mad a bechil, e ng mengubet er sel llach el mirrenged er ngii er a bechil. 3Ma le ua isei, e a dirk le chad a bechil, e bo lobengkel a kuk tar a chad, e ng mocha er a laokreng. E ngdi lsekum ng mad a bechil, e ng mededesa er a llach ngiil dil, me ng diak le bor a laokreng a bo le bechil a kuk tar a chad. 4Me kemiu el odam er ngak, me kom dirrek el ua isei. Kom mla mad el kirel a Llach, ele kemiu el mla mo telkib er a bedengel a Kristus; me chelecha e kom mla mo chedal ngikei el milekiis er a kodall, me ng uchul e ng mor ngii a ultuteliu el mesiou er a Dios. 5Ele ser a dirk doltirakl er a di klechad er a klengar er kid, e a ngibes er a klengit el okiu a Llach el me duubech, a uluuedikel er a bedenged, me kede di mirruul a mo kirel a kodall. 6E ngdi chelechang, e kede mla mengubet er a Llach, ele kede mlad el kirel a Llach el milengelbus er kid. Me chelechang e ng dikea dosiou er a mechut el llechukl el Llach, e bai ngar a beches el rolel a Reng. 7Me kede kmo ngerang? Kede kmo a Llach a mekngit? Ng kmal diak! E ngdi Llach a mle uchul e ak mo medenge el kmo ng ngera mekngit. Ng dimlak bo kudengei el kmo ng ngera ngibes, a lsekum ng dimlak a Llach el kmo, “Lak bo mngibes.” 8Me ng oeak a llach e a klengit a miltik er a techellel el olekiis er a renguk a bek el bedengel a ngibes. Ele lak a llach e ng diak a klisichel a klengit. 9A klengar er ngak a millemolem el diak a llach el mengedereder er ngii, e ngdi ser a le mei a llach, e a klengit a mlo ouedikel, 10mak mlad. E a llach el mle kirel el oba klengar el mei, a bai mlo kodall el mer ngak. 11Ma klengit a miltik er a techellel el okiu a llach me ng chilebeldkak e mekodkak. 12Ma le ua isei, e a Llach a chedaol, ma ikel longeriil a llach me ng chedaol, e melemalt, e ungil. 13Me tia ng belkul a kmo a ungil a mlo rolel a kodall el mer ngak? Ng kmal diak! Ng klengit a mle rolel a kodall el mer ngak. A klengit a uluusbech er a ungil el mo rolel a kodall el mer ngak, me ng mo uchul e ng mo chemolt a meral teletelel a klengit. A klengit a dirrek el okiu a llach el mo chemolt el kmo ng kmal mekngit. 14Kede medengei el kmo a Llach a klereng; e ngdi ngak a chad el mo mad, el mloterau el sibai er a klengit. 15Ng kmal rrau a renguk er a blekerdelek; ele ng diak kuruul er sel soak e bai meruul er sel chetik. 16Me sel kuruul er sel chetik el meruul er ngii, e ak mo metik er ngii el kmo a Llach a melemalt. 17Me ng diak le ngak a meruul, ng bai klengit el ngar a renguk a meruul a ikel chetik. 18Ak medengei el kmo ng diak a ungil el ngar a renguk er a di klechad er ngak. Ele le soak el meruul a ungil, me ngii a di diak el sebechek. 19Ng diak kuruul er a ungil el soak el meruul er ngii, e bai meruul er a mekngit el chetik el meruul er ngii. 20Ma lsekum ak meruul er sel diak el soak el meruul er ngii, e ng belkul a kmo ng dikea le ngak, ng bai klengit el ngar a renguk a meruul er ngii. 21Me tiakid a blekeradel el kbetik er ngii el kmo a le soak el meruul er a ungil, me ngii a di mekngit a bo kngiltii el meruul er ngii. 22Ngak a dmeu a renguk er a llechul a Dios er sel kmal chelsel a renguk. 23E ngdi kmetik er a kuk tar a blekeradel el ngar ngak el oureor, el ngii el blekeradel a omtok er sel llach el ungil er a renguk. Me ng rullak mak kelebus er a llach er a klengit el oureor el ngar a bedengek. 24Kele kkol chebuul el chad! Ng techa mo osebelak er tial bedengek el obekak el mor a kodall? 25Le modanges a Dios, el meruul er itiang el oeak a Rubak er kid el Jesus Kristus. Ele tiakid a blekerdelek: sel di le ngak el di ngar a uldesuek e ng sebechek el oltirakl a llechul a Dios, e ngdi ngar a di klechad er ngak e ak mesiou er a llach er a klengit.

will be added

X\