ROM 6

1Ma le ua isei, e kede kmo ngerang? Kede di melemolem el ngar a klengit me ng mengal mo obdois a krasia er a Dios? 2Ng kmal diak! Kede mla mad el kirel a klengit, e mekera e dirk melemolem el ngar a klengit? 3Kom kor a medengel kmo ser a bo de metecholb el mo obengkel a Krisrus, e kede dirrek el mlo metecholb el mo obengkel er a kodellel? 4Me ng okiu a techolbchelid er kid e kede mildakl el obengkel er a kodellel, el bo luchul e ker dirrek el ngar el ngar a beches el klengar, el ua Kristus er a le mokiis er a kodall el oeak a kebkall el klisichel a Chedam. 5Ele lsekum kede mlo obengkel el mor a kodall el ua kodellel, e ker dirrek el mo obengkel el mo mekiis er a kodall el ua okisel. 6Kede medengei el kmo sel di mla klechad er kid a mildeel er a kerus el obengkel a Kristus, me ng mo uchul e ng metemall a klisichel a ngelbesed er a klengit, me ng mo diak de sibil a klengit. 7Ele sel le mad a chad e ng mengubet er a klisichel a klengit. 8Ma lsekum kede mla mad el obengkel a Kristus, e kede oumerang el kmo ker dirrek el mo ngar el obengkel. 9Kede medengei el kmo a Kristus a mla mekiis er a kodall e dikea lluut el mad; a kodall a dikea klisichel er ngii. 10Ele kodall el blo le mad er ngii, a kirel a klengit, el di mle tang e dikea lluut; e a klengar el le ngar ngii er chelechang a kirel a Dios. 11Ng kiriu el dirrek el melebedebek er kemiu el ua isei, el mla mad el kirel a klengit e di ngar er chelechang el kirel a Dios el obengkel a Kristus Jesus. 12A bedengiu el mo tmurk a klengar er ngii a mla mo diak le kirel a klengit el mengedereder, me di moltirakl a ngelbesel a klechad er kemiu. 13Ma ka beche di telkib er kemiu me le mechedereder er a klengit, el bo mousbech er ngii el kirel a mekngit. Bai bo longedereder er kemiu a Dios, el bekordchad el mlengai er a kodall el mo ngar, e modars er ngii a klengar er kemiu el rokir, me bo lousbech er kemiu el kirel a ungil el tekoi. 14Ng diak le kirel a klengit el mengedereder er kemiu, ele ng dikea mngar el ngar eungel a llach e ko bai ngar eungel a krasia er a Dios. 15Me kede kmo ngerang? Kede mor a klengit ele ng diak de ngar eungel a llach e kede ngar eungel a krasia er a Dios? Ng kmal diak el ua isei! 16Kom ungil el medengei el kmo sel bo msibai, el orrenges er a tar a chad, e kom mla mo sibil ingikel chad el cho morrenges er ngii. Ng dirrek el ua isei: a klengit cho morrenges er ngii e ng mo mekrolemiu el mor a kodall; e a blekongesenges cho morrenges er ngii, e ng mo mekrolemiu el mor a llemalt. 17E ngdi ng meral mesaul a Dios! Ele ser a ngar a mong, e kom mle sibil a klengit; e ngdi chelechang, e ng kmal blak a rengmiu el oltirakl a blekerdelel osisechakl el cho mngilai. 18Kom mlengubet er a klengit e mlo sibil a llemalt. 19(Ak ukiu a di rolel a klechad el melekoi er kemiu, el chelitechetul a klechad er kemiu a uchul.) Ser a ngar a mong, e kom di mle blekall el ua sibai er a deleboes e meruul a mekngit, el chemau a mekngit el tekoi. Me chelechang, e ng dirrek el kiriu el odars a klengar er kemiu el rokir el sibai er a llemalt el mo kirel a ungil tekoi. 20Ser cho msibil a klengit, e kom mle mededaes el dimlak a uldesuiu er omerellel a llemalt. 21E ngera mle omeksullel omerellel a ikel tekoi el cho merur er ngii er chelechang? A omeksullel a ikel tekoi a kodall! 22Ngdi chelechang, e kom mla mengubet er a klengit e mla mo sibil a Dios, me ng cherrungel a klengar er kemiu el chemau a Dios, e a omeksullel, a diak a ulebengelel klengar. 23Ele omeksullel a klengit a kodall, e ngdi diak el ocheraol el sengk er a Dios, a diak a ulebengelel klengar el ngar a Kristus Jesus el Rubak er kid.

will be added

X\