ROM 5

1Chelechal bla de muklemalt er medal a Dios ele kid el oumerang, e ng budech a delongeled kid ma Dios el oeak a Rubak er kid el Jesus Kristus. 2Ng kid el oumera er a Kristus a uchul, me ng milkrolid el mo medengelii a krasia er a Dios el de ngar ngii er chelechang, me ng dmeu a rengud el melatk e mengiil er a dikesed er a klebkellel a Dios. 3E diak di le tia e le merekong; ng dirrek el dmeu a rengud er a ikel bo de charm er ngii, ele kede medengei el kmo a ringel a rullid el mo meduch a rengud, 4e a ducherreng a mekdbechii a ungil blekeradel, e a ungil blekeradel a mekdbechii a omelatk, 5e a omelatk a diak el rellid el mo metirm a rengud er ngii, ele bltikerreng er a Dios a mla moitel er a rengud el okiu a Chedaol Reng el bla le beskid. 6Ele ser a dirk lak a klisiched, e a Kristus a mlad el kirir a re mekngit el chad er isel belsechel el lulterkeklii a Dios. 7Ng meringel el tekoi er a chad a le mad el kirel a melemalt el chad, e ngdi a lta e a chad a mo kongei el mad el kirel a ungil chad. 8E ngdi Dios a ulechotii a bltkil a rengul er kid, ele ser a dirk de ngar a klengit, e a Kristus a mlad el kired. 9Me chelechang el bla de muklemalt el oeak a rsechel, e kede bai kmal mosobel er a ngesechel a rengul a Dios el oeak ngii. 10Ele ser a dirk de cherrouel a Dios e ng rirellii a delongeled kid me ngii el mo ungil el okiu a kodellel a Ngelekel. Me chelechal bla bo lungil a delongeled, e kede ulterkokl el mo suobel el okiu a klengar er a Kristus. 11E ngdi diak di le tiaikid e le merekong. Kede dirrek el metik er a deuil a rengud er a Dios el okiu a Rubak er kid el Jesus Kristus, el rirellii a delongeled kid ma Dios el mo ungil. 12A klengit a siliseb er a beluulchad el okiu a tal chad, ma kodall a ulekiu a klengit el mei, ma kodall a ulemerk el mor a re chad el rokui, ele rokui a mlor a klengit. 13A klengit a mlar ngii er a beluulchad er uche er a le mei a Llach, e ngdi ser a lak a llach e ng diak lobasech a klengit. 14E ngdi kodall a milengedereder er a rokui el chad, er a Adam el mo lmuut er a Moses, el uldimukl er tirkel dimlak le bor a osisiu el klengit, el ua Adam el ulietii a tekingel a Dios. E a Adam a mle okesiul ngikel kirel el mei. 15E ngdi ikal erung a kakerous, ele sengk er a Dios el diak locheraol el mor a re chad a diak le ua telucheklel a Adam el mor a klengit. Ele le betok el chad a mlad el kngtil ngikel di tal chad a uchul, e a krasia er a Dios a lmuut el ngar uchei ma diak el ocheraol el sengk er ngii me ng ua isei el mor a re betok el chad el oeak a krasia er ngikel di tal chad, el Jesus Kristus. 16Ng ngar ngii a klekakerous er a diak el ocheraol el sengk er a Dios ma kngtil ngikel tal chad. Uriul er a chimol klengit e ng tilobed a kerrekeriil el kmo “ng Mekngit”; e ngdi uriul er a betok el klengit e ng mei a diak el ocheraol el sengk er a kmo “ng Diak el Mekngit!” 17Ng meral tekoi el kmo ng oeak a kngtil a tal chad e a kodall a mlo omuchel el mengedereder el ngikel chad a uchul. Ngdi lmuut el ngar uchei, a ikel le riruul a di tal chad el Jesus Kristus! Tirkel rokui el nguu a olsibes el krasia er a Dios, e muklemalt er medal a mo ngar e mengedereder el ua king el oeak a Kristus. 18Ma le ua isei el di mle tal klengit a dobeklterir a rokui el chad, e ng dirrek el di mle tal melemalt el omeruul a ngubeteterir a rokui el chad e mesterir a klengar. 19Me ng oeak a orrengesmengoit er a di tal chad, e a re betok el chad a mlo mekngit; me ng dirrek el ua isei el oeak a blekongesenges er a di tal chad e a re betok el chad a mo muklemalt er medal a Dios. 20A Llach a mlei me bo lobdois a klengit; e ngdi sel bo lobdois a klengit e a krasia er a Dios a lmuut el mengal mo obdois. 21Ma le ua isei el klengit a ulekiu a kodall el mengedereder a klengar er a re chad, e ng ua isei el krasia er a Dios a mengedereder el oeak a llemalt el omekrael er a re chad el mor a diak a ulebengelel klengar el okiu a Jesus Kristus el Rubak er kid.

will be added

X\