ROM 4

1Chelecha e ng ngera kede dmu el kirel a Abraham el ucheled a re chad er a Judea? 2A lsekum a Abraham a ulebasech el melemalt el oeak a omeruul, e ng ngar ngii a mo uchul e ng di ngii el chemat er ngii. E ngdi diak el sebechel el ua isei er medal a Dios. 3Ele Chedaol Llechukl a kmo, “A Abraham a uluumera er a Dios, me tia ia mle uchul e ng ulebasech el melemalt.” 4Ngikel chad el oureor, a lesuk a udoud e ng kerrekerengel el kirel a ikel le riruul, ng diak el sengk el mor ngii. 5E ngikel diak lultuil er omerellel, e bai oumera er a Dios el sebechel el rullii a chebirukel el chad el mo melemalt, ng ngii el oumera uchul ma Dios a omeklemalt er ngii. 6Tiaikid a belkul sel lullekoi er ngii a David el kirel a klengeltengat el mor a chad el Dios a omasech er ngii el kmo ng melemalt, el ileakl er a ikel loruul: 7“Te ngeltengat tirkel chad el mekngit el blekerdelir a mla musubes, ma kngterir a mla mesuld! 8Ng ngeltengat ngikel chad el Rubak a diak bo lomasech a kngtil!” 9Tial rolel a klengeltengat a diak di le kirir tirkel blotk e le merekong; ng dirrek el kirir tirkel diak le blotk. Ele lolekoi a Chedaol Llechukl el bla kimdung a kmo, ‘A Abraham a uluumera er a Dios, me tiaikid ia uchul, e a Dios a milsechii el melemalt.” 10Ng oingera e tia mlo ua isei? Ng uchei, ada ng uriul er a lobotk a Abraham? Ng uchei; ng dimlak luriul. 11Ng mlo nguu a botk er uriul, el mo moues el olechotel a kmo ng uluumera uchul ma Dios a ulemeklemalt er ngii. Tia mlo ua isei, el olecholt el kmo a Abraham a demerir tirkel rokui el oumerang e diak le blotk, el mla obasech er a Dios el melemalt, 12e dirrek el demerir tirkel blotk, el diak di le blotk e le merekong, te bai uluumerang el ua demad el Abraham er uchei er a lobotk. 13A telbilel a Dios el mlor a Abraham ma ruldidellel a rsechel el kmo a beluulchad a mo kloklir, a dimlak le mei el oeak a Llach, ng bai ngii el uluumerang a uchul ma Dios a ulemeklemalt er ngii. 14Ele lsekum sel le tilbir a Dios a mo kirir tirkel oltirakl a Llach, e ng mo diak a ultutelel er a chad a loumerang, ma mo diak a belkul a telbilel a Dios. 15Ele Llach a melai er a ngesechel a rengul a Dios el mei, ele sel diak a Llach er ngii a diak a oietel a Llach er ngii. 16A Dios a rirellii a telbilel el mle ultuil er a Abraham el uluumera er ngii, me bo loeak a krasia e le mutebechel el mor a rokui el uldidellel a rsechel, el diak di le bor tirkel olengesenges er a Llach, ng dirrek el mor tirkel oumerang el ua Abraham el demad el rokui, 17el ua ikel lolekoi a Chedaol Llechukl el kmo, “Ak mla rullau el mo demal a betok el beluu.” Ma le ua isei e tial telbiil a ungil er medal a Dios, el luluumera er ngii a Abraham, ngiil Dios el omekngar a mla mad e omekdubech a dimlak le ngar ngii. 18A Abraham a di uluumerang e mengiil el mo lmuut er ser a bo lak a ungil el uchul e longiil, misei ia uchul me ng mlo “demal a betok el beluu.” Ng di ua lolekoi a Chedaol Llechukl el kmo, “A ruldidellel a rsechem a mo ua ildisel a btuch er a eanged.” 19Ng dimlak bo le mechitechut el oumerang, er a lomes er a bedengel el di ua ia lulekoad kung, ele ngii el kmedu el mo dart a rekil, e lolebedebek er a Sara el mle kebai el dil. 20Ng dimlak bo lak loumerang, e dimlak el bo loumededenger er a telbilel a Dios; ng bai mlo mesisiich el oumerang e oldanges er a Dios. 21Ng kmal mle ungil el medengei el kmo a Dios a sebechel el otaut a ikel bla letib. 22A Abraham a uluumerang a uchul ma “Dios a milsechii el melemalt.” 23Sel tekoi el kmo “ng ulebasech el kmo ng melemalt” a dimlak le meluches el di kirel ngiil tang. 24Ng dirrek el melluches el kired a re mo obasech el kmo kede melemalt, ele kid el oumera er ngii el ulekisii a Rubak er kid el Jesus er a kodall. 25Ng kngtid a uchul me ng mlor a kodall, e mlokiis er a kodall el meklemeltid er medal a Dios.

will be added

X\